ខេត្តមណ្ឌលគិរី ៖ ស្ត្រីសង្ស័យម្នាក់ក្នុងសំណុំរឿងឃាតកម្មបាញ់សម្លាប់ប្តី-ប្រពន្ធមួយគូ ត្រូវសមត្ថកិច្ចបញ្ជូនទៅសាលាដំបូងខេត្តហើយ កាលពីថ្ងៃទី១១ កញ្ញា ខណៈជនសង្ស័យម្នាក់ទៀតកំពុងសំងំលាក់ខ្លួនក្នុងព្រៃនៅឡើយ ។ ស្ត្រីសង្ស័យរូបនេះ ឈ្មោះយាយ…
ខេត្តមណ្ឌលគិរី ៖ ស្ត្រីសង្ស័យម្នាក់ក្នុងសំណុំរឿងឃាតកម្មបាញ់សម្លាប់ប្តី-ប្រពន្ធមួយគូ ត្រូវសមត្ថកិច្ចបញ្ជូនទៅសាលាដំបូងខេត្តហើយ កាលពីថ្ងៃទី១១ កញ្ញា ខណៈជនសង្ស័យម្នាក់ទៀតកំពុងសំងំលាក់ខ្លួនក្នុងព្រៃនៅឡើយ ។ ស្ត្រីសង្ស័យរូបនេះ ឈ្មោះយាយ អាន បានឆ្លើយសារភាពថា «ខ្លួនពិតជាអ្នកបាញ់សម្លាប់ជនរងគ្រោះទាំងពីរនាក់មែន» ឯប្តីគាត់មិនបានដឹងទេ តែបានយកកាំភ្លើងទៅលាក់ទុកក្នុងព្រៃ ។ ទោះជាយ៉ាងណា សមត្ថកិច្ចកំពុងព្យាយាមតាមចាប់ខ្លួនបុរសជាប្តីរបស់ជនដៃដល់ ដែលសំងំលាក់ខ្លួននៅក្នុងព្រៃ និងបានយកកាំភ្លើងដែលប្រពន្ធប្រើបាញ់សម្លាប់ដៃគូទំនាស់ទៅជាមួយ ។
នគរបាលបានបញ្ជាក់ថា ជុំវិញករណីនេះ សមត្ថកិច្ចមានការពិបាកក្នុងការស្វែងរកអ្នកពាក់ព័ន្ឋ(ប្តីរបស់ជនសង្ស័យ) ដែលបានយកកាំភ្លើងទៅលាក់ទុក ព្រោះបញ្ហាភូមិសាស្ត្រស្មុគស្មាញសម្បូរព្រៃធំៗ។ អ្នក នាំពាក្យសាលាដំបូងខេត្តមណ្ឌលគិរីបានឲ្យដឹងដែរថា ស្ត្រីជនសង្ស័យក្នុងករណីឃាតកម្ម បច្ចុប្បន្នកំពុងឃុំខ្លួននៅពន្ឋនាគារខេត្តដើម្បីចាត់ការទៅតាមនិតិវិធីតាមច្បាប់បន្ថែមទៀត។
គួររំលឹកថា កាលពីព្រឹកថ្ងៃទី០៨ កញ្ញា កន្លងមក សពប្ដីប្រពន្ធ ២នាក់ ត្រូវបានសមត្ថកិច្ចស្រុកកូនមុំ ខេត្តរតនគិរី(មានភូមិសាស្ត្រជិតកន្លែងកើតហេតុជាងសមត្ថកិច្ចខេត្តមណ្ឌលគិរី) ដឹកយកទៅតំកល់ នៅវត្តអូរភ្លង ស្រុកកូនមុំ ខេត្តរតនគិរី ក្រោយពីកើតហេតុការណ៍ បាញ់ប្រហារ ដោយកខ្មាន់កាំភ្លើង២នាក់ ប្ដីប្រពន្ធ កាលពីវេលាម៉ោ ង៧និង៣០នាទី យប់ថ្ងៃទី០៧ ខែកញ្ញា ឆ្នាំ២០ ១៩ នៅតំបន់អនាធិបតេយ្យព្រៃខៀវ ឃុំរយ៉ ស្រុកកោះញែក ខេត្តមណ្ឌលគិរី។
សពជនរងគ្រោះ មានឈ្មោះ រ៉ា ហៅ ម៉ៅ អាយុ៣៧ឆ្នាំ ជាប្ដី ប្រពន្ធមានឈ្មោះ អុល អាយុ៣៣ ឆ្នាំ។ សពអ្នកទាំង២នាក់ ជាជនជាតិខ្មែរ ទើបមកពីខេត្តកំពង់ធំ ធ្វើចំការ នៅចំណុចខាងលើបាន៩ខែ មានកូនតូចៗ ៣នាក់ កូនប្រុសច្បងអាយុ ៧ឆ្នាំ កូនទី២ស្រី អាយុ៥ឆ្នាំ និងប្អូនទី៣ ស្រី អាយុ៤ឆ្នាំ។ បើតាមការឲ្យដឹងពីអ្នកជិត ខាង ក្រុមគ្រួសារទាំងពីរ មានទំនាស់ទាស់គ្នា ជាច្រើនលើកច្រើនសារមកហើយព្រោះ រឿងដី ដែលជនដៃដល់បានឲ្យទៅជនរងគ្រោះ។ក្រោយមកក្រុមគ្រួសារអ្នកទាំងពីរ ក៏មានទំនាស់នឹងគ្នា ហើយជនដៃដល់ទាមទារយកដីមកវិញ តែខាងជនរងគ្រោះមិនព្រមឲ្យ។ ក្រុមគ្រួសារទាំងពីរនេះ តែងតែឈ្លោះប្រកែកគ្នាជារើយៗ។
លុះដល់ថ្ងៃកើតហេតុ ជនរងគ្រោះរួមទាំងអ្នកជិតខាងបានចាក់ធុងបាស ផឹកស្រា មានគ្នា ៥ ទៅ ៦នាក់ តាំងពីម៉ោង ប្រមាណជាង៣ រសៀល រហូតដល់ម៉ោង៧យប់ ទើបឈប់។នៅពេលក្រុមជនរងគ្រោះបំបែគគ្នាឈប់ផឹកវិលត្រឡប់ទៅផ្ទះវិញនោះ ជនដៃដល់ក៏បានមកស្ទាក់តាមផ្លូវ រករឿងឈ្លោះប្រកែកគ្នា រឿងចាក់ធុងបាស់ ហើយជនរងគ្រោះឮដូច្នោះ ក៏បានចេញពីផ្ទះទាំងពីរនាក់ប្ដីប្រពន្ធ ទៅសួរនាំ ហើយត្រូវបានខ្មាន់កាំភ្លើងទាំងពីរនាក់ប្ដីប្រពន្ធជិតខាងនោះ បាញ់ប្រហារ ទៅលើប្ដីប្រពន្ធជនរងគ្រោះ បណ្ដាលឲ្យស្លាប់ភ្លាមៗនៅនឹងកន្លែងតែម្តង ។ (សម្រួលដោយ៖ ស្រីណា)
ចែករំលែកព័តមាននេះ