រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានផ្តល់អនុសាសន៍សំខាន់ៗចំនួន១០ចំណុច ដល់វិស័យកសិកម្មនៅកម្ពុជា ក្នុងនោះសម្តេចតេជោបានជំរុញឱ្យក្រសួងកសិកម្មត្រូវលើកកម្ពស់ និងជំរុញការចិញ្ចឹមសត្វ តាមគ្រប់រូបភាពឱ្យមានការអភិវឌ្ឍ និងប្រសិទ្ធភាពសេដ្ឋកិច្ចសម្រាប់ផ្គត់ផ្គង់តម្រូវការក្នុងស្រុក និងការនាំចេញ ដោយគិតគូរខ្ពស់ដល់សុវត្ថិភាពចំណីអាហារសត្វ និងកិច្ចដំណើរការទីផ្សារកសិផល ។ ក្នុងនោះត្រូវមានផែនការយុទ្ធសាស្ត្រស្តីពីផលិតផលសត្វឱ្យបានសមស្របទៅតាមស្ថានភាពជាក់ស្តែងទាំងការចិញ្ចឹមជាលក្ខណៈគ្រួសារ លក្ខណៈឧស្សាហកម្ម និងបន្តជំរុញច្បាប់ស្តីពីសុខភាព និងផលិតកម្មសត្វឱ្យបានឆាប់ ដើម្បីគាំទ្រផលិតកម្មសត្វក្នុងស្រុកមានការអភិវឌ្ឍខ្លាំងឡើង ។ លើសពីនេះ ត្រូវរៀបចំរចនាសម្ព័ន្ធអង្គភាពផលិតកម្ម និងបសុព្យាបាលឱ្យបានសមស្រប ដើម្បីគ្រប់គ្រងវិស័យនេះ ឱ្យមានប្រសិទ្ធភាពខ្ពស់ ។
សម្តេចនាយករដ្ឋមន្ត្រី ហ៊ុន សែន ជំរុញបែបនេះ បានធ្វើឡើងនៅព្រឹកថ្ងៃទី២៨ មីនា ២០១៤ ក្នុងឱកាសដែលសម្តេចបានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីបិទសន្និបាតបូកសរុបការងារកសិកម្ម រុក្ខាប្រមាញ់ និងនេសាទឆ្នាំ២០១៣-២០១៤ និងទិសដៅការងារសម្រាប់ឆ្នាំ២០១៤-២០១៥ នៅសាលសន្និសីទចតុមុខ ៕
ចែករំលែកព័តមាននេះ