ប្រទេសស៊ីរី ៖ រដ្ឋមន្ត្រីការបរទេសរុស្ស៊ីលោកស័រហ្គេយឡាវរ៉ូវ ក្នុងបទសម្ភាសន៍មួយជាមួយកាសែតរុស្ស៊ី TROUD និយាយថា ទោះបីនៅមានភាពតានតឹងតាមកន្លែងខ្លះ មិនស្ថិតក្រោមការត្រួតត្រារបស់រដ្ឋាភិបាលស៊ីរីដូចជានៅខេត្តអ៊ីដលីបជាដើម តែសង្គ្រាមនៅស៊ីរីអាចចាត់ទុកថាបញ្ចប់ទាំងស្រុងហើយ។
លោកបន្តថា ស៊ីរីវិលជាបន្តបន្ទាប់ មករកជីវភាពធម្មតាវិញក្រោយបញ្ចប់សង្ក្រាម។ភាពតានតឹងដាច់ដោយឡែកនៅមានតែ ក្នុងបណ្ដាតំបន់ដែលមិនស្ថិតក្រោមការត្រួតត្រារបស់រដ្ឋាភិបាល ដូចជាតំបន់អ៊ីដលីបនិងនៅច្រាំងខាងកើតនៃទន្លេEUPHRATE។ លោកថាក្នុងលក្ខខណ្ឌបែបនេះ ទិសដៅនៃផែនការដំបូងគឺផ្ដោតលើជំនួយមនុស្សធម៌មួយដល់ស៊ីរីហើយធ្វើឲ្យមានការរីកចម្រើន ដល់ដំណើរការនយោបាយ លើដំណោះស្រាយវិបត្តិ ដើម្បីឲ្យសម្រេចបានស្ថេរភាពរយៈពេលយូរអង្វែងមួយក្នុងប្រទេសនេះ ព្រមទាំងក្នុងតំបន់មជ្ឈឹមបូព៌ានិយាយរួម។
ប្រមុខការទូតរុស្ស៊ីអះអាងថា រុស្ស៊ីបានផ្ដល់សារសំខាន់ខ្លាំង លើការថែរក្សាការប្រាស្រ័យទាក់ទងគ្នាដោយទៀងទាត់ រវាងបណ្ដាភាគីស៊ីរីហើយជាពិសេសជាមួយពួកប្រឆាំង។ លោកអំពាវដល់គ្រប់ក្រុមទាំងអស់នៃសង្គមស៊ីរី ឲ្យចូលរួមក្នុងដំណើរការនយោបាយ។
ជារួមរុស្ស៊ីការពារការកសាងស៊ីរីអធិបតេយ្យឡើងវិញជាមួយបូរណភាពដែនដី និងលុបបំបាត់ឲ្យបានឆាប់រហ័សបណ្ដាផលវិបាកនៃភេរវកម្ម ការវិលត្រឡប់របស់ពលរដ្ឋស៊ីរីទាំងអស់មកកាន់ប្រទេសពួកគេវិញ ព្រមទាំងការវិលត្រឡប់របស់ប្រទេសមកក្នុងផ្ទៃគ្រួសារអារ៉ាប់ ដែលបែបនោះនឹងជួយធានាដល់សន្តិសុខនិងស្ថេរភាពនៅមជ្ឈឹមបូព៌ា៕ (កែសម្រួលដោយ ៖ បុប្ផា)
ចែករំលែកព័តមាននេះ