រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់អង្គភាពប្រឆាំងអំពើពុករលួយ ដែលកោះសន្តិភាពទទួលបានថ្ងៃទី២៤ មីនា បានឱ្យដឹងថា កាលពីថ្ងៃទី១៨ មីនា ២០១៤ អង្គភាពប្រឆាំងអំពើពុករលួយ បានឃាត់ខ្លួនជនសង្ស័យឈ្មោះ ស្រ៊ុន ឡាំ ដែលជាអធិការ និងគូកនម្នាក់ទៀតឈ្មោះ មុ៉ក ហ៊ត ដែលជាអធិការរងនៃអធិការដ្ឋាននគរបាលស្រុកបន្ទាយមាស ខេត្តកំពត ពីបទប្រព្រឹត្តអំពើពុករលួយ ។
ការប្រកាសនេះបានបង្ហាញពីទោសកំហុសចំនួន៨ចំណុចគឺ ៖
១-បានកាត់ប្រាក់បៀរត្សរបស់មន្ត្រីនគរបាលនៃអធិការដ្ឋាននគរបាលស្រុកជារៀងរាល់ខែ ចាប់តាំងពីឆ្នាំ២០០៨ រហូតមក
២-បានបើកយកប្រាក់បៀវត្សរបស់មន្ត្រីនគរបាលដែលមិនមកបំពេញការងារចំនួនពី២នាក់ទៅ៨នាក់ជារៀងរាល់ខែ ចាប់តាំងពីឆ្នាំ២០០៨ រហូតមក
៣-ការកេងយកប្រាក់ឧបត្ថម្ភកម្លាំងការពារយុទ្ធនាការឃោសនាបោះឆ្នោតជ្រើសតាំងតំណាងរាស្ត្រនីតិកាលទី៥
៤-បានទទួលយកសំណូកពីមេល្បែងស៊ីសង និងជនល្មើសនៃករណីព្រហ្មទណ្ឌ ជាថ្នូរនឹងការមិនបញ្ជូនសំណុំរឿងទៅតុលាការ
៥-បានបង្គាប់មន្ត្រីនគរបាលសណ្តាប់ធ្នាប់ចរាចរណ៍បង់លុយឱ្យខ្លួនជារៀងរាល់ខែ
៦-បានចាត់តាំងកម្លាំងនគរបាលឱ្យប្រមូលលុយពីអាជីវកររកស៊ីទិញស្រូវ
៧-បានប្រើអាវុធខុសច្បាប់ដែលទាក់ទិននឹងអង្គហេតុពុករលួយ
៨-បានជ្រៀតជ្រែកក្នុងដំណើរការសើុបអង្កេតរបស់អង្គភាពប្រឆាំងអំពើពុករលួយ ។
ផ្អែកតាមលទ្ធផលនៃការសើុបអង្កេតបានបង្ហាញថា ឈ្មោះ ស្រ៊ុន ឡាំ និងគូកនបានទទួលលុយពីការប្រព្រឹត្តអំពើពុករលួយប្រមាណ២៥៧.៤៤១.២៣៥រៀល ។ អ.ប.ព. បានបញ្ជូនជនសង្ស័យទាំងពីររូបនេះប្រគល់ជូនសាលាដំបូងខេត្តកំពត កាលពីថ្ងៃទី២០ មីនា ២០១៤ និងត្រូវបានឃុំខ្លួននៅពន្ធនាគារខេត្ត រង់ចាំការកាត់ទោសទៅតាមនីតិវិធីច្បាប់ ៕
ចែករំលែកព័តមាននេះ