រាជធានីភ្នំពេញ ៖ ដូចការគ្រោងទុកនៅ វេលាម៉ោងជាង៨ព្រឹកថ្ងៃទី៣១ មីនា លោក ម៉ម សូណង់ដូ ប្រធានវិទ្យុសម្បុកឃ្មុំ រួមជាមួយអ្នកគាំទ្រសមាគមអ្នកប្រជាធិបតេយ្យ និងក្រុមសកម្មជនដីធ្លីមុខដដែលៗសរុបទាំងអស់មានប្រមាណ១០០នាក់ បានព្យាយាមនាំគ្នាសម្រុកចូលទីលានប្រជាធិបតេយ្យដែលជាទីលានហាមឃាត់និងដោយមិនមានការអនុញ្ញាតពីសាលារាជធានីភ្នំពេញ ក៏ត្រូវបានកម្លាំងសណ្ដាប់ធ្នាប់ខណ្ឌដូនពេញ និងនគរបាលប្រឆាំងបាតុកម្មបានរារាំងនិងមានការប៉ះទង្គិចគ្នាមួយប្រាវបណ្ដាលឱ្យអ្នកតវ៉ា២នាក់បែកក្បាល និងម្នាក់ត្រូវបានឃាត់ខ្លួនដោយចោទថាបានញុះញង់ឱ្យមានអំពើហិង្សានិងបានគំរាមដុតរថយន្តសមត្ថកិច្ច ។
មន្ត្រីសាលាខណ្ឌដូនពេញដែលតាមដានសភាពការណ៍បាតុកម្មដឹកនាំដោយលោក ម៉ម សូណង់ដូ នេះបាននិយាយថា ការប៉ះទង្គិចគ្នាបានកើតនៅវេលាម៉ោង៨និង៣៥នាទីព្រឹក ខណៈពេលពួកគេព្យាយាមចូលទៅកាន់ទីលានប្រជាធិបតេយ្យក្នុងបំណងធ្វើការតវ៉ាទាមទារសុំដំឡើងវិទ្យុផ្សព្វផ្សាយបន្តទៅតាមបណ្ដាខេត្តនិងសុំហ្វ្រេកង់ទូរទស្សន៍ ។ ការប៉ះទង្គិចគ្នាមួយប្រាវនេះមិនបង្កឱ្យមានបញ្ហាធ្ងន់ធ្ងរនោះទេ តែបណ្ដាលឱ្យអ្នកតវ៉ា២នាក់រងរបួសបែកក្បាល ។ ប៉ុន្តែក្រោយពីប៉ះទង្គិចក្រុមអ្នកតវ៉ាបានដកថយចេញពីក្បែរទីលានប្រជាធិបតេយ្យមកប្រមូលផ្ដុំគ្នានៅលើសួនច្បារខាងកើតស្ពាននាគវិញម្ដង ។
លោក ម៉ម សូណង់ដូ បាននិយាយទៅកាន់ក្រុមបាតុករនោះថា លោកនិងបន្តធ្វើការទាមទារដំឡើងវិទ្យុ និងហ្រេ្វកង់ទូរទស្សន៍រហូតទាល់តែបានសម្រេច បើទោះបីជាពេលនេះមិនត្រូវបានសាលារាជធានីឱ្យលោកដង្ហែក្បួនទៅកាន់ក្រសួងព័ត៌មានក៏ដោយ ។ បន្ទាប់មកលោក ម៉ម សូណង់ដូបានឱ្យក្រុមបាតុករនាំគ្នារំសាយនៅវេលាម៉ោង៩និង២០នាទី រួចលោកក៏បានឡើងជិះរថយន្តចេញទៅផ្ទះវិញ ដោយបានបើកកញ្ចក់រថយន្តលើកដៃបាយៗទៀតផង ទុកឱ្យអ្នកហែហមទាំងឡាយបែកខ្ញែកគ្នាតាមយថាកម្មដូចកូនមាន់បាត់មេ ។ មន្ត្រីនគរបាលខណ្ឌដូនពេញបានឱ្យដឹងថា នៅវេលាម៉ោង១០ព្រឹកនាថ្ងៃដដែលកម្លាំងនគរបាលប្រឆាំងបាតុកម្មបានរុញច្រានក្រុមអ្នកតវ៉ាដែលដឹកនាំដោយលោក ម៉ម សូណង់ដូ ចេញពីសួនច្បារខាងកើតស្ពាននាគក្រោយពេលលោក ម៉ម សូណង់ដូ ចេញទៅ ព្រោះការប្រមូលផ្ដុំគ្នានេះមិនមានការអនុញ្ញាតពីសាលារាជធានីនោះទេ ។
ការប៉ះទង្គិចគ្នាជាលើកទី២នេះមិនមានអ្នករងរបួសនោះទេ គ្រាន់តែបុរសម្នាក់ត្រូវបានឃាត់ខ្លួនបញ្ជូនទៅអធិការដ្ឋាននគរបាលប៉ុស្ដិ៍វត្តភ្នំ ខណ្ឌដូនពេញ ដើម្បីសាកសួរដោយសមត្ថកិច្ចចោទថាបុរសនេះប្រើពាក្យសម្ដីក្នុងការញុះញង់ឱ្យមានអំពើហិង្សានិងគំរាមដុតរថយន្តសមត្ថកិច្ច ។ មន្ត្រីសមត្ថកិច្ចបានបញ្ជាក់ថា ទោះជាបែបនេះក្ដីបុរសរូបនោះត្រូវបានដោះលែងទៅវិញ បន្ទាប់ពីសាកសួរនិងឱ្យធ្វើកិច្ចសន្យា ។ គួរបញ្ជាក់ផងដែរថា សាលារាជធានីភ្នំពេញកាលពីថ្ងៃទី២៥ មីនា កន្លងទៅបានប្រកាសជាសាធារណៈថា មិនអនុញ្ញាតឱ្យប្រធានវិទ្យុសម្បុកឃ្មុំធ្វើបាតុកម្មនៅលើទីលានប្រជាធិបតេយ្យនាព្រឹកថ្ងៃទី៣១ មីនា នេះឡើយ ។ អភិបាលរងរាជធានីភ្នំពេញ លោក ឃួង ស្រេង តាមរយៈលិខិតផ្ញើជូនលោក ម៉ម សូណង់ដូ បានឱ្យដឹងថា ដើម្បីបន្តបាននូវភាពស្ងប់ស្ងៀមក្នុងការធានាបានជីវភាពជាប្រក្រតី ក៏ដូចជារបៀបរៀបរយសាធារណៈល្អជូនប្រជាពលរដ្ឋ សាលារាជធានីភ្នំពេញមិនអនុញ្ញាតឱ្យប្រធានវិទ្យុសម្បុកឃ្មុំមានការជួបជុំគ្នាធ្វើបាតុកម្មនៅលើទីលានប្រជាធិបតេយ្យ និងការដង្ហែក្បួនទៅក្រសួងព័ត៌មាននៅថ្ងៃទី៣១ មីនា ទេ ។
លោកអភិបាលរងរាជធានីភ្នំពេញរូបនេះបានថ្លែងបន្តថា ក្នុងករណីមានការជួបជុំនិងដង្ហែក្បួនធ្វើឱ្យប៉ះពាល់ដល់សន្ដិសុខ សុវត្ថិភាពនិងរបៀបរៀបរយសាធារណៈ ព្រមទាំងមានការប៉ះទង្គិចណាមួយកើតឡើង លោកប្រធានវិទ្យុត្រូវទទួលខុសត្រូវទាំងស្រុងចំពោះមុខច្បាប់ជាធរមាន ។ គួររំលឹកថា កាលពីថ្ងៃទី២៧ មករា ២០១៤ វេលាម៉ោង៩និង២៥នាទីព្រឹក លោក ម៉ម សូណង់ដូ បានដឹកនាំបាតុករប្រមាណជា៣០០នាក់ចេញពីសួនច្បារខាងកើតស្ពាននាគឆ្ពោះទៅកាន់ក្រសួងព័ត៌មានដែលមានទីតាំងលើកំណាត់មហាវិថីព្រះមុនីវង្ស ខាងជើងសាលារាជធានីភ្នំពេញ ស្ថិតក្នុងសង្កាត់ស្រះចក ខណ្ឌដូនពេញ ដើម្បីទាមទារដំឡើងវិទ្យុផ្សព្វផ្សាយបន្តទៅតាមបណ្ដាខេត្តនិងសុំហ្វ្រេកង់ទូរទស្សន៍ ។ ប៉ុន្តែការធ្វើបាតុកម្មបិទផ្លូវនាពេលនោះត្រូវបានកម្លាំងកងរាជអាវុធហត្ថប្រឆាំងបាតុកម្មធ្វើការបំបែកដោយប្រើគ្រាប់បែកផ្សែង ។ ក្នុងការបង្ក្រាបបាតុកម្មពេលនោះមិនមានអ្នករងរបួសឬស្លាប់នោះទេ ៕
ចែករំលែកព័តមាននេះ