រាជធានីភ្នំពេញ ៖ ប្រជាពលរដ្ឋមកពីសហគមន៍ផ្សេងៗដែលជាក្រុមអ្នកតវ៉ាពីបញ្ហាដីធ្លី ក្នុងនោះមានសហគមន៍បុរីកីឡា បឹងកក់ និងថ្មគោល សរុបប្រមាណ៨០នាក់បានប្រមូលផ្តុំគ្នានៅមុខទីស្នាក់ការសហភាពអឺរុ៉បប្រចាំនៅកម្ពុជា ដែលមានទីតាំងនៅភូមិគ្រឹះលេខ១០០អា មហាវិថីព្រះនរោត្តម ស្ថិតក្នុងសង្កាត់ចតុមុខ ខណ្ឌដូនពេញ
រាជធានីភ្នំពេញ ៖ ប្រជាពលរដ្ឋមកពីសហគមន៍ផ្សេងៗដែលជាក្រុមអ្នកតវ៉ាពីបញ្ហាដីធ្លី ក្នុងនោះមានសហគមន៍បុរីកីឡា បឹងកក់ និងថ្មគោល សរុបប្រមាណ៨០នាក់បានប្រមូលផ្តុំគ្នានៅមុខទីស្នាក់ការសហភាពអឺរុ៉បប្រចាំនៅកម្ពុជា ដែលមានទីតាំងនៅភូមិគ្រឹះលេខ១០០អា មហាវិថីព្រះនរោត្តម ស្ថិតក្នុងសង្កាត់ចតុមុខ ខណ្ឌដូនពេញ កាលពីព្រឹកថ្ងៃទី២៧ មីនា ដើម្បីសុំជួយអន្តរាគមន៍ដោះស្រាយបញ្ហាមួយចំនួនដែលពួកគាត់កំពុងជួបប្រទះ ជាពិសេសទាក់ទងទៅនឹងបញ្ហាដីធ្លីដ៏រ៉ាំរ៉ៃ ផ្ទះសម្បែង និងការរស់នៅប្រចាំថ្ងៃ ។
ញត្តិរបស់សហគមន៍បឹងកក់បានទទូចសុំឱ្យលោក Werner Langen ប្រធានក្រុមសមាជិកសភាសហគមន៍អឺរុ៉បឱ្យជួយអន្តរាគមន៍ទៅរាជរដ្ឋាភិបាលកម្ពុជា ឱ្យដោះស្រាយបញ្ចប់ជម្លោះដីធ្លីដ៏រ៉ាំរ៉ៃនៅតំបន់បឹងកក់ជាបន្ទាន់ បន្ទាប់ពីសាលារាជធានីភ្នំពេញផ្តល់ប្លង់កម្មសិទ្ធិនៅថ្ងៃទី៣ មីនា កន្លងទៅបានតែចំនួន៨គ្រួសារក្នុងចំណោម៤៨គ្រួសារ ។ ដោយឡែក សហគមន៍បុរីកីឡា ក៏បានដាក់ញត្តិដល់សហគមន៍អឺរុ៉បសុំឱ្យអន្តរាគមន៍ចំពោះស្ថាប័នចូលដៃជើងជាមួយក្រុមហ៊ុនផាន អុីមុិច ងាកមកដោះស្រាយបញ្ហាដីធ្លីនៅសហគមន៍បុរីកីឡា ការរំលោភសិទ្ធិមនុស្សដ៏ធ្ងន់ធ្ងរ និងសូមឱ្យជួយដាក់ការគាបសង្កត់ដើម្បីដោះលែងសកម្មជនសិទ្ធិមនុស្ស និងកម្មករ២១នាក់ដែលជាប់ឃុំនៅត្រពាំងផ្លុង ។ ជាមួយគ្នានោះ សហគមន៍ថ្មគោលវិញ ក៏បានដាក់ញត្តិឱ្យសហភាពអឺរុ៉បដោះស្រាយបញ្ហាដីធ្លីជូនពួកគេផងដែរ ។
មន្ត្រីសាលាខណ្ឌដូនពេញដែលតាមដានសភាពការណ៍ខាងលើឱ្យដឹងថា នៅវេលាម៉ោង៩ព្រឹកនាថ្ងៃដដែល តំណាងសភាអឺរុ៉បប្រចាំនៅកម្ពុជា បានចេញមកទទួលយកញត្តិពីសហគមន៍ទាំងបី ក៏បុ៉ន្តែមិនបានអះអាងថា នឹងត្រូវដោះស្រាយនៅពេលណានោះទេ ហើយប្រជាពលរដ្ឋសហគមន៍ទាំងនោះបាននាំគ្នារំសាយក្រោមការ ឃ្លាំមើលពីកម្លាំងសមត្ថកិច្ច និងមិនមានការរារាំងពីអាជ្ញាធរឡើយ បើទោះបីជាពួកគេធ្វើនេះមិនមានការអនុញ្ញាតពីសាលារាជធានីភ្នំពេញក៏ដោយ ។ ដោយឡែក កាលពីព្រឹកថ្ងៃទី២៦ មីនា សហគមន៍អ្នកតវ៉ានៅថ្មគោល និងបុរីកីឡា ក៏បាននាំគ្នាដាក់ពាក្យបណ្តឹងនៅនគរបាលបុ៉ស្តិ៍រដ្ឋបាលសង្កាត់ស្រះចក ដើម្បីឱ្យសមត្ថកិច្ចជំនាញស្វែងរកខ្មាន់កាំភ្លើងដែលបាញ់មកលើរថយន្តក្រុងដែលពួកគេជិះកាលពីយប់ថ្ងៃទី២២ មីនា នៅមុខមណ្ឌលសុខភាពដូនពេញ ផ្លូវជាតិលេខ៥ សង្កាត់ស្រះចក ខណ្ឌដូនពេញ ។
ក៏បុ៉ន្តែក្នុងហេតុការណ៍នោះមិនមានមនុស្សណាម្នាក់មានគ្រោះថ្នាក់នោះទេ ហើយសមត្ថកិច្ចក៏បានធ្វើការសន្និដ្ឋានថា មូលហេតុដែលឈានដល់ការផ្ទុះអាវុធបាញ់រថយន្តក្រុងដែលមានសកម្មជនដីធ្លីជិះចូលក្នុងរាជធានីភ្នំពេញនោះ ដោយសារតែបញ្ហាគ្រោះថ្នាក់ចរាចរណ៍ ។ បុ៉ន្តែទោះជាយ៉ាងណាក៏ដោយ ក៏សមត្ថកិច្ចបានធ្វើការស្រាវជ្រាវជុំវិញករណីនេះដែរ ៕
ចែករំលែកព័តមាននេះ