ខេត្ដកំពង់ឆ្នាំង ៖ កូនក្រមុំដែលទើបរៀបការបាន៧ថ្ងៃ បានលេបថ្នាំប៉ងសម្លាប់ខ្លួនបង្កឱ្យមានការភ្ញាក់ផ្អើល កាលពីវេលាម៉ោង៧និង៣០នាទីយប់ថ្ងៃទី៣០ មីនា នៅលំនៅឋានរបស់នាង ក្នុងភូមិអូរទទឹង ឃុំស្វាយជ្រំ ស្រុករលាប្អៀរ ហើយត្រូវបានក្រុមគ្រួសារដឹកយកទៅសង្គ្រោះនៅមន្ទីរពេទ្យជាបន្ទាន់ ។ ពុំមានប្រភពណាបញ្ជាក់ថា នាងលេបថ្នាំសម្លាប់ខ្លួនបណ្ដាលមកពីមូលហេតុអ្វីពិតប្រាកដទេ តែតាមការសង្ស័យថាបណ្ដាលមកពីប្ដីដែលនាងបានរៀបការជាបុរសពោះម៉ាយ ធ្លាប់មានប្រពន្ធ២ និងកូន៤នាក់ ។ ទោះជាយ៉ាងណា នេះគ្រាន់តែជាការសន្និដ្ឋានទេ។
ស្រ្ដីទើបរៀបការរូបនេះឈ្មោះ វង់ សុជាតិ អាយុ ២៦ឆ្នាំ ។ នៅព្រឹកថ្ងៃទី៣១ មីនា នាងកំពុងស្ថិតក្នុងការជួយសង្គ្រោះនៅឡើយ ដែលគ្រូពេទ្យប្រាប់ថា ធ្ងន់ធ្ងរនិងកំពុងស្ថិតក្នុងការតាមដាន ។ គ្រូពេទ្យប្រាប់ថា នាងត្រូវបានដឹកមកដល់មន្ទីរពេទ្យនាវេលាម៉ោង៩យប់ថ្ងៃទី៣០ មីនា ហើយគ្រូពេទ្យបានលាងក្រពះ ដាក់សេរ៉ូម និងបញ្ចូលខ្យល់អុកស៊ីសែន ប៉ុន្ដែមកដល់ព្រឹកថ្ងៃទី៣១ មីនា នាងនៅតែសន្លប់នៅឡើយ ។ ក្រុមគ្រួសារដែលនៅកំដរនៅក្នុងមន្ទីរពេទ្យបានលាក់បាំងពីមូលហេតុនៃការប៉ងសម្លាប់ខ្លួននេះ ដោយគ្រាន់តែប្រាប់ពីឈ្មោះនិងលំនៅឋានរបស់នាងប៉ុណ្ណោះ ដោយមិនប្រាប់ពីមូលហេតុអ្វីឡើយ និងបានប្រាប់ថា នាងនៅលីវ មិនទាន់រៀបការទៀតផង ។ ផ្ទុយពីការប្រាប់របស់ក្រុមគ្រួសារ លោក អ៊ុក យ៉ុន អនុប្រធានភូមិអូរទទឹងបានប្រាប់តាមទូរស័ព្ទថា នាង វង់ សុជាតិ អាយុ ២៦ឆ្នាំ បានរៀបការកាលពីថ្ងៃទី២២ មីនា ឆ្នាំ២០១៤ ជាមួយបុរសម្នាក់ឈ្មោះ សុខ សាំង អាយុជាង៤០ឆ្នាំ មានទីលំនៅក្នុងភូមិ-ឃុំជាមួយគ្នា ។
បុរសនេះពោះម៉ាយធ្លាប់មានប្រពន្ធ២ ប្រពន្ធទី១ មានកូន៣នាក់ ហើយបានលែងលះគ្នាដាច់ស្រេច ទើបមានប្រពន្ធទី២ មានកូន១ ។ ប្រពន្ធទី២បានស្លាប់ជាង៥ឆ្នាំហើយ ក៏យកប្រពន្ធទី៣ ទើបរៀបការបាន៧ថ្ងៃទេ ។ គាត់មិនបានដឹងថា នាងលេបថ្នាំកណ្ដុរប៉ងសម្លាប់ខ្លួនដោយសារវិបត្ដិអ្វីទេ តែគាត់សង្ស័យថា មកពីតូចចិត្ដនឹងប្ដីជាបុរសពោះម៉ាយប្រពន្ធ២ ។ ទោះជាយ៉ាងណា គាត់គ្រាន់តែសង្ស័យទេ ឯរឿងពិតយ៉ាងណានោះ គាត់មិនដឹងច្បាស់ឡើយ ព្រោះគាត់បានមកឆ្ងាយមិនទាន់ត្រឡប់ទៅវិញ ។ ផ្ទុយគ្នាពីប្រភពខាងលើ លោក យ៉ុម សមាជិកភូមិអូរទទឹងបានប្រាប់ថា នាងខឹងបងស្រីស្ដីបន្ទោស ។ មុនពេលកើតហេតុ បងស្រីឈ្មោះ វង់ សុជា អាយុ ៤០ឆ្នាំ បានទៅក្រុងកំពង់ឆ្នាំង ដើម្បីផឹកស៊ីជប់លៀង ចំណែកនាង វង់ សុជាតិ ក៏មិនបាននៅផ្ទះដែរ គឺទៅផឹកស៊ីនៅផ្ទះគេ ដោយគ្មានអ្នកណាមើលគោ ។
លុះពេលត្រឡប់ចូលផ្ទះវិញ បងស្រីបន្ទោសថា បើអញមិននៅផ្ទះហើយ ឯងក៏មិននៅផ្ទះដែរ! ហើយប្រកែកគ្នា ទើបមានរឿងលេបថ្នាំនេះកើតឡើង។ ទោះបីជាបែបណា នេះគ្រាន់តែជាការបកស្រាយខុសៗគ្នា ឯរឿងពិតមានតែសាមីខ្លួនទេទើបដឹងច្បាស់ពីការប៉ងសម្លាប់ខ្លួននេះ ៕
ចែករំលែកព័តមាននេះ