រាជធានីភ្នំពេញ ៖ ដើម្បីជាការឆ្លើយតបចំពោះសំណូមពរ និងការតវ៉ារបស់បេក្ខជនមួយចំនួនតូចចំពោះលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ១៩ សីហា ក្រសួងអប់រំយុវជន និងកីឡាបានបង្កើតគណៈកម្មការពិនិត្យ និងដោះស្រាយការតវ៉ារបស់បេក្ខជន ដើម្បី ពិនិត្យ…
រាជធានីភ្នំពេញ ៖ ដើម្បីជាការឆ្លើយតបចំពោះសំណូមពរ និងការតវ៉ារបស់បេក្ខជនមួយចំនួនតូចចំពោះលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ១៩ សីហា ក្រសួងអប់រំយុវជន និងកីឡាបានបង្កើតគណៈកម្មការពិនិត្យ និងដោះស្រាយការតវ៉ារបស់បេក្ខជន ដើម្បី ពិនិត្យ និងដោះស្រាយករណីទាំងនោះក្នុងបំណងធ្វើឱ្យបេក្ខជន និងអ្នកអាណាព្យាបាលមាន សេចក្តីទុកចិត្ត និងទទួលយកលទ្ធផលនៃការប្រឡង ។
ការបង្កើតគណៈកម្មការនេះ បន្ទាប់ពីមានបេក្ខជនមួយចំនួនបាននាំគ្នាមកតវ៉ានៅមុខក្រសួងអប់រំ កាលពីថ្ងៃទី១១ កញ្ញា ចំពោះលទ្ធផលរបស់ពួកគេ ។ យោងតាមសេចក្តីប្រកាសព័ត៌មានរបស់ក្រសួងអប់រំចេញ នៅថ្ងៃទី១២ កញ្ញានេះបានឲ្យដឹងថា ដំណើរការប្រឡងសញ្ញាបត្រមធ្យមសិក្សាទុតិយភូមិសម័យប្រឡង ៖ ១៩ សីហា ២០១៩ បានឈានដល់ដំណាក់កាលប្រកាសលទ្ធផលជាសាធារណៈកាលពីថ្ងៃទី៩ និងទី១០ ខែកញ្ញានេះ ។
ក្រសួងអប់រំ យុវជន និងកីឡាបានចេញសេចក្តីប្រកាសព័ត៌មានស្តីពីលទ្ធផលប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ៖ ១៩ សីហា ២០១៥ កាលពីថ្ងៃ៩ ខែកញ្ញា ឆ្នាំ២០១៥ និងសារលិខិតរបស់លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាជូនចំពោះបេក្ខជនប្រឡង មាតាបិតា និង អាណាព្យាបាល លោកគ្រូ អ្នកគ្រូ និងអ្នកពាក់ព័ន្ធទាំងអស់ កាលពីថ្ងៃទី១០ ខែកញ្ញា ក្នុងន័យផ្សព្វផ្សាយ និងពន្យល់បកស្រាយជូនសាធារណជនទាំងអស់នូវលក្ខណៈបច្ចេកទេសការចេញវិញ្ញាសាប្រឡង និងលំដាប់លំដោយនៃការរៀបចំ និងការប្រព្រឹត្តទៅនៃការប្រឡង ។
ប្រភពបានបញ្ជាក់ថា បន្ទាប់ពីការប្រកាសលទ្ធផលជាសាធារណៈ បេក្ខជនមួយចំនួនដែល មិនពេញចិត្តនឹងលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ បានមកដាក់ពាក្យតវ៉ា ដើម្បីស្នើឱ្យមានការពិនិត្យឡើងវិញលើលទ្ធផលនៃការប្រឡងរបស់ខ្លួន ។ ក្រសួងអប់រំយុវជន និងកីឡាបានរៀបរាប់យ៉ាងដូច្នេះ ដំណើរការនៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡ ង៖ ១៩ សីហា ២០១៩ មាន៣ដំណាក់កាលបច្ចេកទេស គឺដំណាក់កាលសំណេរ ដំណាក់កាលកំណែ និងដំណាក់កាលបូកស្រង់ពិន្ទ ។ ដំណាក់កាលនីមួយៗមានយន្តការត្រួតពិនិត្យផ្នែកបច្ចេកទេសយ៉ាងហ្មត់ចត់ជាទីបំផុត ។ ដើម្បីធានាបានសុក្រឹត្យភាពនៅដំណាក់កាលកំណែក្រសួងបានបង្កើតគណៈកម្មការបច្ចេកទេសជាច្រើនមានជាអាទិ៍ គណៈកម្មការរៀបចំអត្រាកំណែដែលមានសមាសភាពសាស្តាចារ្យ ដែលមានបទពិសោធន៍ ខ្ពស់បំផុតក្នុងការបង្រៀន និងការរៀបចំអត្រាកំណែជាច្រើនឆ្នាំព្រមទាំងឆ្លងកាត់គណៈកម្មការត្រួតពិនិត្យបច្ចេកទេសកំណែបន្ថែមទៀត ។
ការកែសន្លឹកកិច្ចការរបស់បេក្ខជនត្រូវបានធ្វើឡើងដោយលក្ខណៈសម្ងាត់ និងយុត្តិធម៌ តាមរយៈការផ្តល់ពិន្ទុ ដោយសាស្ត្រាចារ្យ២រូបលើសន្លឹកកិច្ចការតែមួយ ដើម្បីធានាសង្គតិភាពលើការកែ ។ ជាមួយគ្នានោះដែរ ក្រសួងបានអះអាងថា តាមរយៈបទពិសោធន៍នាឆ្នាំកន្លងមកនៅដំណាក់កាលបូកស្រង់ពិន្ទុដោយប្រព័ន្ធកុំព្យូទ័រក្រសួងបានរៀបចំបង្កើតមជ្ឈមណ្ឌលបូកស្រង់ ពិន្ទដោយបានកែលម្អប្រព័ន្ធហេដ្ឋារចនាសម្ព័ន្ធ Hardware និងដាក់ឲ្យប្រើប្រាស់នូវប្រព័ន្ធ Software ថ្មី ព្រមទាំងមានយន្តការត្រួតពិនិត្យដែលអនុលោមទៅតាម Protocol បច្ចេកវិទ្យា និងគណៈកម្មការត្រួតពិនិត្យផ្ទៀងផ្ទាត់ក៏ដូចជា គណៈកម្មការកោសល្យវិច្ច័យ ។
ដោយឡែកមន្ត្រីអប់រំដែលត្រូវបានជ្រើសរើសឲ្យបំពេញភារកិច្ចក្នុងដំណើរបញ្ចូលពិន្ទុលើ ប្រព័ន្ធកុំព្យូទ័របានឆ្លងកាត់ការប្រឡងធ្វើតេស្តសមត្ថភាព និងវគ្គបំពាក់បំប៉នបច្ចេកទេសបន្ថែម ។ ក្រសួងអប់រំ យុវជន និងកីឡាសូមវាយតម្លៃខ្ពស់ចំពោះមន្ត្រីអប់រំដែលបានបំពេញភារកិច្ចក្នុងដំណើរការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ១៩ សីហា ២០១៩ ដោយបានគោរពតាមកម្រងភារកិច្ច អនុលោមកម្មទៅតាមគោលការណ៍ច្បាប់រក្សាយុត្តិធម៌ និងការសម្ងាត់ ដែលធានាថា លទ្ធផលនៃការប្រឡង គឺអាចទទួលយកបាន ។
ក្នុងចំណោមបេក្ខជនដែលមានវត្តមានក្នុងការប្រឡងចំនួន១១៥២០៨នាក់ មានបេក្ខជនប្រឡងជាប់សរុប៧៩០៥២នាក់ ដែលត្រូវជា៦៨,៦២ % ។ ក្រសួងបានគូសបញ្ជាក់ថា ជាការឆ្លើយតបចំពោះសំណូមពរ និងការតវ៉ារបស់បេក្ខជនមួយចំនួនតូចចំពោះលទ្ធផលនៃការប្រឡងនេះក្រសួងបានបង្កើតគណៈកម្មការពិនិត្យ និងដោះស្រាយការតវ៉ារបស់បេក្ខជន ដើម្បីពិនិត្យ និងដោះស្រាយករណីទាំងនោះក្នុងបំណងធ្វើឱ្យបេក្ខជន និងអ្នក អាណាព្យាបាលមាន សេចក្តីទុកចិត្ត និងទទួលយកលទ្ធផលនៃការប្រឡង» ។
ក្នុងករណីតវ៉ាមានបេក្ខជនមួយចំនួនបានតវ៉ាពុំសុខចិត្តលើលទ្ធផលធ្លាក់ ប៉ុន្តែក៏មានបេក្ខជនមួយចំនួនទៀតពុំសុខចិត្តដោយសារទទួលបាននិទ្ទេសត្រឹម «B» ឬ «C» ហើយទាមទារយកនិទ្ទេស« A»។ ក្រសួងបានផ្តាំទៅបេក្ខជនទាំងអស់ចងចាំថា លទ្ធផលប្រឡងបញ្ចាំងមានសារៈសំខាន់បីយ៉ាង គឺ ទី១- អ្នកចេះ គឺជាប់ ទី២-ការប្រឡងបានប្រព្រឹត្តទៅដោយយុត្តិធម៌ តម្លាភាព គោល ការណ៍ច្បាប់ និងភាពទទួលយកបាន និងទី៣- លទ្ធផលប្រឡងពុំមែនជាការកំណត់វាសនារបស់បេក្ខជនទេ ប៉ុន្តែជាការវាស់ស្ទង់សមត្ថភាព និងជំរុញឱ្យមានការខំប្រឹងបន្តទៅ មុខទៀត ៕ កែសម្រួលដោយ ៖ សុឃាក់
ចែករំលែកព័តមាននេះ