សកម្មភាពសាមញ្ញៗដែលបុគ្គលជោគជ័យធ្វើនៅថ្ងៃអាទិត្យ
ថ្ងៃអាទិត្យជាថ្ងៃឈប់សម្រាក ហើយក៏ជាឱកាសមួយក្នុងការលើកកម្ពស់ភាពជោគជ័យ និងបង្កើនប្រសិទ្ធិភាពការងារដែរ ។ លោក Scott Mautz ដែលជាអ្នកនិយាយសាធារណៈ និងអ្នកនិពន្ធសៀវភៅ Find…
ថ្ងៃអាទិត្យជាថ្ងៃឈប់សម្រាក ហើយក៏ជាឱកាសមួយក្នុងការលើកកម្ពស់ភាពជោគជ័យ និងបង្កើនប្រសិទ្ធិភាពការងារដែរ ។ លោក Scott Mautz ដែលជាអ្នកនិយាយសាធារណៈ និងអ្នកនិពន្ធសៀវភៅ Find the Fire និងMake It Better បានសម្ភាសនាយកប្រតិបត្តិជាច្រើនរូប និងបានជជែកគ្នាពីសកម្មភាពដែលពួកគេតែងតែធ្វើនៅថ្ងៃអាទិត្យ ។ ខាងក្រោមនេះ គឺជាសកម្មភាពសាមញ្ញៗដែលបុគ្គលខាងលើធ្វើដែលជួយឲ្យពួកគេជោគជ័យ ៖
១. ចំណាយពេលសម្រាប់ខ្លួនឯង និងក្រុមគ្រួសារ ៖ បុគ្គលជោគជ័យតែងតែលះបង់ពេលវេលា និងកម្លាំងកាយស្ទើរតែរាល់ថ្ងៃធ្វើការទៅហើយទៅលើការងារ ឬអាជីវកម្មរបស់ខ្លួន ។ ដូច្នេះថ្ងៃអាទិត្យគឺជាថ្ងៃដែលពួកគេទុកសម្រាប់ខ្លួនឯង ក្រុមគ្រួសារ ឬសាសនាវិញ ។ វាក៏ជាពេលមួយសម្រាប់ឲ្យពួកគេប្រមូលកម្លាំងកាយសម្រាប់សប្តាហ៍ថ្មីដែរ ។
២. ស្រមើស្រមៃថា សប្តាហ៍ក្រោយនឹងមានភាពច្របូកច្របល់ ៖ នាយកប្រតិបត្តិមួយរូបបានចែករំលែកថា នៅយប់ថ្ងៃអាទិត្យលោកតែងតែស្រមើស្រមៃថា សប្តាហ៍ខាងមុខនឹងមានភាពច្របូកច្របល់ និងស្មុគស្មាញមិនថា លោកមានផែនការច្បាស់លាស់ហើយឬនៅទេ? ។ បន្ទាប់ពីស្រមើស្រមៃហើយលោកព្យាយាមរៀបចំផែនការប្រចាំសប្តាហ៍របស់លោកឡើងវិញដោយគិតពីកិច្ចការធំមួយដែលលោកដាច់ខាតត្រូវតែសម្រេចក្នុងសប្តាហ៍ថ្មីនោះ ។
៣. ទុកពេលសម្រាប់គិតឡើងវិញ ៖ មនុស្សជាច្រើនចាត់ទុកថ្ងៃអាទិត្យជាថ្ងៃសម្រាក ឬមិនធ្វើអ្វីទាំងស្រុង ។ ប៉ុន្តែបុគ្គលដែលជោគជ័យមិនដែលមានថ្ងៃដែលពួកគេមិនធ្វើអ្វីទាំងស្រុងឡើយ ។ យ៉ាងហោចណាស់ក៏ពួកគេតែងតែគិតដែរ ។ ថ្ងៃអាទិត្យអាចជាពេលមួយល្អក្នុងការគិតឡើងវិញពីអ្វីដែលអ្នកបានធ្វើនៅសប្តាហ៍ដែលកំពុងតែកន្លងទៅ តើសប្តាហ៍ខាងមុខនឹងមានរឿងសំខាន់ៗអ្វីខ្លះ និងគិតពីជីវិតរបស់អ្នកជាដើម ។
៤. រំឮកគុណ៖ បុគ្គលដែលជោគជ័យមិនភ្លេចឡើយពីមូលហេតុ និងមនុស្សដែលបានជួយឲ្យពួកគេមកដល់កន្លែងដែលខ្លួនឈរសព្វថ្ងៃ ។ ដោយហេតុដូចនេះ ថ្ងៃអាទិត្យជាថ្ងៃដែលពួកគេរំឮកគុណទាំងនេះទាំងក្នុងចិត្ត ឬចេញជាសកម្មភាពជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ