ខេត្តពោធិ៍សាត់ ៖ ផ្ទះចំនួន៣ខ្នងនៅភូមិក្រូចឆ្មារ ឃុំលាច ស្រុកភ្នំក្រវាញ ត្រូវអគ្គិភ័យលេបត្របាក់បន្សល់ទុកតែផេះផង់ កាលពីវេលាម៉ោង៣និង៣០នាទីរសៀល ថ្ងៃទី២៧ មីនា ដែលជំហានដំបូងសមត្ថកិច្ចធ្វើការសន្និដ្ឋានថា បណ្តាលមកពីទុស្សេចរន្តភ្លើង ខណៈពេលម្ចាស់ផ្ទះទីមួយមិននៅ រវល់ទៅធ្វើម្ហូបការឱ្យគេនៅឯចុងភូមិ ។
ខេត្តពោធិ៍សាត់ ៖ ផ្ទះចំនួន៣ខ្នងនៅភូមិក្រូចឆ្មារ ឃុំលាច ស្រុកភ្នំក្រវាញ ត្រូវអគ្គិភ័យលេបត្របាក់បន្សល់ទុកតែផេះផង់ កាលពីវេលាម៉ោង៣និង៣០នាទីរសៀល ថ្ងៃទី២៧ មីនា ដែលជំហានដំបូងសមត្ថកិច្ចធ្វើការសន្និដ្ឋានថា បណ្តាលមកពីទុស្សេចរន្តភ្លើង ខណៈពេលម្ចាស់ផ្ទះទីមួយមិននៅ រវល់ទៅធ្វើម្ហូបការឱ្យគេនៅឯចុងភូមិ ។
លោកវរសេនីយ៍ត្រី វង សាវេត អធិការនគរបាលស្រុកភ្នំក្រវាញ ឱ្យដឹងថា ផ្ទះទីមួយធ្វើអំពីថ្មក្រោមឈើលើ(នៅកណ្តាលគេ) ក្រាលក្តារ ជញ្ជាំងក្តារ ប្រក់ក្បឿង ម្ចាស់ផ្ទះឈ្មោះ សយ ហាង ហៅគក់ ជាចុងភៅធ្វើម្ហូបការ ។ ផ្ទះទីពីរ ថ្មក្រោមឈើលើដូចគ្នា (នៅខាងត្បូង) ក្រាលក្តារ ជញ្ជាំងក្តារ ប្រក់ក្បឿង ម្ចាស់ផ្ទះឈ្មោះ ព្រំ ឆោមវិបុល ជាមន្ត្រីនគរបាលខេត្តពោធិ៍សាត់ និងផ្ទះទី៣ (នៅខាងជើង) ធ្វើអំពីឈើ ប្រក់ស័ង្កសី ម្ចាស់ផ្ទះឈ្មោះ យ៉ែម មុន្នី ជាប្រជាពលរដ្ឋរស់នៅក្នុងភូមិក្រូចឆ្មារ ។
បើតាមការស្រាវជ្រាវ គឺអគ្គិភ័យបានចាប់ផ្តើមឆេះចេញពីផ្ទះឈ្មោះសយ ហាង ហៅគក់ ដែលនៅកណ្តាលមុនគេ ខណៈពេលម្ចាស់ផ្ទះមិននៅរវល់ទៅធ្វើចុងភៅម្ហូបការឱ្យគេនៅឯចុងភូមិ ។ បន្ទាប់មកទើបរាលដាលទៅឆេះផ្ទះពីរខាងសងទៀត ។ ដំបូងគេឃើញអណ្តាតភ្លើងចេញពីក្នុងផ្ទះ(ផ្ទះកណ្តាល)មុនគេ ពេលនោះអ្នកជិតខាង បាននាំគ្នាដងទឹកពាងពន្លត់និងបានរាយការណ៍មកសមត្ថកិច្ច ប៉ុន្តែទំរាំរថយន្តដឹកទឹករបស់ស្នងការដ្ឋាននគរបាលខេត្តមកដល់ ដែលមានចម្ងាយ៣០គីទ្បូម៉ែត្រនោះ អគ្គិភ័យបានរាលដាលឆេះដល់ផ្ទះពីរសងខាងទៀតអស់ទាំងស្រុងតែម្តង ។ ក្នុងហេតុការណ៍នេះ យើងបានប្រើរថយន្តពន្លត់អគ្គិភ័យចំនួនពីរគ្រឿងនិងទឹកអស់៦ស៊ីទែន ព្រមទាំងមានរថយន្តដឹកទឹកលក់ឯកជនមួយចំនួនទៀត ។
បើសិនបើពុំមានរថយន្តពន្លត់អគ្គិភ័យរបស់ស្នងការដ្ឋាននគរបាលខេត្តមកជួយអន្តរាគមន៍ទេ ម៉្លេះអគ្គិភ័យនឹងរាលដាលឆេះផ្ទះប្រជាពលរដ្ឋដែលនៅជាប់ៗគ្នានោះ មិនដឹងជាអស់ប៉ុន្មានខ្នងទៀតទេ ។ យើងមិនទាន់ដឹងពីមូលហេតុពិតប្រាកដទេ ប៉ុន្តែជំហានដំបូងត្រូវបានសន្និដា្ឋនថា អាចបណ្តាលមកពីទុស្សេខ្សែភ្លើង ។ ចំណែកការខូចខាតវិញ ផ្ទះចុងភៅការដែលឆេះមុនគេមិនបានយកអ្វីចេញទ្បើយ គឺឆេះអស់ទាំងទ្រព្យសម្បត្តិតែម្តង ឯផ្ទះពីរទៀតជញ្ជូនឥវ៉ាន់បានមួយចំនួន និងពុំមានគ្រោះថ្នាក់ដល់មនុស្សទេ ។
ពាក់ព័ន្ធនឹងគ្រោះអគ្គិភ័យនៅស្រុកភ្នំក្រវាញនេះ មិនទាន់ដឹងថា មានដំណោះស្រាយយ៉ាងណានោះទេ ហើយវាជារឿងអចេតនាប៉ុណ្ណោះ ។ គួររំលឹកថា ក្នុងខែមីនា ឆ្នាំ២០១៤នេះ នៅខេត្តពោធិ៍សាត់ មានករណីភ្លើងឆេះផ្ទះប្រមាណ៦លើកមកហើយ ហើយលើកនេះធ្ងន់ធ្ងរជាងគេ ដែលយើងទាំងអស់ត្រូវមានការប្រុងប្រយ័ត្នឱ្យបានជាប់ជាប្រចាំ ព្រោះរដូវនេះជារដូវរាំងស្ងួត ៕
ចែករំលែកព័តមាននេះ