រាជធានីភ្នំពេញ៖ នៅទីស្តីការក្រសួងការបរទេស និងសហប្រតិបត្តិការអន្តរជាតិ កាលពីថ្ងៃទី២៦ មីនា មានរៀបចំពិធីចុះហត្ថលេខាលើលិខិតប្តូរសារនិងកំណត់ហេតុនៃការផ្តល់ជំនួយឥតសំណងរបស់ព្រះរាជាណាចក្រជប៉ុនដែលមានទឹកប្រាក់ប្រមាណ១១,៥២០.០០០ដុល្លារ ដល់ព្រះរាជាណាចក្រកម្ពុជា ដើម្បីអនុវត្តលើគម្រោងពង្រីកមជ្ឈមណ្ឌលជាតិគាំពារមាតានិងទារក ។
ពិធីនោះស្ថិតក្រោមវត្តមានលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិ និងលោកគូម៉ាម៉ារ៉ូយូជិ ឯកអគ្គរាជទូតជប៉ុនប្រចាំកម្ពុជា ។
លោកឧបនាយករដ្ឋមន្ត្រី ហោ ណាំហុង បានបញ្ជាក់ថានៅក្នុងផែនការយុទ្ធសាស្ត្ររបស់រាជរដ្ឋាភិបាលកម្ពុជាសម្រាប់ឆ្នាំ២០០៨-២០១៥ នោះ គឺបានចាត់ទុកវិស័យសុខាភិបាលសំខាន់ផ្នែកគាំពារមាតា និងទារកជាបេសកកម្មយ៉ាងសំខាន់មួយ ។ ដូច្នេះជំនួយឥតសំណងរបស់ប្រទេសជប៉ុននាពេលនេះទោះបីមានចំនួនតិចក៏ដោយ ប៉ុន្តែមានអត្ថន័យខ្លាំងណាស់សម្រាប់ផ្នែកគាំពារមាតានិងទារកនៅកម្ពុជា ។
លោកឧបនាយករដ្ឋមន្ត្រី បានចាត់ទុកជំនួយឥតសំណងរបស់ប្រទេសជប៉ុននេះ គឺជាការឆ្លើយតបទាន់ពេលវេលានូវតម្រូវការចាំបាច់របស់មជ្ឈមណ្ឌលជាតិគាំពារមាតានិងទារក ព្រោះមជ្ឈមណ្ឌលនេះ កន្លងមកបានរួមចំណែកយ៉ាងសំខាន់ក្នុងការកាត់បន្ថយនូវអត្រាមរណៈរបស់មាតានិងទារកដែលទើបនឹងកើត ព្រមទាំងលើកស្ទួយសុខភាពរបស់ពួកគេថែមទៀត ។
ចែករំលែកព័តមាននេះ