ខេត្តស្ទឹងត្រែង ៖ យុវជនចរិតស្រីម្នាក់ ដែលត្រូវបានគេប្រទះឃើញស្លាប់នៅក្នុងសាលាបឋមសិក្សាស្ទឹងត្រែងក្រុង កាលពីវេលាម៉ោង៥និង១៩នាទីព្រឹកថ្ងៃទី២៩ មីនា ស្ថិតក្នុងភូមិស្ពានថ្ម សង្កាត់ស្ទឹងត្រែង ក្រុងស្ទឹងត្រែង ។ ដោយមានស្នាមចាក់ជាច្រើនកាំបិតចុងស្រួច ហើយសមត្ថកិច្ចសន្និដ្ឋានថា ជាករណីឃាតកម្មគិតទុកជាមុន ដែលអាចប្រព្រឹត្តទ្បើងដោយមនុស្ស២នាក់ទៅ៣នាក់នោះ រហូតមកដល់ថ្ងៃទី៣១ មីនា ឃាតករដៃដល់នៅមិនទាន់ត្រូវបានវែកមុខឃើញនៅទ្បើយនោះទេ ទោះបីមានជនសង្ស័យមួយចំនួនត្រូវបានហៅមកសាកសួរជាបន្តបន្ទាប់ក្តី ។
សូមបញ្ជាក់ថា ករណីចាក់សម្លាប់នេះ បានធ្វើឱ្យមានការភ្ញាក់ផ្អើលពេញក្រុងស្ទឹងត្រែងផងដែរ ។ តាមប្រភពព័ត៌មានពីគ្រួសារសព ឱ្យដឹងថា នៅល្ងាចមុនពេលកើតហេតុ ជនរងគ្រោះបានសុំម្តាយទៅហូបការ ក្រោយមកក៏បាត់ដំណឹង ។ ក្រោយពីបាត់មិនឃើញមកផ្ទះ លោកអធិការដែលត្រូវជាបងថ្លៃបានដើររក រហូតដល់ម៉ោង២រំលងអធ្រាត្រនៅតែមិនឃើញ ។ លុះព្រលឹមទ្បើង ក៏ត្រូវបានអ្នកលក់បបរក្នុងសាលារៀនប្រទះឃើញជនរងគ្រោះស្លាប់ និងបានរាយការណ៍ដល់សមត្ថកិច្ចចុះពិនិត្យសព ។
ប្រភពព័ត៌មានពីកន្លែងកើតហេតុឱ្យដឹងថា នៅក្បែរសព គេឃើញមានស្បែកជើងស្ត្រីប្រទ្បាក់ឈាម និងនៅលើសព មានស្នាមជាំនៅត្រង់ក ដែលធ្វើឱ្យមានការសង្ស័យថា អំពើឃាតកម្មនេះ បង្កទ្បើងដោយមនុស្សស្រីផងដែរ ដោយមានការចាប់ច្របាច់.ក រួចទើបចាក់នឹងកាំបិតតាមក្រោយ ។ ទោះជាយ៉ាងណា នគរបាលជំនាញ មិនបានបង្ហើបអ្វីទាំងអស់ ដោយលោកវរសេនីយ៍ទោ ដួង ស៊ីវត្ថា នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននរបាលខេត្ត គ្រាន់តែនិយាយថា កំពុងស្រាវជ្រាវ ។
លោកនាយការិយាល័យបន្តថា ឃាតករមិនស្គាល់អត្តសញ្ញាណចាក់នឹងកាំបិតចុងស្រួចចំនួន៥កាំបិតចេញពោះវៀនបណ្តាលឱ្យស្លាប់ រួចជនសង្ស័យយកកាំបិតចុងស្រួចមកបោះចោលចម្ងាយពីជនរងគ្រោះប្រមាណ២០០ម៉ែត្រ ។ លោក ដួង ស៊ីវត្ថា បន្តថា ជនរងគ្រោះដែលត្រូវឃាតករចាក់សម្លាប់មានឈ្មោះ មាស ចំរើន អាយុ២៣ឆ្នាំ មានមុខរបរជាអ្នកកែសម្ផស្ស និងត្រូវជាប្អូនថ្លៃរបស់លោក ឈូក កុម៉ល់ អធិការនគរបាលក្រុងស្ទឹងត្រែង ៕
ចែករំលែកព័តមាននេះ