រាជធានីភ្នំពេញ ៖ នាងក្រមុំខ្មែរកម្ពុជាក្រោមម្នាក់ មានគូដណ្ដឹងនៅស្រុកកំណើត១ឆ្នាំមកហើយ ហើយនៅសល់តែ១ខែកន្លះទៀតប៉ុណ្ណោះដល់ថ្ងៃរៀបការ នាងប្រែចិត្តលែងការ ដោយចាកចេញពីស្រុកកំណើត មកលេងផ្ទះពូនៅភ្នំពេញ និងបានចូលធ្វើការជាអ្នករត់តុនៅក្នុងហាងកាហ្វេមួយ រហូតឈ្លក់ទឹកម៉ាស៊ីន ភ្លេចអស់ស្រុកកំណើត ជាពិសេសគូដណ្ដឹង ដែលជិតដល់ថ្ងៃរៀបការទៅហើយនោះ ។
នាងមិនបានវិលត្រឡប់ទៅកាន់ស្រុកកំណើតវិញទេ ទោះបីជាស្រ្តីជាម្ដាយខំធ្វើដំណើរមកតាមយកឲ្យត្រឡប់ទៅវិញយ៉ាងណាក៍ដោយ ក៍នាងមិនព្រមទៅដែរ ។ មិនតែប៉ុណ្ណោះនាងបានប្រាប់ម្ដាយថា នាងលែងស្រលាញ់គូដណ្ដឹងនោះទៀតហើយ ហើយក៍មិនចង់រៀបការទៀតដែរ ។ បន្ទាប់ពីបានឮកូនស្រីនិយាយបែបនេះ បានធ្វើឲ្យស្រ្តីជាម្ដាយ ពិបាកចិត្តយ៉ាងខ្លាំង រហូតដល់ដួលសន្លប់បាត់ស្មារតី និងបង្កឲ្យមានការភ្ញាក់ផ្អើល ឆោឡោឡើងកាលពីវេលាម៉ោង ២និង៣០នាទីរសៀល ថ្ងៃទី២៦ មីនា ២០១៤ នៅក្នុងប៉ុស្ដិ៍នគរបាល រដ្ឋបាលកាកាប ខណ្ឌពោធិ៍សែនជ័យ ។
នាងក្រមុំដែលឆ្លក់ទឹកម៉ាស៊ីន រហូតភ្លេចអ្វីៗទាំងអស់នោះ ឈ្មោះ នាង សុភី អាយុ១៩ឆ្នាំ ជាជនជាតិខ្មែរកម្ពុជាក្រោម ចំណែកឯស្រ្តីជាម្ដាយឈ្មោះ នាង សាក់ អាយុ៤២ឆ្នាំ រស់នៅក្នុងភូមិត្រៀក ឃុំត្រៀក ស្រុកស្វាយទង កម្ពុជាក្រោម។
ចែករំលែកព័តមាននេះ