ខេត្តកណ្ដាល ៖ ភ្នំប្រសិទ្ធមានឈ្មោះ ដើម «ភ្នំឫសីសិទ្ធិ» មិនត្រឹមតែជាទីកន្លែងដ៏ស័ក្តិសិទ្ធ ដែលអ្នកស្រុកទីជិតឆ្ងាយតែងតែទៅបន់ស្រន់សុំសេចក្ដីសុខ សុំលាភសុំជ័យ ពីអ្នកតាម្ចាស់ភ្នំ និងពីទសបារមី នានាដែលស្ថិតនៅលើភ្នំនេះប៉ុណ្ណោះទេ ប៉ុន្តែក៏ជាទីរមណីយដ្ឋានសម្រាប់ទៅលេងកម្សាន្តពេលឈប់សម្រាកពីការងារនាចុងសប្ដាហ៍ ឬថ្ងៃបុណ្យទានផ្សេងៗទៀតផងដែរ ។ មិនតែប៉ុណ្ណោះ កាលពីសម័យដើមភ្នំនេះ គឺជាទីកន្លែងសម្រាប់អ្នកស្រុកជិតឆ្ងាយទៅសំណាក់ភាវនាធម៌ ស្វែងរកសេចក្ដីសុខ ក្នុងផ្លូវព្រះធម៌ ក្នុងជំនឿយ៉ាងមុតមាំ ។
បើយោងតាមអ្នកមើលការខុសត្រូវទីភ្នំនេះប្រាប់ថា សព្វថ្ងៃក៏មានទាំងភ្ញៀវទេសចរណ៍បរទេស ទៅលេងភ្នំនេះដែរ មានដូចជា ជនជាតិចិន វៀតណាម បារាំង និងជនជាតិផ្សេងៗទៀត ។ ទោះបីជាភ្ញៀវបរទេសដែលទៅលេងមិនទាន់មានចំនួនច្រើន និងទៅជាប្រចាំរាល់ថ្ងៃក្ដី ប៉ុន្តែក៏ចាត់ទុកថាទីនោះ គឺជាតំបន់ទេសចរណ៍មួយនៅជិតបង្កើយដែលកៀក និងរាជធានីភ្នំពេញ ។ អ្វីដែលគួរតែដឹងថែមទៀតនោះ គឺឈ្មោះដើមព្រមទាំងប្រវត្តិរឿងភ្នំមួយនេះដែលមានជាប់ទាក់ទងយ៉ាងជ្រៅទៅនឹងសាច់រឿង «បក្សីចាំក្រុង» គឺជាទីកន្លែងដែលតាគហេ នាំព្រះរាជកុមារបក្សីចាំក្រុង រត់គេចខ្លួនពីការតាមកាប់សម្លាប់របស់កងទ័ពព្រះបាទព្រហ្មកិលពញាក្រែក ។ ចេញពីតំបន់វត្តវិហារសួរសព្វថ្ងៃមកលាក់ខ្លួនពួនអាត្មានៅលើភ្នំប្រសិទ្ធនេះប្រកបដោយសុវត្ថិភាព និងភាពសុខសាន្តកងទ័ពរកមិនឃើញឡើយរហូតដល់ពេលដែលបក្សីចាំក្រុងបានឡើងសោយរាជ្យជាស្ដេច បន្ទាប់ពីព្រះបាទពញាក្រែកដែលជាសត្រូវសោយទីវង្គតទៅ ។
មិនតែប៉ុណ្ណោះដំបូងឡើយភ្នំនេះ មិនទាន់មានឈ្មោះនៅឡើយទេ ហើយសម័យកាលនោះក៏ពុំ មានអ្នកស្រុកណាហ៊ានចូលទៅដល់ដែរ គឺជាទីដែលព្រះមនុឥសីតាំងធម៌ ។ ប៉ុន្តែក្រោយពេលចូលទៅលាក់ខ្លួនបានរួចផុតពីគ្រោះថ្នាក់ហើយតាគហេ តែងតែបន់ស្រន់ដល់អារុកអារក្សអ្នកតាម្ចាស់ភ្នំ និងព្រះ មុនីឥសីដែលធ្វើចង្ក្រមភាវនាធម៌នៅទីព្រៃភ្នំនោះរាល់ថ្ងៃ ដោយសេចក្ដីប្រាថ្នាថា «សូមឲ្យបក្សីចាំក្រុង ជាចៅបានរួចផុតពីគ្រោះថ្នាក់ និងបានសោយរាជ្យជាស្ដេច» ។
លុះ២០ឆ្នាំ ក្រោយមកបក្សីចាំក្រុងក៏បានសោយរាជ្យជាស្ដេចដូចការបន់ស្រន់របស់គាត់មែន ទើបតាគហេ បានសន្មត់ឈ្មោះទីភ្នំនេះថា «ភ្នំឫសីសិទ្ធិ» ដែលមានន័យថា «ភ្នំរបស់ឥសី សឹងប្រកបតាមប្រាថ្នា» ហើយក្រោយៗមកទៀតអ្នកស្រុកបាននាំគ្នាហៅក្លាយទៅជា « ភ្នំប្រសិទ្ធ» ។ ជាងនេះទៅទៀតនោះអ្នកស្រុកភាគច្រើនបានបន្តហៅក្លាយទៀតថា «ភ្នំបាសិត» ទៅវិញ ។
បើតាមស្ថានភាពជាក់ស្ដែងភ្នំប្រសិទ្ធនេះមាន២ ដោយស្ថិតនៅអមសងខាងផ្លូវគឺ ទី១ ភ្នំប្រសិទ្ធ ខាងជើង ឬអ្នកស្រុកតែងហៅថា «ភ្នំប្រសិទ្ធត្រ័យត្រឹង្ស» ឬហៅមួយបែបទៀតថា «ភ្នំតាខ្ញី» ព្រោះកាលពីអំឡុងទសវត្សរ៍ឆ្នាំ១៩៥០មានព្រះសង្ឃ១អង្គគង់នៅទីនោះមានម្រាមដៃម្រាមជើងខ្ញី ទើបអ្នកស្រុក ហៅថាភ្នំតាខ្ញីបែបនេះ ។ ភ្នំនេះមានទីតាំងស្ថិតនៅក្នុងភូមិតាពេជ្រ ឃុំឈ្វាំង ស្រុកពញាឮ ខេត្តកណ្ដាល ។ នៅជួរភ្នំត្រ័យត្រឹង្សនេះដែរក៏មានភ្នំក្រាយ និងភ្នំតាប៉ុក ប៉ុន្តពេលនេះភ្នំតាប៉ុកត្រូវរលាយបាត់ ស្រមោលក្លាយទៅជាដីទំនាបបាត់ទៅហើយដោយសារតែក្រុមហ៊ុនថៃមួយធ្វើការវាយ និងដាក់គ្រឿងផ្ទុះ យកថ្មលក់ធ្វើផ្លូវថ្នល់ និងសំណង់ផ្សេងៗកាលពីប៉ុន្មានឆ្នាំមុនកន្លងមក ។
ដោយឡែកទី២ គឺភ្នំប្រសិទ្ធខាងត្បូងអ្នកស្រុកហៅថា «ភ្នំប្រសិទ្ធពពកវិល ឬភ្នំប្រសិទ្ធជ្រៃទ្រេត ហើយបច្ចុប្បន្ននេះអ្នកស្រុកបានហៅថា «ភ្នំប្រសិទ្ធគង់ស៊ីអ៊ីម» ព្រោះមានការកសាងព្រះវិហារចិន និងរូបសំណាកព្រះនាងគង់ស៊ីអ៊ីមនៅលើកំពូលភ្នំមួយនោះ ។ ប៉ុន្តែទោះជា បែបណាគួរតែហៅតាម ឈ្មោះដើមវិញ ប្រសើរជាង ដើម្បីកុំឲ្យបាត់តំណែលចាស់ ហើយនៅជួរភ្នំនេះមានភ្នំប្រសិទ្ធលើ ភ្នំប្រសិទ្ធក្រោម និងភ្នំរាប ។
សព្វថ្ងៃភ្នំប្រសិទ្ធពពកវិល ឬភ្នំប្រសិទ្ធជ្រៃទ្រេត នេះមានទីតាំងស្ថិតនៅក្នុងដែន រដ្ឋបាលឃុំម្កាក់ ស្រុកអង្គស្នួល ខេត្តកណ្ដាល ។ បើនិយាយជារួមភ្នំទាំង២នេះ ស្ថិតនៅមិន ឆ្ងាយប៉ុន្មានពីរាជធានីភ្នំពេញឡើយ និងមានព្រំប្រទល់ជាប់គ្នារវាងស្រុកទាំង២ខាងលើជាមួយ និងសង្កាត់ព្សាំង ខណ្ឌព្រែកព្នៅ រាជធានីភ្នំពេញថែមទៀតផង ។
គួរបញ្ជាក់ផងដែរថា ប្រសិនបើលោកអ្នកធ្វើដំណើរចេញពីភ្នំពេញតាមផ្លូវជាតិលេខ៥ ហួសស្ពាន ព្រែកព្នៅ ឬស្ពានលីយុងផាត់ដល់ផ្សារព្រែកព្នៅ សូមលោកអ្នកបត់ចូលកាត់តាមផ្សារនោះចម្ងាយ ជាង១០គីឡូម៉ែត្រនោះលោកអ្នក និងបានទៅដល់ភ្នំប្រសិទ្ធនោះហើយ ៕ កែសម្រួលដោយ ៖ សុឃាក់
ចែករំលែកព័តមាននេះ