រាជធានីភ្នំពេញ ៖ ហាងលក់ខោអាវកូនក្មេងយីហោបេប៊ីប្រេន ទីតាំងផ្ទះលេខ៦៥-៦៧Eo ផ្លូវលេខ៥៣ ភូមិទី២ សង្កាត់ផ្សារថ្មីទី១ ខណ្ឌដូនពេញ បានត្រូវខ្មាន់កំាភ្លើងមិនស្គាល់អត្តសញ្ញាណ បើករថយន្តស៊េរីទំនើបមួយគ្រឿង ម៉ាកអូឌី ពណ៌ខ្មៅ គ្មានស្លាកលេខ ឈប់នៅម្ខាងផ្លូវ បាញ់ជាច្រើនគ្រាប់សំដៅចូលក្នុងហាង បង្កឱ្យមានការភ្ញាក់ផ្អើល ដល់ប្រជាពលរដ្ឋ និងសមត្ថកិច្ច កាលពីវេលាម៉ោង១០និង៤៥នាទី យប់ថ្ងៃទី២៤ មីនា ។
ក្រោយពីផ្ទុះអាវុធ ខ្មាន់កំាភ្លើងក៏បើករថយន្តគេចខ្លួនបាត់ តែមិនមានមនុស្សណាម្នាក់រងគ្រោះដោយការបាញ់រះនោះទេ គ្រាន់តែខូចខាតទ្វារហាងប៉ុណ្ណោះ ។ មន្ត្រីនគរបាលខណ្ឌដូនពេញ និយាយថា នៅវេលាម៉ោង១០និង៤៥នាទីយប់ ថ្ងៃទី២៤ មីនា មានរថយន្តមួយគ្រឿង ម៉ាកអូឌី ពណ៌ខ្មៅ គ្មានស្លាកលេខ បើកតាមផ្លូវលេខ៥៣ ឆ្ពោះទៅទិសខាងជើង លុះមកដល់មុខហាងលក់ខោអាវកូនក្មេង យីហោបេប៊ីប្រេន ក៏ឈប់ បន្តិចក្រោយមកក៏បាញ់ចេញពីក្នុងរថយន្តជាបន្តបន្ទាប់ ខណៈហាងខាងលើបិទទ្វារទៅហើយនោះ ។ ក្រោយពីផ្ទុះអាវុធបង្កឱ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចហើយនោះ ខ្មាន់កាំភ្លើងក៏បើករថយន្តយ៉ាងលឿនឆ្ពោះទៅទិសខាងជើងគេចខ្លួនបាត់ទៅ បន្សល់ទុកសម្បកគ្រាប់នៅកន្លែងកើតហេតុ ។ នៅក្នុងហេតុការណ៍ខាងលើនេះ មិនមាននរណាម្នាក់ស្លាប់ ឬរងរបួសទេ គ្រាន់តែធ្លុះទ្វារដែករមូរ ចំនួន៥កន្លែង ។
ភ្នាក់ងារសន្តិសុខយាមនៅហាងខារ៉ាអូខេ អេសអិន បានឱ្យនគរបាលប៉ុស្តិ៍រដ្ឋបាលផ្សារថ្មីទី១ដឹងថា ខ្មាន់កំាភ្លើង ដែលជិះរថយន្តទំនើបបាញ់ចូលហាងលក់ខោអាវកូនក្មេងនេះ មានគ្នាពីរនាក់ មិនដឹងជាមានរឿងអ្វីឡើយ ហើយពេលបើកមកដល់ចំណុចខាងលើ ក៏បាញ់ជាបន្តបន្ទាប់ រួចបើករថយន្តចេញទៅបាត់ ។ នៅកន្លែងកើតហេតុ សមត្ថកិច្ចរើសបានសម្បកគ្រាប់ចំនួន៧ ។ មន្ត្រីនគរបាលព្រហ្មទណ្ឌខណ្ឌដូនពេញបានឱ្យដឹងថា ក្រោយពីមានករណីផ្ទុះអាវុធនេះ កម្លាំងនគរបាល និងសមត្ថកិច្ចពាក់ព័ន្ធតាមខណ្ឌទាំង៩ បានទាក់ទងគ្នាដើម្បីដាក់កម្លាំងតាមគោលដៅចាំប្រមាញ់អ្នកជិះរថយន្តអូឌីទាំង២នាក់ តាមបទបញ្ជារបស់លោកឧត្តមសេនីយ៍ស្នងការនគរបាលរាជធានីភ្នំពេញ ។ លុះប្រហែលជាកន្លះម៉ោងក្រោយមក កម្លាំងនគរបាលខណ្ឌសែនសុខ បានស្ទាក់រថយន្តអូឌីមួយគ្រឿង ពណ៌ខ្មៅ គ្មានស្លាកលេខ បើកបរដោយនារីម្នាក់ តាមមហាវិថីសហព័ន្ធរុស្ស៊ី ។
ប៉ុន្តែក្រោយការសួរនាំ អ្នកបើកបររថយន្តរូបនេះមិនមានជាប់ពាក់ព័ន្ធនឹងការបាញ់នៅហាងលក់ខោអាវយីហោបេប៊ីប្រេន ក្នុងខណ្ឌដូនពេញនោះទេ ទោះជាយ៉ាងណាក៏បានបញ្ជូនទៅការិយាល័យនគរបាលចរាចរណ៍ផ្លូវគោកដើម្បីពិនិត្យឯកសាររថយន្ត ព្រោះគ្មានស្លាកលេខ ។ ដោយឡែកមុខសញ្ញាខ្មាន់កំាភ្លើងដែលបាញ់ទៅលើហាងបេប៊ីប្រេន រហូតមកដល់រសៀលថ្ងៃទី២៥ មីនា នៅមិនទាន់កំណត់បាននៅឡើយទេ ។ សូមបញ្ជាក់ថា កម្លាំងនគរបាលខណ្ឌសែនសុខ និងខណ្ឌទួលគោកប្រមាណ៥០នាក់ ប្រដាប់ដោយកាំភ្លើងអាកា បានស្ទាក់ចាប់រថយន្តអូឌី សេ៊រីទំនើបមួយគ្រឿង ពណ៌ខ្មៅ អត់ស្លាកលេខ បើកបរដោយនារីវ័យក្មេងសាច់សខ្ចីម្នាក់ ។ ការស្នាក់ចាប់នេះគឺតាមការបញ្ជាផ្ទាល់ពីលោកឧត្តមសេនីយ៍ឯក ជួន សុវណ្ណ ស្នងការនគរបាលរាជធានីភ្នំពេញ និងបង្កឱ្យមានការភ្ញាក់ផ្អើលកាលពីវេលាម៉ោង១១ និង១០នាទីយប់ថ្ងៃទី២៤ មីនា ត្រង់ចំណុចផ្លូវរថភ្លើងត្រឡោកបែក ស្ថិតក្នុងភូមិសេបេ៉សេ សង្កាត់ទឹកថ្លា ខណ្ឌសែនសុខ ។
នៅកន្លែងកើតហេតុ នគរបាលមិនបានស្គាល់អត្តសញ្ញាណនារីវ័យក្មេងដែលបើកបររថយន្តអូឌី សេ៊រីទំនើប ខាងលើនៅឡើយទេ ហើយក៏មិនទាន់ដឹងថាជាករណីអ្វីដែរ ។ ប៉ុន្តែបើតាមលោកឧត្តមសេនីយ៍ឯក ជួន សុវណ្ណ បានឱ្យដឹងថា មុនពេលលោកបញ្ជាកម្លាំងនគរបាលឱ្យស្ទាក់ចាប់រថយន្តអូឌី ស៊េរីទំនើបខាងលើ គឺលោកបានធ្វើការល្បាតត្បួតពិនិត្យកងកម្លាំងនៅតាមគោលដៅនីមួយៗក្នុងរាជធានីភ្នំពេញ ។ ខណៈលោកកំពុងល្បាតនោះ ក៏ប្រទះឃើញរថយន្តអូឌីស៊េរីទំនើប ពណ៌ខ្មៅ មួយគ្រឿងអត់ស្លាកលេខ បើកបរដោយនារីវ័យក្មេងម្នាក់ធ្វើដំណើរយ៉ាងលឿននៅតាមបណ្ដោយផ្លូវព្រះសីុសុវត្ថិ ម្ដុំមាត់ទន្លេ ។ ដោយឃើញដូច្នេះ លោកក៏បានបញ្ជាឱ្យនគរបាលខណ្ឌដូនពេញឃាត់រថយន្តខាងលើដើម្បីធ្វើការសួរនាំ តែដោយសាររថយន្តនោះបើកលឿនខ្លាំងពេកធ្វើឱ្យផ្អើលនគរបាលមួយរាជធានីភ្នំពេញដេញប៉ផាប់ចាប់ពភីងរហូតមកដល់ផ្លូវលេខ៥៩៨ ម្ដុំផ្លូវរថភ្លើងត្រឡោកបែកទើបនគរបាលខណ្ឌសែនសុខសហការជាមួយនគរបាលខណ្ឌទួលគោកស្ទាក់ចាប់បាន ។
ក្រោយពេលឃាត់រថយន្តអូឌី ស៊េរីទំនើបអត់ស្លាកលេខនេះបានហើយ លោកឧត្តមសេនីយ៍ស្នងការក៏បានបញ្ជាឱ្យនាំយករថយន្តខាងលើទៅរក្សាទុកនៅការិយាល័យនគរបាលចរាចរណ៍ជើងគោក ដោយសាររថយន្តនេះបើកបរលើផ្លូវសាធារណៈក្នុងល្បឿនលឿនហើយអត់ស្លាកលេខថែមទៀត ៕
ចែករំលែកព័តមាននេះ