ខេត្តព្រះសីហនុ ៖ ច្រើនទសវត្សរ៍កន្លងមកហើយ ពុំមាននរណាម្នាក់ហ៊ានទិញដីដើម្បីសាងសង់សំណង់ ឬបើកហាងលក់ដូរនៅលើដីច្រមុះជ្រូកដ៏ធំមួយ ដែលនៅទល់មុខរូបសំណាកតោពីរ(ញី-ឈ្មោល) ដែលបានសាងសង់ជានិមិត្តរូបនៃខេត្តមាត់សមុទ្រខ្មែរ ដែលនៅកណ្តាលក្រុងព្រះសីហនុឡើយ ។
ការខ្លាចរអានេះ ព្រោះតែគ្រប់គ្នាមានជំនឿថា ការសាងសង់សំណង់ស្នាក់នៅចំពីមុខតោពីរមិនបានសុខ ហើយបើធ្វើជាហាងលក់ដូរ មុខជំនួញរបស់គេអាចនឹងត្រូវវិនាសឬខាតឡុងចុង ព្រោះស្តេចតោទាំងពីរសម្លឹងចំពីមុខ ធ្វើឱ្យហុងស៊ុយធ្លាក់ចុះ ។ ដោយសារតែជំនឿតៗគ្នារហូតមកនោះទើបធ្វើឱ្យដីនៅទល់មុខស្តេចតោទាំង២ច្រើនឆ្នាំមកហើយ មិនហ៊ាននរណាប្រថុយទិញយកទៅធ្វើជាអ្វីឡើយ ។
ប៉ុន្តែមួយរយៈចុងក្រោយនេះបន្ទាប់ពីមានលំហូរអ្នកវិនិយោគចិនយ៉ាងគំហុក ចូលមកកាន់ខេត្តព្រះសីហនុ បានធ្វើឲ្យដីនៅក្រុងព្រះសីហនុតំបន់ណាក៏ឡើងថ្លៃហួសពីការស្មាន ដែលបានធ្វើឱ្យអ្នកមានដីចំកន្លែងត្រូវប៉ាន់នានា ក្លាយជាអ្នកមានមួយប៉ព្រិចភ្នែក និងពិបាករកដីកន្លែងល្អៗ ។
ដីទំនេរចំមុខតោពីរត្រូវបានក្រុមហ៊ុនចិនទិញកសាងអគារដ៏ធំមួយមានកម្ពស់ជាច្រើនជាន់ ហើយក៏បានសាងសង់រូបសំណាកដំរីមានញី ឈ្មោលធំៗមានភ្លុកវែងដ៏មានអំណាចចំនួន៥រួមជាមួយកូនអមផង ដើម្បីទប់ទល់មហិទ្ធិឫទ្ធិដ៏ខ្លាំងក្លារបស់ស្តេចតោទាំងពីរដែលជាស្តេចសត្វម្រឹក ។ យោងតាមឯកសារ ដំរីគឺជាគុជសារដែលអាចប្រឆាំងតោបាន គេមានជំនឿថា ដំរីមួយអាចទប់ទល់ជាមួយតោញីចំនួន៧ ឬតោឈ្មោលពីរទើបអាចសំលាប់ដំរីមួយបាន។
មានការដំណាលតៗគ្នាជុំវិញយកគ្រាប់គជ់ដាក់ក្នុងមាត់តោឈ្មោលបែបអបីយជំនឿពាក់ព័ន្ធស្តីពីតំណែងអភិបាលខេត្តព្រះសីហនុ ដោយសារខ្លាចចាញ់មហិទ្ធិឫទ្ធិតោញីឈ្មោលស៊ី ឱ្យធ្លាក់ពីតំណែង បានអញ្ជើញគ្រូទាយមកពីហុងកុង ដើម្បីរកវិធីទប់ទល់ក្នុងបំណងរក្សាតំណែងឲ្យបានយូរ ព្រោះមានអភិបាលខេត្តច្រើនរូបហើយឆាប់ធ្លាក់ពីដំណែងពេក ។
ក្រោយពី«មុិ»ទើបគ្រូហុងស៊ុយនោះបានផ្តល់ឱវាទឱ្យលោកអភិបាលត្រូវតែយកគ្រាប់គជ់ ឬអ្នកខ្លះហៅថាគ្រាប់ឃ្លី ដាក់ចូលក្នុងមាត់តោដើម្បីកុំឱ្យខាំបាន ទើបរឿងរ៉ាវនេះបានធ្វើឡើង នៅឆ្នាំ១៩៩៣ គឺក្រោយការបោះឆ្នោតដែលពេលនោះលោក ថាំ ប៊ុនស្រុន កូតាគណបក្សហ្វុ៊នស៊ិនប៉ិច បានតំណែងជាអភិបាលក្រុងនាពេលនោះ ព្រោះមិនទាន់ក្លាយជាខេត្តទេ ហើយរូបសំណាកតោញីឈ្មោលនេះក៏បានធ្វើឡើងនៅដើមទសវត្សទី៩០នេះឯង ដោយដាក់គ្រាប់គជ់ ។
កាលដើមឡើយរូបសំណាកតោហាមាត់ពុំមានគ្រាប់គជ់នៅខាងក្នុងមាត់ទេ ហើយរូបសំណាកតោចាស់ពីដើមនោះ មិនដឹងថាយកទៅតម្កល់នៅទីណានោះទេ ។ យ៉ាងណាក៏ដោយ នេះគ្រាន់តែជាអបីជំនឿតែប៉ុណ្ណោះ។ រីឯជំនឿជារឿងរបស់បុគ្គល មិនគួរជឿលើអរូបីយណាដែលគ្មានហេតុផលច្បាស់លាស់នោះទេ ។ បុគ្គលិកសំណង់ក្រុមហ៊ុនចិនបានបង្ហើបឲ្យដឹងថា ថៅកែបានដាក់តាំងរូបសំណាកដំរីប្រាំ គឺដើម្បីទប់ទល់ជាមួយរូបសំណាកតោពីរដែលនៅពីមុខនិងឲ្យមានហុងស៊ុយក្នុងការប្រកបរបររកស៊ី ។
តាមប្រវត្តិរូបសំណាកស្តេចតោញី ឈ្មោលជានិមិត្តរូបខេត្តនេះ ដោយសារក្រោយទទួលបានឯករាជ្យពីបារាំងសម្តេចឪ(នរោត្តម សីហនុ) បានកសាងកំពង់ផែសមុទ្រមួយហើយបានដាក់ព្រះនាមរបស់ព្រះអង្គគឺក្រុងព្រះសីហនុ ។ ដោយសារព្រះកិត្តិនាមរបស់ព្រះអង្គទើបយកឈ្មោះស្តេចម្រឹកដ៏មានអំណាចនោះ(រាជសីហ ឬសឹង្ហ) មកធ្វើជារូបសំណាកតោតែម្តង ។
លោក ដេត ណូ ប្រធានមន្ទីរវប្បធម៌និងវិចិត្រសិល្បៈ កាលពីពេលថ្មីៗកន្លងមកឲ្យដឹងតាមឯកសារចងក្រងអំពីប្រវត្តិនៃការកកើតខេត្តព្រះសីហនុថា ដំបូងឡើយបានយកឈ្មោះឆកកំពង់សោម មកដាក់ឈ្មោះខេត្តនៅក្នុងឆ្នាំ១៩៦២ ឆ្នាំ១៩៧០ ឆ្នាំ១៩៧៥ ។ ឆ្នាំ១៩៧៩ មានឈ្មោះថា «ក្រុងកំពង់សោម» លុះដល់ឆ្នាំ២០០៨បានដូរឈ្មោះទៅជាក្រុងព្រះសីហនុ ។
លុះដល់ថ្ងៃទី២២ ខែធ្នូ ឆ្នាំ២០០៨បានប្តូរឈ្មោះពីក្រុងព្រះសីហនុ ទៅជាខេត្តព្រះសីហនុវិញ និងមាន
អនុក្រឹត្យកាត់ដែនដីស្រុកកំពង់សិលាមកពីខេត្តកោះកុងដាក់បញ្ចូលមកខេត្តព្រះសីហនុជាអ្នកគ្រប់គ្រងរដ្ឋបាលវិញ ។ ការប្តូរឈ្មោះទៅជាខេត្តព្រះសីហនុវិញដោយយកព្រះនាមសម្តេចព្រះនរោត្តម សីហនុ
មកដាក់ ដោយសារតែការខិតខំប្រឹងប្រែងស្ថាបនាកសាងរបស់សម្តេចព្រះនរោត្តម សីហនុ បានបន្សល់
ទុកសមិទ្ធផលជាច្រើនដែលមានតម្លៃមិនអាចកាត់ថ្លៃបានរហូតមកដល់សព្វថ្ងៃនេះ ។
នៅក្នុងឆ្នាំ១៩៦២ សម្តេចព្រះនរោត្តម សីហនុ បានកសាងរូបសំណាកសត្វតោញី ឈ្មោល ដែលជាប្រភេទស្តេចសត្វម្រឹគី ម្រឹគា មួយគូកំពុងតែឈរបង្អួតខ្លួនដោយអំណាច ជាតំណាងឲ្យខេត្តព្រះសីហនុសក្តិសមទៅនឹងព្រះកិត្តិនាមដែល ព្រះបរមរតនកោដ្ឋ បានកសាងទុកឲ្យកូនចៅចៅទួតរបស់ព្រះអង្គ ភ្ញៀវទេសចរជាតិ និងអន្តរជាតិបានទស្សនា និងផ្តិតយករូបភាពដែលជាសមិទ្ធផលក្រោមស្នាព្រហស្តរបស់ព្រះអង្គក្នុងការបង្កើតខេត្តព្រះសីហនុ ។ ផ្ទុយពីជំនឿខាងលើ គ្រាប់គជ់នៅក្នុងមាត់ស្តេចសត្វតោ ជាតំណាងឲ្យសក្តានុពលដ៏សំបូរបែបនៃសម្បត្តិធម្មជាតិរបស់ខេត្ត ដែលមានសក្តានុពលសេដ្ឋកិច្ច ។
កំពង់ផែស្វយ័តតំបន់សេដ្ឋកិច្ចពិសេសអាកាសយានដ្ឋានអន្តរជាតិកងកេង និងឆ្នេរសមុទ្រដ៏ស្រស់ស្អាត ជាប៉ូលសេដ្ឋកិច្ចមួយ ក្នុងចំណោមប៉ូលសេដ្ឋកិច្ចទាំងបីក្នុងយុទ្ធសាស្ត្រចតុកោណ តំណាក់កាលទីបីរបស់រាជរដ្ឋាភិបាលកម្ពុជា ដែលត្រូវបានកំណត់គោលដៅជាតំបន់សេដ្ឋកិច្ចពិសេសពហុបំណង នៅក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ ។ ដោយសារតែខេត្តមានសក្តានុពល លើវិស័យទេសចរណ៍ ឧស្សាហកម្ម ពាណិជ្ជកម្មបានជំរុញឲ្យវិស័យអចលនទ្រព្យដីធ្លីមានហាងឆេងងើបឡើងខ្ពស់ជាបណ្តើរៗ ៕
ចែករំលែកព័តមាននេះ