រាជធានីភ្នំពេញ៖ អាជ្ញាធរជាតិប្រយុទ្ឋប្រឆាំងគ្រឿងញៀនរបស់ប្រទេសកម្ពុជា សហការជាមួយមន្រ្តីអនុវត្តន៏ច្បាប់គ្រប់ប្រភេទនិងគ្រប់លំដាប់ថ្នាក់ ក៏ដូចជាមានការចូលរួមពីស្ថាប័នអយ្យការ បានធ្វើការបង្រ្កាបបទល្មើសគ្រឿងញៀនឆ្នាំ២០១៣កន្លងមកនេះបានចំនួន៨៨៩ករណី និង ឃាត់ខ្លួនមនុស្សចំនួន ១៨៣០ នាក់ ។
នេះបើយោងតាមរបាយការណ៏ប្រចំាឆ្នាំដែលបានបង្ហាញនៅក្នុងសន្និបាតបូកសរុបការងាប្រយុទ្ឋប្រឆាំងគ្រឿងញៀនឆ្នាំ២០១៣ និងលើកទិសដៅឆ្នាំ២០១៤ ដែលកំពុងបា្ររព្ឋបើកនៅទីស្តីការក្រសួងមហាផ្ទៃ ក្រោមអធិបតីភាព លោកឧបនាយករដ្ឋមន្រ្តី កែ គឹមយ៉ាន ប្រធានអាជ្ញាធរជាតិប្រយុទ្ឋប្រឆាំងគ្រឿងញៀន ។
របាយការណ៏ដដែលក៏បានបង្ហាញទៀតថា ក្នុងបទល្មើសគ្រឿងញៀនទំាង៨៨៩ករណីខាងលើ មានករណីដែលស្ថិតនៅក្នុងទ្រង់ទ្រាយធំនិងក្នុងសកម្មភាពជាបណ្តាញមានការចាត់តំាងឆ្លងដែន ដែលត្រូវជាប់ចោទក្នុងបទឧក្រិដ្ឋ អាជ្ញាធរជាតិប្រយុទ្ឋប្រឆាំងគ្រឿងញៀនបង្រ្កាបបាន៤១ក្រុម ស្មើនឹង៤១ករណី និងឃាត់ខ្លួនមនុស្ស៩០នាក់ ។
ចំណែកមនុស្សដែលបានឃាត់ខ្លួនទំាង១៨៣០នាក់នោះ មាន១៦សញ្ជាតិផ្សេងគ្នារួមមាន៖ ជនជាតិខ្មែរ វៀតណាម ឡាវ ថៃ ហ្វីលីពីន ចិន នីហ្សេរីយ៉ា កូរ៉េ ឥណ្ឌា អៀឡង់ ប៉េរូ ឥណ្ឌូនេស៊ី រ៉ូម៉ានី អេស្បាញ បារំាង និង ជនជាតិអូស្រ្តាលី ។
របាយការណ៏ក៏បានបង្ហាញឲ្យដឹងទៀតថា ក្នុងប្រតិបត្តិការបង្រ្កាបគ្រឿងញៀន ឆ្នាំ២០១៣កន្លងមក អាជ្ញាធរជាតិប្រយុទ្ឋប្រឆាំងគ្រឿងញៀនបានរឹបអូសថ្នំាញៀនប្រភេទ មេតំហ្វេតាមីនគ្រាប់បានចំនួន ១៧ ៣៣៤,៩១ក្រាម កើនឡើង៦២,៦០% បើប្រៀបធៀបនឹងឆ្នាំ២០១២ ប្រភេទមេតំហ្វេតាមីនក្រាមម្សៅចំនួន ៣២ ៤៤៨,៨២ក្រាម កើនឡើង១៥,៦១% ហេរ៉ូអ៊ីនចំនួន ៣៨ ៣៣៧,៦៨ក្រាម កើនឡើងក្នុងកម្រិតអតិបរមា កាកូអ៊ីនចំនួន ១២ ៨៥១ក្រាម ថយចុះ ៦៨,៧១% កេតាមីនចំនួន ១០១៦ក្រាម (ប្រហាក់ប្រហែលពីឆ្នាំ២០១២) និង រឹបអូសកញ្ឆាក្រៀមចំនួន ១៦៨ ៥៣៧ក្រាម កើនក្នុងកម្រិតអតិបរមា ៕
ចែករំលែកព័តមាននេះ