រាជធានីភ្នំពេញ ៖ ក្រសួងមហាផ្ទៃនឹងបើកកិច្ចប្រជុំពិសេសមួយក្នុងសប្តាហ៍នេះ ដើម្បីកំណត់ឲ្យឧកញ៉ាក្នុងជួរនគរបាលបោះបង់តួនាទីមួយ និងរក្សាតួនាទីមួយ ។ តាមប្រភពព័ត៌មាននានា បានបង្ហាញពីតួលេខមិនច្បាស់លាស់ពីមន្ត្រីមានងារជាឧកញ៉ា ហើយកំពុងមានតួនាទីខ្ពស់ក្នុងជួរកងកម្លាំងប្រដាប់អាវុធ ដែលរហូតមកដល់ពេលនេះ បើយោងតាមវិទ្យុបារាំងអន្តរជាតិបង្ហាញថា បានកើនដល់ចំនួន១៣២នាក់ក្នុងនោះឧកញ៉ាជិត១០០នាក់ជាមន្ត្រីយោធា ។
តាមប្រភពដដែលថា ក្រសួងមហាផ្ទៃគ្រោងនឹងបើកកិច្ចប្រជុំពិសេសមួយនៅថ្ងៃព្រហស្បតិ៍សប្តាហ៍នេះ ដើម្បីឲ្យឧកញ៉ាចំនួន៣២នាក់ជ្រើសរើសជាចុងក្រោយរវាងតួនាទីខ្ពស់ក្នុងក្រសួងមហាផ្ទៃ និងងារជាឧកញ៉ាដែលតំណាងឲ្យអ្នកកាន់កាប់មុខជំនួញមានទ្រព្យសម្បត្តិហូរហៀរ។ នេះបើតាមការបញ្ជាក់របស់អ្នកនាំពាក្យក្រសួងមហាផ្ទៃ។ ក្រៅពីចំនួនឧកញ៉ាក្នុងក្របខណ្ឌនគរបាល ជាតិ ក្រសួងការពារជាតិក៏បានរកឃើញថា ចំនួនឧកញ៉ាដែលកំពុងកាន់តួនាទីសំខាន់ៗក្នុងកងកម្លាំងយោធាបានកើនដល់ចំនួន៩៩នាក់ ។
នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃបានប្រាប់វិទ្យុសំឡេងសហរដ្ឋអាមេរិក(VOA) នៅថ្ងៃចន្ទទី៩ ខែកញ្ញាថា ក្នុងក្របខណ្ឌក្រសួងមហាផ្ទៃមានឧកញ៉ាចំនួន៣៣នាក់ ដែលក្នុងចំណោមនោះមានឧកញ៉ាម្នាក់បានលាលែងពីតួនាទីជាមន្ត្រីមុនការប្រកាសគោលការណ៍របស់ក្រសួង ។ លោកបន្តថា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្តេចក្រឡាហោម ស ខេងនឹងបើកកិច្ចប្រជុំមួយនៅថ្ងៃព្រហស្បតិ៍ទី១២ ខែកញ្ញា ដើម្បីសម្រេចថាតើឧកញ៉ាទាំងនោះនឹងត្រូវជ្រើសយកតួនាទីក្នុងក្របខណ្ឌនគរបាល ឬក៏រក្សាងារជាឧកញ៉ា ។
«ជាគោលការណ៍ ប្រសិនបើគាត់ស្ម័គ្រចិត្ត លាលែងពីណាមួយវាគឺជាការល្អ ។ ដូច្នេះហើយបានជាក្នុងរឿងនេះ សម្តេចក្រឡាហោមលោកនឹងបើកកិច្ចប្រជុំមួយនៅថ្ងៃទី១២ ខែកញ្ញា លោកនឹងដឹកនាំការងារហ្នឹង» ។ ចំណែកនាយឧត្តមសេនីយ៍ ឈុំ សុជាត អ្នកនាំ ពាក្យក្រសួងការពារជាតិ លើកឡើងថា រហូតមកដល់ពេលនេះ ចំនួនឧកញ៉ាដែលស្ថិតក្នុងជួរកងកម្លាំងយោធាមានចំនួន៩៩នាក់ ក្នុងនោះមានក្របខណ្ឌក្រសួងចំនួន៣៤នាក់ និងក្នុងក្របខណ្ឌអគ្គបញ្ជាការមានចំនួន៦៥នាក់ ។ លោកបន្តថា មានឧកញ៉ាមួយចំនួនបានបញ្ជាក់ពីចេតនាលាឈប់ពីតួនាទីជាន់ខ្ពស់ក្នុងយោធាដើម្បីរក្សាងារជាឧកញ៉ ។ ប៉ុន្តែនៅមិនទាន់មានការធ្វើតាមនីតិវិធីជាផ្លូវការនៅឡើយ ។
ក្រុមមន្ត្រីផ្លូវការអះអាងថា បទបញ្ជារបស់សម្តេចតេជោ ហ៊ុន សែន គឺ «ដើម្បីលុបបំបាត់ទំនាស់ផលប្រយោជន៍រវាងឈ្មួញដែលតំណាងឲ្យឧកញ៉ា និងមន្ត្រីដែលមានតួនាទីខ្ពស់ក្នុងរាជរដ្ឋាភិបាល» ។ការដាក់បញ្ជារបស់ប្រមុខរាជរដ្ឋាភិបាលកម្ពុជា គឺក្រោយពីមានមន្ត្រីយោធា២រូបដែលមានងារជាឧកញ៉ា ត្រូវបានចាប់ខ្លួន និងចោទប្រកាន់តាមផ្លូវតុលាការ នៅពេលឃើញថា មន្ត្រីយោធារូបនោះបានប្រព្រឹត្តបទល្មើសទាក់ទងនឹង ឧក្រិដ្ឋកម្មកាប់បំផ្លាញព្រៃឈើ ។
ចំណែកឧកញ៉ាមួយចំនួនទៀត ដែលមានតួនាទីក្នុងជួរកម្លាំង ប្រដាប់អាវុធដែរនោះ ក៏មានការពាក់ព័ន្ធនឹងការប្រព្រឹត្តបទឧក្រិដ្ឋធ្ងន់ធ្ងរផ្សេងៗនាពេលកន្លងមក។ នេះបើផ្អែកតាមសេចក្តីរាយការណ៍នានារបស់សារព័ត៌មានក្នុងស្រុក ៕
ចែករំលែកព័តមាននេះ