ខេត្តតាកែវ ៖ សិស្ស និងអាណាព្យាបាលរស់នៅក្នុងទីប្រជុំជនស្រុកព្រៃកប្បាស បានដាក់ពាក្យបណ្តឹងមកអធិការដ្ឋាននគរបាលស្រុក ដើម្បីឱ្យជួយដោះស្រាយ និងរកយុត្តិធម៌ ក្រោយពីសាលាឯកជនមួយឈ្មោះសាលាភាសាអង់គ្លេស-ខ្មែរអាមេរិកាំងហូម បានឃោសនាដល់កូនចៅប្រជាពលរដ្ឋនៅតាមភូមិឱ្យចូលរៀនដោយបង់លុយ លុះពេលទទួលបានលុយគ្រប់គ្រាន់ហើយ នាយកសាលានេះក៏វេចលុយរាប់ម៉ឺនដុល្លាររត់គេចខ្លួនបាត់ សូម្បីតែថ្លៃជួលផ្ទះ ទឹក ភ្លើង ក៏អត់ទាន់បង់ដែរ ។
នៅក្នុងពាក្យបណ្តឹងចុះថ្ងៃទី២៤ មីនា ដែលអាណាព្យាបាលសិស្សប្តឹងនាយកសាលាមួយនេះរៀបរាប់ថា រយៈពេលជាង៣ខែកន្លងទៅនេះ មានជនម្នាក់ឈ្មោះ ជាវ ប៊ុនថន បានមកជួលផ្ទះមួយនៅក្នុងភូមិព្រៃល្វាលិច ឃុំព្រៃល្វា ស្រុកព្រៃកប្បាស ដើម្បីបើកសាលាឯកជនមួយឈ្មោះសាលាបង្រៀនភាសាអង់គ្លេស-ខ្មែរអាមេរិកាំងហូម ដោយបានជួលរថយន្តទួរីសមួយគ្រឿងសម្រាប់ដឹកសិស្សទៅមក មានបំពាក់កុំព្យូទ័រ និងសម្ភារសិក្សាយ៉ាងច្រើនទៀត ។ ក្រោយពេលលើកស្លាករួច ជននេះបានដើរឃោសនាដល់កូនចៅប្រជាពលរដ្ឋនៅតាមភូមិដោយនិយាយថា សាលាបើកបង្រៀនភាសាអង់គ្លេសគ្រប់កម្រិត ដោយកំណត់ឱ្យឪពុកម្តាយ ឬអាណាព្យាបាលសិស្សទាំងអស់ត្រូវបង់លុយជាឆ្នាំ ដោយសិស្សម្នាក់ក្នុង១ឆ្នាំត្រូវបង់លុយចំនួន៣០០ដុល្លារអាមេរិក ហើយសិស្សដែលចុះឈ្មោះមានប្រមាណជាង៣០០នាក់ គឺសរុបទៅលុយមិនតិចជាង៩០.០០០ដុល្លារឡើយ ។
នៅក្នុងពាក្យបណ្តឹងបានបន្តទៀតថា ក្រោយពេលប្រមូលលុយពីសិស្សអស់ហើយ ស្រាប់តែនាយកសាលានោះវេចលុយរត់គេចខ្លួនបាត់ស្រមោល ធ្វើឱ្យសិស្សានុសិស្ស និងអាណាព្យាបាលមានការភ្ញាក់ផ្អើលគ្រប់ៗគ្នា ព្រោះពេលមកដល់សាលា ស្រាប់តែឃើញចាក់សោជិត ។ ចំពោះការដែលអាណាព្យាបាលសិស្សមកដាក់ពាក្យបណ្តឹងនេះ គឺដើម្បីឱ្យប៉ូលិសស្រុកស្វែងរកចាប់ខ្លួនជនឆបោកខាងលើមកដោះស្រាយគ្នាទៅតាមច្បាប់ ។ មន្ត្រីប៉ូលិសស្រុកព្រៃកប្បាសនិយាយថា ក្រោយពីជនឆបោកវេចលុយរត់គេចខ្លួនបាត់នោះ សមត្ថកិច្ចក៏បានទទួលពាក្យបណ្តឹងជាបន្តបន្ទាប់ ចំណែកលោកគ្រូ អ្នកគ្រូចំនួន១៥នាក់ ក្នុងរយៈពេលជាង៣ខែមកនេះអត់ដែលទទួលបានប្រាក់ខែឡើយ ថ្លៃឈ្នួលរថយន្ត ថ្លៃប្រេង ថ្លៃផ្ទះ ទឹក ភ្លើង ក៏អត់ទទួលបានលុយដែរ ។
មានការកត់សម្គាល់ថា សកម្មភាពរបស់ជនឆបោកជានាយកសាលារូបនេះ ពេលមកសុំច្បាប់បើកសាលានោះ គេមានលិខិតស្នាមត្រឹមត្រូវ ទើបអាជ្ញាធរមើលអត់ដឹង លុះនៅពេលជននេះវេចលុយរត់បាត់ ទើបមានការភ្ញាក់ផ្អើលកើតឡើង ។ ចំពោះករណីខាងលើនេះ កោះសន្តិភាពមិនអាចសុំការបំភ្លឺពីលោកប្រធានការិយាល័យអប់រំ យុវជន និងកីឡាស្រុកបានឡើយ ចំណែកលោកស៊ីវ សុខន ប្រធានមន្ទីរអប់រំ យុវជន និងកីឡាខេត្ត ក៏មិនអាចទាក់ទងតាមទូរស័ព្ទបានដែរនៅថ្ងៃដដែលនោះ ។ នេះមិនមែនជាលើកដំបូងទេដែលជនខិលខូចដើរបើកសាលាឯកជននៅតាមខេត្ត និងស្រុក លុះពេលប្រមូលលុយបានហើយក៏រត់បាត់ ។
អ្នកបង់ខាតក្នុងអំពើឆបោកនេះបានត្រឹមតែស្តីបន្ទោសទៅមន្ទីរជំនាញបុ៉ណ្ណោះ ដែលឆកល្វែងឱ្យជនឆបោកធ្វើសកម្មភាពតាមរយៈការប្រើប្រាប់វិស័យអប់រំបែបនេះបាន ៕
ចែករំលែកព័តមាននេះ