ខេត្តបាត់ដំបង៖ សេចក្ដីរាយការណ៍បានឲ្យដឹងថា បុរសម្នាក់បានស្លាប់ រីឯម្នាក់ទៀតរងរបួសធ្ងន់ នៅក្នុងឧប្បត្តិហេតុគ្រោះថ្នាក់ចរាចរណ៍ដ៏រន្ធត់មួយរវាងរថយន្តបុកជាមួយរថយន្ត នៅវេលាម៉ោង៧យប់ថ្ងៃទី១៧ កញ្ញា នៅចំណុចភូមិកំពង់ចម្លងលើ ឃុំតាក្រី ស្រុកកំរៀង ដែលបណ្ដាលមកពីការធ្វេសប្រហែស ។
របាយការណ៍សមត្ថកិច្ចបានឲ្យដឹងថា ជនរងគ្រោះឈ្មោះសេង ប៊ុនថា ភេទប្រុស អាយុ៤០ឆ្នាំ នៅភូមិកំប្រង់ ឃុំតាក្រី ស្រុកកំរៀង (តៃកុង)របួសធ្ងន់ និងម្នាក់ទៀតឈ្មោះធឹម ថានិត ភេទប្រុស អាយុ២៨ឆ្នាំ រួមដំណើរ និងរស់នៅក្បែរគ្នា (ស្លាប់ក្នុងរថយន្ត)។ ជនរងគ្រោះជិះរថយន្តកាមេរីកែច្នៃពាក់ស្លាកលេខញ-២៨១៧ ភ.ព ២។ រីឯរថយន្តម្ខាងទៀតម៉ាកសាំយ៉ុង១៥កៅអី ពណ៌ស ពាក់ផ្លាកលេខ ភ្នំពេញ 2AY-207 អ្នកបើកបររត់គេចខ្លួនក្រោយកើតហេតុ។
សមត្ថកិច្ចបាននិយាយថា រថយន្តទាំង២នេះធ្វើដំណើរក្នុងគោលដៅផ្ទុយគ្នា ហើយដល់ចំណុចខាងលើ ស្រាប់អ្នកបើករថយន្តកាមរីបានរ៉េចង្កូតឆ្លងទ្រូងផ្លូវជ្រុលទៅបុករថយន្តសាំយ៉ុងពេញទំហឹង បណ្ដាលឲ្យភាគីខាងរថយន្តកាមរីស្លាប់និងរបួសតែម្ដង។
សមត្ថកិច្ចបានបញ្ជាក់ថា ឧប្បត្តិហេតុនេះ បានកើតឡើងដោយសារអ្នកបើកបរខ្វះការប្រុងប្រយ័ត្ន ទើបនាំឲ្យមានគ្រោះថ្នាក់បែបនេះ ។ ទោះយ៉ាងណាពេលនេះ មន្ត្រីជំនាញបាននាំយករថយន្តទាំង២គ្រឿង ទៅរក្សាទុកនៅអធិការដ្ឋាននគរបាលស្រុកកំរៀងហើយ ដើម្បីដោះស្រាយតាមនីតិវិធី ។ (សម្រួលដោយ៖ ស្រីណា)
ចែករំលែកព័តមាននេះ