ខេត្តបាត់ដំបង ៖ ស្ពានថ្មមួយខ្សែនៅក្នុងឃុំអូរសំរិល ស្រុកសំឡូត ដែលទើបសម្ពោធដាក់ឱ្យប្រើប្រាស់ក្នុងរយៈពេល១ខែកន្លងទៅនេះ កំពុងប្រឈមនឹងការបាក់ស្រុតក្បាលស្ពាន ដោយសារជំនន់ទឹកភ្លៀងហក់ឡើងយ៉ាងគំហុក កាលពីព្រឹកថ្ងៃទី១៦ កញ្ញា ។ នេះបើតាមព័ត៌មានបឋមពីមន្ត្រីមូលដ្ឋានស្ពានថ្មថ្មីមួយខ្សែនេះ មានប្រវែង១០២ម៉ែត្រ និងទទឹងប្រវែង៨ម៉ែត្រ ឆ្លងកាត់ស្ទឹងចម្លងគួយ ស្ថិតក្នុងភូមិអូររំចេកក្រោម ឃុំអូរសំរិល ស្រុកសំឡូត ។ ស្ពាននេះ ត្រូវបានសាងសង់ដោយបញ្ជាការដ្ឋានកងវិស្វកម្មអគ្គបញ្ជាការនៃក្រសួងការពារជាតិហើយត្រូវបានបើកសម្ភោធដាក់ឲ្យប្រើប្រាស កាលពីថ្ងៃទី១៤ សីហា កន្លងទៅថ្មីៗនេះ ដោយសម្ដេចក្រឡាហោម ស ខេង ។
លោកហែម ឆុន នាយប៉ុស្ដិ៍នគរបាលអូរសំរិលបានប្រាប់កោះសន្តិភាព នៅព្រឹកថ្ងៃទី១៧ កញ្ញា នេះថា ជំនន់ទឹកភ្លៀងបានធ្វើឲ្យបាក់ស្រុតដី.កស្ពានទាំងសងខាងដែលកំពុងប្រឈមនឹងការខូចខាតធ្ងន់ធ្ងរ បើ
មានជំនន់ទឹកភ្លៀងនេះជាថ្មីទៀតហើយប្រសិនបើមន្ត្រីជំនាញមិនរកវិធីសាស្ត្រជួសជុល ឬទប់ស្កាត់ឲ្យបានទាន់ពេលវេលា ។ លោកនាយប៉ុស្ដ៍រូបនេះបានបញ្ជាក់ថា លោកបានទទួលបញ្ជាពីថ្នាក់ដឹកនាំឲ្យដាក់កម្លាំងតាមដានសកម្មភាពទឹកជំនន់នេះ និងត្រូតពិនិត្យមើលស្ថានភាពស្ពានថែមទាំងបិទចរាចរណ៍ឆ្លងកាត់ស្ពាននេះ កាលពីយប់មិញ ។
ប៉ុន្តែលោកបានបញ្ជាក់ថា ការបិទចរាចរណ៍មិនឱ្យឆ្លងកាត់នេះ គឺសម្រាប់តែរថយន្តធន់ធ្ងន់តែប៉ុណ្ណោះ
រីឯ អ្នកដំណើរតាមម៉ូតូ ឬរថយន្តធុនតូចអាចអនុញ្ញាតឲ្យឆ្លងកាត់បាន ។ ដោយឡែក ស្ពានយោលមួយខ្សែ ទៀត ដែលឆ្លងកាត់ស្ទឹងនេះដែរ និងនៅចម្ងាយពីស្ពានថ្មនេះបន្តិច ក៏កំពុងរងការខូចខាតដែរ ។ ប៉ុន្តែ លោកហែម ឆុន បានបញ្ជាក់ប្រាប់ថា នៅព្រឹកថ្ងៃទី១៧ កញ្ញា នេះ អាជ្ញាធរនិងប្រជាពលរដ្ឋបាននិងកំពុងនាំគ្នា ជួសជុលក្រាលក្ដាឡើងវិញ ក្រោយពីត្រូវបំផ្លាញដោយជំនន់ទឹកភ្លៀងកាលពីម្សិលមិញ ។
លោកហែម ឆុន បានបញ្ជាក់ដែរថា ពេលនេះទឹកបានស្រកច្រើនហើយ តែបើភ្លៀងនៅតែបន្តធ្លាក់ដែលនាំឲ្យមានជំនន់ជាថ្មីទៀត ស្ពានថ្មខាងលើនេះ ទំនងចៀសមិនផុតពីការខូចខាតទេ ។ ប៉ុន្តែពេលនេះ កម្លាំងរបស់លោកកំពុងការពារ និងតាមដានពិនិត្យស្ថានភាពទឹកស្ទឹង និងស្ពានយ៉ាងយកចិត្តទុកដាក់បំផុត ។ (សម្រួលដោយ៖ ស្រីណា)
ចែករំលែកព័តមាននេះ