ខេត្តបន្ទាយមានជ័យ ៖ ទឹកជំនន់បានជន់លិចស្រូវប្រមាណជាង១.០០០ហិកតា ចំណែកផ្លូវលំនិងទំនប់ត្រូវបានទឹកហូរដាច់ដែលប្រឈមការប៉ះពាល់ចំនួន៤ភូមិ ស្ថិតក្នុងឃុំស្ពានស្រែង ស្រុកភ្នំស្រុក។ លោកមេឃុំស្ពានស្រែងបានប្រាប់ឱ្យដឹងនៅថ្ងៃទី១៩ ខែកញ្ញា ឆ្នាំ២០១៩ កន្លងទៅនេះថា…
ខេត្តបន្ទាយមានជ័យ ៖ ទឹកជំនន់បានជន់លិចស្រូវប្រមាណជាង១.០០០ហិកតា ចំណែកផ្លូវលំនិងទំនប់ត្រូវបានទឹកហូរដាច់ដែលប្រឈមការប៉ះពាល់ចំនួន៤ភូមិ ស្ថិតក្នុងឃុំស្ពានស្រែង ស្រុកភ្នំស្រុក។
លោកមេឃុំស្ពានស្រែងបានប្រាប់ឱ្យដឹងនៅថ្ងៃទី១៩ ខែកញ្ញា ឆ្នាំ២០១៩ កន្លងទៅនេះថា ស្រូវប្រមាណជាង១.០០០ហិកតាត្រូវបានទឹកជន់លិចអស់រយៈពេល៣ទៅ៤ថ្ងៃមកហើយដែលប្រឈមប៉ះពាល់ចំនួន៤ភូមិ ក្នុងនោះរួមមានភូមិស្ពាន, ភូមិគោកចារ, ភូមិកណ្តាល និងភូមិពង្រ ស្ថិតក្នុងឃុំស្ពានស្រែក ស្រុកភ្នំស្រុក ហើយទឹកបានហូរដាច់ផ្លូវនិងខ្នងទំនប់ផងដែរ។
លោកមេឃុំបានបញ្ជាក់ថា ទឹកជំនន់ដែលជន់លិចស្រូវប្រជាកសិករនេះគឺទឹកហូរធ្លាក់ពីស្រុកអន្លង់វែង ខេត្តឧត្តរមានជ័យ បណ្តាលឱ្យលិចស្រូវស្រាលនិងស្រូវធ្ងន់៣ទៅ៤ថ្ងៃមកហើយ បើសិនជាទឹកមិនស្រកនោះទេ រយៈពេល៧ទៅ១០ថ្ងៃទៀត ស្រូវដែលលិចទឹកអាចរលួយខូចបាន។
លោក យឹម សំណាង អភិបាលស្រុកភ្នំស្រុកបានបញ្ជាក់ថា នៅឃុំស្ពានស្រែងនេះគឺប្រឈមទឹកជំនន់ហូរធ្លាក់ពីស្រុកអន្លង់វែង ខេត្តឧត្តរមានជ័យ ហើយជាក់ស្តែងនៅឃុំស្ពានស្រែង ពេលនេះទឹកកំពុងជន់លិចស្រូវប្រមាណជាង១.០០០ហិកតា ។
លោកបានបញ្ជាក់ថា ស្រុកភ្នំស្រុក ឆ្នាំនេះគឺជួបគ្រោះមហន្តរាយនៅដើមឆ្នាំ ប្រជាកសិករធ្វើស្រែដើមរដូវបណ្តាលឱ្យជួបគ្រោះរាំងស្ងួតរងការខូចខាតស្រូវអស់ជាច្រើនហិកតា លុះនៅរដូវវស្សាជួបគ្រោះទឹកជំនន់ បណ្តាលឱ្យជន់លិចស្រូវប្រជាកសិករ ហើយទឹកហូរដាច់ផ្លូវនិងខ្នងទំនប់ជាច្រើនកន្លែង៕ (កែសម្រួលដោយ ៖ ធីតា)
ចែករំលែកព័តមាននេះ