ក្រុងប៉ោយប៉ែត ៖ ឃ្លាំងស្តុកខោអាវគីបមួយកន្លែង មានទីតាំងស្ថិតនៅក្នុងភូមិបាលិលេយ្យ១ សង្កាត់ប៉ោយប៉ែត បានត្រូវអគ្គិភ័យលេបត្របាក់ក្លាយជាផេះផង់ផ្អើលកាលពីវេលាម៉ោង៤ទៀបភ្លឺ ថ្ងៃទី២៦ មីនា ដែលតាមព័ត៌មានថាអាចបណ្តាលមកពីទុស្សេចរន្តអគ្គិសនី ។ ឃ្លាំងស្តុកខោអាវគីបនេះ ធ្វើពីឈើប្រក់ស័ង្កសី មានទំហំ៥ម៉ែត្រx៨ម៉ែត្រ ជារបស់ស្ត្រីឈ្មោះ សៅ សុភា អាយុ៤៩ឆ្នាំ ក្នុងនោះក៏មានភាគហ៊ុនជាមួយកូនស្រី២នាក់ទៀតឈ្មោះ គង់ ធារី អាយុជាង៣០ឆ្នាំ និងឈ្មោះ គង់ ស្រីមុំ អាយុជាង២០ឆ្នាំ ជាអាជីវករលក់ខោអាវគីបនៅផ្សាររុងក្លឿ ស្រុកអារញ្ញ ខេត្តស្រះកែវ ប្រទេសថៃ ។
នៅកន្លែងកើតហេតុ គេឃើញមានវត្តមានអាជ្ញាធរ និងសមត្ថកិច្ចនគរបាលក្រុងប៉ោយប៉ែត ដឹកនាំដោយលោក អ៊ុំ សុផល ជាអធិការ បានអន្តរាគមន៍ហៅរថយន្តពន្លត់អគ្គិភ័យរបស់ក្រុមហ៊ុនកាស៊ីណូ«ត្រូពីកាណា» និង«ក្រែនដាយមែនស៊ីធី» ពីរគ្រឿងមកជួយបាញ់ទឹកពន្លត់ ។ ថ្វីដ្បិតតែភ្លើងមិនបានឆេះរាលដាលទៅផ្ទះអ្នកស្រុកដែលនៅជុំវិញនោះក្តី ប៉ុន្តែទំនិញខោអាវគីបជាង១០០ដុំបានឆេះគ្មានសល់ ។ តាមស្ត្រីឈ្មោះ សៅ សុភា និយាយថា ការឆេះនេះអាចបណ្តាលមកពីទុស្សេចរន្តអគ្គិសនី ហើយតម្លៃគិតជាទឹកប្រាក់នៃការខូចខាតនេះ ប្រហែលជាង២មុឺនដុល្លារអាមេរិក ។
ទោះជាយ៉ាងណា ការឆាបឆេះនេះបានស្ងប់ស្ងាត់ទៅវិញនៅម៉ោងជាង៥ព្រឹកថ្ងៃដដែល បន្ទាប់ពីគេយកគ្រឿងចក្រមួយគ្រឿងទៅកាយឃ្លាំងស្តុកនោះឱ្យដួលរលំ ដើម្បីបើកផ្លូវឱ្យក្រុមពន្លត់អគ្គិភ័យចូលបាញ់ទឹកដល់ផ្នែកខាងក្នុង ។ ជាមួយគ្នានេះ ជញ្ជាំងផ្ទះធំផ្នែកខាងក្រោយរបស់ម្ចាស់ទំនិញនេះ ក៏បានរងការខូចខាតដោយសារការឆេះនេះដែរ ៕
ចែករំលែកព័តមាននេះ