ខេត្តពោធិ៍សាត់ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា នៅស្រុកខ្មែរមានអ្នកសន្យាគេចេះតែដើរសន្យាថា តម្លៃកសិផលធ្លាក់ចុះទាបណាស់នៅស្រុកខ្មែរយើង អ្នកសន្យាគេធ្វើបានពីរបែបតែមួយភ្លែតទេ ។ ចំពោះអ្នកដែលមានខ្លួនគង់ដឹងហើយ ។
ខេត្តពោធិ៍សាត់ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា នៅស្រុកខ្មែរមានអ្នកសន្យាគេចេះតែដើរសន្យាថា តម្លៃកសិផលធ្លាក់ចុះទាបណាស់នៅស្រុកខ្មែរយើង អ្នកសន្យាគេធ្វើបានពីរបែបតែមួយភ្លែតទេ ។ ចំពោះអ្នកដែលមានខ្លួនគង់ដឹងហើយ ។
គេឆ្លៀតយកចំណេញមួយភ្លែតពីររឿង គេចូលផ្សារគេសួរអង្ករមួយគីឡូក្រាមថ្លៃប៉ុន្មាន ? ថា១គីឡូក្រាម២ពាន់រៀល ស្រាប់តែអ្នកសន្យាគេថា ថ្លៃណាស់លោកអើយ ងាប់អស់ហើយលោកយាយ លោកតា…ថ្លៃណាស់ បើខ្ញុំកាន់អំណាចវិញ ខ្ញុំធ្វើឱ្យតម្លៃក្នុង១គីឡូក្រាមតែ១ពាន់រៀលទេ បងប្អូន ។
បន្ទាប់មក អ្នកសន្យាបានទៅដល់ស្រែម្តង គេសួរថា មួយគីឡូក្រាមប៉ុន្មានតម្លៃស្រូវ អ្នកលក់ឆ្លើយថា ៨០០រៀល អ្នកសន្យាថា អូយ ! ងាប់ហើយ ថោកយ៉ាងនេះ បើសិនជាខ្ញុំកាន់អំណាចវិញ ខ្ញុំនឹងធ្វើឱ្យស្រូវឡើងថ្លៃក្នុងមួយគីឡូក្រាមតម្លៃ១.៥០០រៀលណា៎…។
សម្តេចតេជោនាយករដ្ឋមន្ត្រី បានមានប្រសាសន៍បែបនេះ កាលពីព្រឹកថ្ងៃទី២៧ មីនា នៅសង្កាត់រលាប ក្រុងពោធិ៍សាត់ ក្នុងឱកាសអញ្ជើញជាអធិបតីភាពក្នុងពិធីសម្ពោធដាក់ឱ្យដំណើរការវារីអគ្គិសនីស្ទឹងអាតៃ និងខ្សែបណ្តាញបញ្ជូនភ្នំពេញ-កំពង់ឆ្នាំង-ពោធិ៍សាត់-បាត់ដំបង ដែលវិនិយោគដោយក្រុមហ៊ុន China Datang Corperation ដែលមានទំហំវិនិយោគសរុបទាំងមូល២៥៥,៣០លានដុល្លារអាមេរិក ។ សម្តេចតេជោនាយករដ្ឋមន្ត្រី មានប្រសាសន៍បន្តថា មួយភ្លែតអ្នកសន្យានេះគេធ្វើបានចំណេញ២រឿង ។ ចំណែកឯរាជរដ្ឋាភិបាលវិញ ខិតខំយ៉ាងខ្លាំង ចង់លៀនអណ្តាតរហូត ។ ខិតខំប្រឹងទាក់ទងអ្នកវិនិយោគមកដើម្បីឱ្យមានអគ្គិសនីឱ្យប្រជាពលរដ្ឋប្រើប្រាស់ គេថា ថ្លៃនោះខ្ពស់ណាស់ ផលប្រយោជន៍បានទៅអ្នកសន្យាឱ្យថ្លៃទាប ។ ចំណែកខាងអ្នកខិតខំចរចាដើម្បីឱ្យគេមកធ្វើការវិនិយោគវិញ ទម្រាំតែអ្នកវិនិយោគជឿទុកចិត្តឱ្យក្រុមហ៊ុនរបស់គេមក មិនមែនជារឿងធម្មតាទេ បែរជាអ្នកមានទោសទៅវិញ ។
អ្នកសន្យាទៅរារាំងគេកុំឱ្យផ្តល់ជំនួយឱ្យកម្ពុជា ចំណែកយើងវិញ សុំឱ្យគេផ្តល់ជំនួយឱ្យកម្ពុជា ។ ម្ខាងទៅសុំកុំឱ្យគេទិញទំនិញពីកម្ពុជា ម្ខាងទៅចរចាឱ្យគេទិញទំនិញពីកម្ពុជា ។ ឥឡូវស្រុកខ្មែរមានតែពីររឿង កុំចាំបាច់ប្រៀបធៀបឱ្យច្រើនទេ ។ មួយថាកុំមកស្រុកខ្មែរ មួយទៀតថាមក ។ ឥឡូវកុំចាំបាច់វិនិច្ឆ័យច្រើន បងប្អូន មីង ពូ លោកយាយ លោកតា យកទៅវិនិច្ឆ័យខ្លួនឯងចុះ ។ អ្នកដែលទៅចលនាឯបរទេសថា កុំទិញទំនិញស្រុកខ្មែរ ។ សូមពិចារណា បើកុំទិញទំនិញពីស្រុកខ្មែរ ចុះកូនចៅរបស់បងប្អូន លោកយាយ លោកតា ដែលកំពុងធ្វើការជាកម្មករកាត់ដេរនៅតាមរោងចក្រ នឹងវិលត្រឡប់មកជួយធ្វើការងារជាមួយ ហើយខានផ្ញើលុយកាក់មកឱ្យបងប្អូន លោកយាយ លោកតាទៀតហើយ សូមគិតមើលទៅ ។ ពីមុនក្នុងគ្រួសារមួយមានគ្នា៥នាក់ ទៅស្ទូងទាំង៥នាក់ ឥឡូវនេះនៅស្ទូង៣នាក់ និងទៅធ្វើការនៅរោងចក្រ២នាក់ ។ តាមរយៈទៅធ្វើការនៅតាមរោងចក្រនោះ បានផ្ញើលុយកាក់មកជូនមួយចំនួន ដើម្បីដោះស្រាយការលំបាក រាប់ទាំងតម្លៃពលកម្មដែលបងប្អូនបានជួលគេមកជួយស្ទូងដក ឬច្រូតកាត់ ។
នៅបណ្តាប្រទេសនានា រាជរដ្ឋាភិបាលកម្ពុជា តែងខិតខំទាក់ទង ទាក់ទាញអ្នកវិនិយោគ ឯមួយក្រុមទៀតថា កុំមកវិនិយោគនៅស្រុកខ្មែរ ។ ដូច្នេះសូមបងប្អូនប្រជាពលរដ្ឋគិតបែបណាចុះ ។ ឥឡូវមានតែពីរក្រុមទេ មួយក្រុមថាកុំមកស្រុកខ្មែរ ហើយមួយក្រុមថាត្រូវតែមក ប៉ុន្តែក្រុមដែលថាមកស្រុកខ្មែរ គឺជោគជ័យ ជាក់ស្តែងថ្ងៃនេះ គឺក្រុមដែលមកស្រុកខ្មែរ ។ យោងទៅលើការព្យាករ សម្តេចតេជោនាយករដ្ឋមន្ត្រី ថ្លែងថា នៅឆ្នាំ២០១៨ នឹងមិនមានការខ្វះអគ្គិសនីទៀតទេ ជាមួយនឹងការផលិតបូកជាមួយបណ្តាញចែកចាយទៅបន្តបន្ទាប់ ជំរុញធ្វើយ៉ាងណាទៅកាន់តំបន់ដែលកំពុងប្រើប្រាស់ ដែលក្រុមហ៊ុនឯកជនកំពុងផលិតដើម្បីទាក់ថ្ពក់អគ្គិសនីរបស់រដ្ឋ ឱ្យទៅដល់តំបន់នោះ ធ្វើឱ្យថ្លៃអគ្គិសនីធ្លាក់ចុះជាងពេល មុន ។
ឆ្លៀតក្នុងឱកាសនេះ សម្តេចតេជោ មានប្រសាសន៍ថា ក្នុងនាមសម្តេចអគ្គមហាធម្មពោធិសាល ជា សុីម សម្តេចអគ្គមហាពញាចក្រី ហេង សំរិន និងខ្លួនសម្តេចផ្ទាល់ ក៏ដូចជាគណបក្សប្រជាជនកម្ពុជា សូមថ្លែងអរគុណចំពោះប្រជាពលរដ្ឋនៅខេត្តពោធិ៍សាត់ទាំងមូល ក៏ដូចជាប្រជាជនទូទាំងប្រទេស ដែលបានបោះឆ្នោតគាំទ្រគណបក្សប្រជាជនកម្ពុជា ឱ្យគណ បក្សប្រជាជនកម្ពុជា បន្តដឹកនាំបេសកកម្មជាប្រវត្តិសាស្ត្របន្តទៀត ។ សម្តេចតេជោ មានប្រសាសន៍ថា ថ្ងៃនេះខ្ញុំមកកាន់ទីនេះជាមួយនឹងការគាំទ្ររបស់ប្រជាជន តាមរយៈការបោះឆ្នោត ។ ថ្ងៃនេះជីវភាពសេដ្ឋកិច្ច ជីវភាពនយោបាយរបស់រដ្ឋវាធម្មតា ថ្ងៃស្អែកគឺជាថ្ងៃធម្មតា…លោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានថ្លែងថា យោងតាមកិច្ចព្រមព្រៀងរបស់គម្រោងវារីអគ្គិសនីស្ទឹងអាតៃ និងខ្សែបណ្តាញបញ្ជូនភ្នំពេញ-កំពង់ឆ្នាំង-ពោធិ៍សាត់-បាត់ដំបង មានលក្ខខណ្ឌវិនិយោគដូចតទៅ ៖
-គម្រោងអគ្គិសនីស្ទឹងអាតៃ អនុស្ថានីយរួមអូរសោម និងខ្សែបណ្តាញបញ្ជូនទៅអនុស្ថានីយពោធិ៍សាត់ ទំហំវិនិយោគសម្រាប់វារីអគ្គិសនីស្ទឹងអាតៃ ១៩៩,៩៧លានដុល្លារអាមេរិក និងសម្រាប់អនុស្ថានីយរួមអូរសោម និងខ្សែបណ្តាញបញ្ជូនទៅអនុស្ថានីយពោធិ៍សាត់ ៥៥,៣៣លានដុល្លារ ។ ទំហំវិនិយោគសរុបទាំងមូល២៥៥,៣០លានដុល្លារ ។ ដោយឡែក វិនិយោគតាមរូបភាពសាងសង់ ដំណើរការ ផ្ទេរ (BOT) សម្រាប់វារីអគ្គិសនីស្ទឹងអាតៃ និងសាងសង់ ផ្ទេរ សម្រាប់អនុសា្ថនីយរួមអូរសោម និងខ្សែបណ្តាញបញ្ជូនទៅអនុស្ថានីយពោធិ៍សាត់ ។ ថាមពលផលិតបានជាមធ្យមប្រចាំឆ្នាំ ៤៦៥លានគីឡូវ៉ាត់ម៉ោង ក្នុង១ឆ្នាំ ។
លោករដ្ឋមន្ត្រី ថ្លែងទៀតថា គម្រោងខ្សែបណ្តាញបញ្ជូនភ្នំពេញ-កំពង់ឆ្នាំង-ពោធិ៍សាត់-បាត់ដំបង ទំហំវិនិយោគ១១៣,៣៩លានដុល្លារអាមេរិក ។ រយៈពេលសម្បទាន២៧ឆ្នាំ ក្នុងនោះ២ឆ្នាំ សម្រាប់ការសាងសង់ និង២៥ឆ្នាំ សម្រាប់ធ្វើអាជីវកម្ម ។ ពន្ធពីការវិនិយោគកសាងវារីអគ្គិសនីស្ទឹងអាតៃ អនុស្ថានីយអូរសោម និងខ្សែបណ្តាញបញ្ជូនទៅអនុស្ថានីយពោធិ៍សាត់ ជាមធ្យម៥,៣០១លានដុល្លារអាមេរិក ក្នុង១ឆ្នាំ ឬសរុបរួម១៥៩,៣លានដុល្លារអាមេរិក ក្នុងរយៈពេលសម្បទាន៣០ឆ្នាំ ។ លោក វ៉ាង យីពីង នាយកក្រុមហ៊ុន China Datang Corperation បានថ្លែងថា នេះគឺជាក្រុមហ៊ុនមួយក្នុងចំណោមក្រុមហ៊ុនផលិតអគ្គិសនីធំៗទាំង៥ នៅប្រទេសចិន និងជាក្រុមហ៊ុនមួយក្នុងចំណោមក្រុមហ៊ុនខ្លាំងៗទាំង៥០០នៅលើពិភពលោក ។
លោកនាយកក្រុមហ៊ុន ថ្លែងទៀតថា ក្រុមហ៊ុនតែងតែផ្តោតការយកចិត្តទុកដាក់លើទីផ្សារថាមពលក្រៅប្រទេសជាទិសដៅសំខាន់ ហើយជានិច្ចកាលផ្តោតលើការស្ថាបនាវិស័យអគ្គិសនី និងអភិវឌ្ឍន៍ទំនាក់ទំនងល្អជាមួយកម្ពុជា ។ នៅឆ្នាំ២០០៧ ក្រុមហ៊ុនបានទទួលបន្តនូវគម្រោងអភិវឌ្ឍន៍វារីអគ្គិសនីស្ទឹងអាតៃ ជាផ្លូវការ ព្រមទាំងគម្រោងសាងសង់ខ្សែបញ្ជូនភ្នំពេញ-កំពង់ឆ្នាំង-ពោធិ៍សាត់-បាត់ដំបង ។ ក្រោមការគាំទ្រយ៉ាងខ្លាំងពីសំណាក់រាជរដ្ឋាភិបាលកម្ពុជា និងរដ្ឋាភិបាលចិន ក្រុមហ៊ុនបានអនុវត្តយ៉ាងពេញលេញនូវស្មារតី សកម្ម លះបង់ ច្នៃប្រឌិត និងប្រឹងប្រែង ។ ក្រុមហ៊ុនតែងតែផ្តោត និងតស៊ូលើគោលការណ៍ «ផលប្រយោជន៍ទាំងសងខាង» សម្រេចបាននូវការអភិវឌ្ឍប្រកបដោយភាពចុះសម្រុង ។ ក្រុមហ៊ុន ក៏បានចូលរួមបម្រើក្នុងវិស័យផលប្រយោជន៍សាធារណៈផងដែរ ។
ពិធីសម្ពោធថ្ងៃនេះ គឺជាជោគជ័យ និងអំណរសាទរនៃគម្រោងវារីអគ្គិសនីស្ទឹងអាតៃ និងគម្រោងខ្សែបញ្ជូនភ្នំពេញ-កំពង់ឆ្នាំង-ពោធិ៍សាត់-បាត់ដំបង ជាការឆ្លុះបញ្ជាំងអំពីការរីកចម្រើនថ្មីមួយនៃវិស័យថាមពលអគ្គិសនីរបស់ប្រទេសកម្ពុជា ៕
ចែករំលែកព័តមាននេះ