រាជធានីភ្នំពេញ ៖ ក្នុងឱកាសចូលជួបពិភាក្សាការងារជាមួយលោកឧបនាយករដ្ឋមន្ត្រីបណ្ឌិតសភាចារ្យ សុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី កាលពីថ្ងៃទី២៦ មីនា ឆ្នាំ២០១៤ នៅទីស្ដីការគណៈរដ្ឋមន្ដ្រី គណៈប្រតិភូសភាអឺរ៉ុបទទួលបន្ទុកទំនាក់ទំនងជាមួយអាស៊ីអាគ្នេយ៍និងអាស៊ាន បានស្នើសុំឱ្យគណបក្សនយោបាយទាំងពីរគឺគណបក្សប្រជាជនកម្ពុជានិងគណបក្សសង្គ្រោះជាតិបន្តចូលតុចរចាដើម្បីពិភាក្សាដោះស្រាយបញ្ហាដោយសន្តិវិធី ។
ឆ្លើយតបចំពោះការស្នើសុំនោះ លោកបណ្ឌិតសភាចារ្យ សុខ អាន បានបញ្ជាក់ថា ការចរចានិងបង្រួបបង្រួមរវាងខ្មែរនិងខ្មែរមានសារសំខាន់ណាស់ដើម្បីឆ្ពោះទៅរកស្ថិរភាពនិងសន្តិភាពដែលគ្រប់ភាគីនយោបាយនៅកម្ពុជាធ្លាប់ធ្វើកន្លងមក ហើយការចរចាក៏ជាសុច្ឆន្ទៈរបស់គណបក្សប្រជាជនកម្ពុជាដែរ ។ ទោះជាយ៉ាងណាក៏ដោយ លោកឧបនាយករដ្ឋមន្ត្រីបានលើកឡើងថា រៀងរាល់ការបោះឆ្នោត ឬក្រោយការបោះឆ្នោតម្តងៗ កម្ពុជាតែងតែជួបបញ្ហារហូត ហើយអ្វីដែលនាំឱ្យមានបញ្ហានោះគឺគណបក្សប្រឆាំងតែងតែចោទប្រកាន់ទៅលើគណៈកម្មាធិការជាតិរៀបចំការបោះឆ្នោត (គ.ជ.ប) និងរាជរដ្ឋាភិបាលដោយចោទថា ការបោះឆ្នោតមិនត្រឹមត្រូវ មានការបន្លំសន្លឹកឆ្នោតជាដើម ។
ប៉ុន្តែបើយើងសង្កេតទៅលើទិដ្ឋភាពទូទៅក្នុងការបោះឆ្នោត សំខាន់ក្នុងការិយាល័យបោះឆ្នោតនីមួយៗសុទ្ធតែមានអ្នកសង្កេតការណ៍ជាតិ-អន្តរជាតិ ពិសេសអ្នកសង្កេតការណ៍របស់គណបក្សនយោបាយដែលចូលរួមការបោះឆ្នោត ដោយពួកគេតាមដានយ៉ាងដិតដល់ចាប់តាំងពីពេលដំណើរការបោះឆ្នោតរហូតរាប់សន្លឹកឆ្នោត។ ចំណែកក្នុងអំឡុងពេលឃោសនាបោះឆ្នោតវិញ គឺគណបក្សនីមួយៗមានសិទ្ធិគ្រប់គ្រាន់ក្នុងការឃោសនារកសំឡេងឆ្នោតដូចមានចែងក្នុងច្បាប់ ហើយប្រព័ន្ធផ្សព្វផ្សាយទៀតសោតក៏មានសមាមាត្រប្រហាក់ប្រហែលគ្នា ខណៈដែលគ្រប់ប្រព័ន្ធផ្សព្វផ្សាយជាតិ-អន្តរជាតិមានសិទ្ធិសេរីភាពគ្រប់គ្រាន់ក្នុងការផ្សព្វផ្សាយ ។
ទាក់ទងនឹងការធ្វើបាតុកម្មដឹកនាំដោយគណបក្សសង្គ្រោះជាតិ លោកឧបនាយករដ្ឋមន្ត្រី សុខ អាន បានបញ្ជាក់ថា ចាប់តាំងពីមានការប្រមូលផ្ដុំធ្វើបាតុកម្ម គឺរាជរដ្ឋាភិបាលបានអត់ធ្មត់ជាអតិបរមា ទោះជាបាតុកម្មនោះធ្វើជារៀងរាល់ថ្ងៃធ្វើលើសពីការស្នើសុំក៏ដោយចុះ ។ ប៉ុន្តែមូលហេតុដែលធ្វើឱ្យមានការបង្ក្រាបនាពេលកន្លងមកនោះ ក៏ព្រោះតែពួកគេបានប្រែក្លាយពីការធ្វើបាតុកម្មទាមទាររកយុត្តិធម៌ក្នុងការបោះឆ្នោតទៅជាកុបកម្មប្រព្រឹត្ដអំពើហិង្សាបំផ្លិចបំផ្លាញទ្រព្យសម្បត្តិសាធារណៈនិងឯកជន និងគំរាមកំហែងកម្មករ-កម្មការិនីរហូតឈានដល់ការប្រកាសផ្តួលរំលំរាជរដ្ឋាភិបាលថែមទៀត ។ ទន្ទឹមនោះ ក្រុមវិនិយោគិនដែលមករកស៊ីនៅកម្ពុជា ក៏មានការភ័យខ្លាចអំពីសុវត្ថិភាពនិងការខាតបង់ទ្រព្យសម្បត្តិដែលត្រូវបំផ្លាញដោយក្រុមបាតុករដែរ ដូច្នេះហើយទើបពួកគេស្នើសុំឱ្យរាជរដ្ឋាភិបាលមានវិធានការការពារជាបន្ទាន់ បើមិនដូច្នេះទេ ក្រុមអ្នកវិនិយោគនឹងចេញទៅរកស៊ីនៅប្រទេសផ្សេងទៀត ។
យោងតាមមន្ត្រីទីស្តីការគណៈរដ្ឋមន្ត្រីបានឱ្យដឹងថា គណៈប្រតិភូសភាអឺរ៉ុបដឹកនាំដោយលោក LANGEN Werner ដែលភាគច្រើននៃប្រតិភូសុទ្ធតែធ្លាប់មកបំពេញទស្សនកិច្ចការងារនៅកម្ពុជានាពេលកន្លងទៅនេះ បានសម្តែងនូវការកោតសរសើរយ៉ាងខ្លាំងចំពោះការអភិវឌ្ឍ នៅកម្ពុជា សំខាន់ផ្នែកនយោបាយនិងលទ្ធិប្រជាធិបតេយ្យ សេដ្ឋកិច្ច ពាណិជ្ជកម្ម និងជីវភាពរស់នៅរបស់ប្រជាពលរដ្ឋ បើប្រៀបធៀបកាលពីប៉ុន្មានឆ្នាំមុន ។ ផ្តើមពីនោះ ក្រុមប្រតិភូសភាអឺរ៉ុបបានស្នើសុំឱ្យភាគីគណបក្សនយោបាយដែលជាប់ឆ្នោតទាំងពីរបន្តចូលតុចរចាដោះស្រាយបញ្ហាដែលនៅសេសសល់ ដើម្បីរក្សាស្ថិរភាពនិងសន្តិភាព រួមទាំងការអភិវឌ្ឍ ៕
ចែករំលែកព័តមាននេះ