រាជធានីភ្នំពេញ ៖ បុរសម្នាក់ មានប្រពន្ធនិងកូនដូចគេឯងដែរប៉ុន្តែប្រពន្ធកូនទៅធ្វើការនៅម្ដុំទួលសង្កែមិនសូវបានត្រឡប់មកមើលបុរសនេះទេ ដោយទុកឱ្យគាត់នៅផ្ទះតែម្នាក់ឯង ពេលឈឺពេលជាមានទុក្ខធុរៈក៏គ្មាននរណាដឹងលុះចុងក្រោយនេះ ស្រាប់តែបាត់គាត់មិនឃើញចេញដើរ២ទៅ៣ថ្ងៃមកហើយមិនដឹងទៅណា ។
រាជធានីភ្នំពេញ ៖ បុរសម្នាក់ មានប្រពន្ធនិងកូនដូចគេឯងដែរប៉ុន្តែប្រពន្ធកូនទៅធ្វើការនៅម្ដុំទួលសង្កែមិនសូវបានត្រឡប់មកមើលបុរសនេះទេ ដោយទុកឱ្យគាត់នៅផ្ទះតែម្នាក់ឯង ពេលឈឺពេលជាមានទុក្ខធុរៈក៏គ្មាននរណាដឹងលុះចុងក្រោយនេះ ស្រាប់តែបាត់គាត់មិនឃើញចេញដើរ២ទៅ៣ថ្ងៃមកហើយមិនដឹងទៅណា ។
ក្រោយមក ក៏មានធុំក្លិនស្អុយយ៉ាងអសោចិ៍ចេញពីក្នុងផ្ទះរបស់គាត់ ទើបធ្វើឱ្យមានការសង្ស័យដល់អ្នកជិតខាងនាំគ្នាដើររកមើលក៏ប្រទះឃើញគាត់ដេកស្លាប់នៅក្បែរបន្ទប់ទឹកក្នុងផ្ទះដែលមានបិទទ្វារខ្ទាស់គន្លឹះពីខាងក្នុងយ៉ាងជិត និងបង្កឱ្យមានការភ្ញាក់ផ្អើលឡើង ។ ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង៥និង៣០នាទីល្ងាចថ្ងៃទី២៦ មីនា នៅផ្ទះលេខ២៦១ ស្ថិតក្នុងបុរីសន្តិភាព២ ភូមិដំណាក់ត្រយឹង សង្កាត់ចោមចៅ ខណ្ឌពោធិ៍សែនជ័យ ។ បុរសដែលស្លាប់នេះត្រូវបានគេស្គាល់ថាឈ្មោះ ស៊ឹម លឹម អាយុ ៤៥ឆ្នាំ ប្រពន្ធឈ្មោះ ឡាយ ណាវី និងមានកូន៣នាក់នៅក្នុងបន្ទុក ។ ប៉ុន្តែគាត់រស់នៅក្នុងផ្ទះនោះតែម្នាក់ឯងទេ ព្រោះប្រពន្ធនិងកូនមិននៅជាមួយ ពួកគេបានទៅស្នាក់នៅធ្វើការឯរោងចក្រនៅម្ដុំផ្សារទួលសង្កែ ហើយរយៈពេល១ឬ២អាទិត្យទើបមកផ្ទះម្ដង ដូច្នេះហើយ នៅពេលគាត់ស្លាប់មិនមាននរណាម្នាក់បានដឹងឡើយ ។
ប្រភពព័ត៌មានពីប្រជាពលរដ្ឋឱ្យដឹងថា មុនពេលមានការភ្ញាក់ផ្អើល ប្រជាពលរដ្ឋដែលមានលំនៅឋានក្បែរនោះធុំក្លិនស្អុយចម្លែកចេញពីក្នុងផ្ទះបុរសនោះដែលបិទទ្វារជិត និងខ្ទាស់គន្លឹះពីខាងក្នុងផង ដែលក្លិនស្អុយនេះធ្វើឱ្យពួកគាត់ទ្រាំមិនបាន ។ ពេលនោះគេបានដើរជុំវិញផ្ទះរបស់បុរសនោះនិងបានអើតមើលតាមប្រហោងជញ្ជាំងពីខាងក្រោយ ស្រាប់តែមានរឿងគួរឱ្យភ្ញាក់ផ្អើលមួយកើតឡើង ដោយគេឃើញបុរសនោះដេកស្លាប់អាក្រាតកាយនៅក្នុងផ្ទះក្បែរបន្ទប់ទឹក និងមានសភាពហើមស្អុយទៅហើយ ។ គេមិនដឹងថា បុរសនេះស្លាប់តាំងពីពេលណាទេ ប៉ុន្តែតាមការសន្និដ្ឋានសង្ស័យថាគាត់បានស្លាប់រយៈពេល២ទៅ៣ថ្ងៃមកហើយ ព្រោះក្នុងរយៈពេលនេះគេមិនដែលឃើញគាត់ចេញក្រៅផ្ទះដូចរាល់ដងឡើយ ។ ប្រភពដដែលបានបន្តថា បុរសនេះនៅផ្ទះតែម្នាក់ឯងមិនមានលុយចាយវាយទេ ហើយកាលពីថ្ងៃអាទិត្យទី២៣ មីនា កន្លងទៅដោយសារអត់មានលុយទិញម្ហូប គាត់ដាច់ចិត្តសុំលុយអ្នកជិតខាង ។ ដោយមានការអាណិតអាសូរបុរសនោះខ្លាំងពេក គេបានឱ្យប្រាក់ទៅគាត់ចំនួន៥ពាន់រៀល ហើយគាត់បាននិយាយត្អូញត្អែរប្រាប់អ្នកជិតខាងថា គាត់មិនស្រួលខ្លួនទេ ចេះតែចុកពោះរាកមិនបាត់ទាល់សោះ ប៉ុន្ដែពេលនោះមិនមាននរណាម្នាក់ចាប់អារម្មណ៍ទេ ហើយចាប់តាំងពីពេលនោះមក ស្រាប់តែបាត់គាត់រហូតមិនដឹងទៅណា ។
លុះដល់ល្ងាចថ្ងៃទី២៦ មីនា ក៏ប្រទះឃើញសពទើបគេទូរស័ព្ទប្រាប់ប្រពន្ធកូនឱ្យដឹង បន្ទាប់មក បាននាំគ្នាគាស់ទ្វារផ្ទះដែលជាប់សោពីខាងក្នុងចូលទៅមើលឃើញសពអាក្រាតកាយ។ ក្រោយពេលកើតហេតុ នគរបាលមូលដ្ឋានបានចុះទៅដល់និងកសាងសំណុំរឿង ពិនិត្យមើលជុំវិញកន្លែងកើតហេតុនិងសន្និដ្ឋានថា ប្រហែលជាជនរងគ្រោះមិនស្រួលខ្លួនខ្យល់ចាប់បណ្ដាលឱ្យដួលសន្លប់ ហើយដោយសារអត់មានអ្នកនៅជាមួយជួយសង្គ្រោះទើបបណ្ដាលឱ្យស្លាប់ ៕
ចែករំលែកព័តមាននេះ