រាជធានីភ្នំពេញ ៖ កម្ពុជានឹងធ្វើជាម្ចាស់នៃកិច្ចប្រជុំថ្នាក់រដ្ឋមន្ត្រីស្តីពីកិច្ចសហប្រតិបត្តិការលើកវិស័យការងារដោយផ្តោតលើកិច្ចគាំពារពលករទេសន្តប្រវេសន៍នៅពាក់កណ្តាលខែកញ្ញានេះ ។ នេះបើក្រសួងការងារ ។
យោងតាមសេចក្តីប្រកាសព័ត៌មានក្រសួងការងារ និងបណ្តុះបណ្តាលវិជ្ជាជីវៈចេញផ្សាយកាលពីថ្ងៃទី១០ កញ្ញានេះបានឲ្យដឹងថា ក្រសួងការងារនឹងទទួលធ្វើជាម្ចាស់ផ្ទះរៀបចំកិច្ចប្រជុំថ្នាក់មន្ត្រីជាន់ខ្ពស់ការងារលើកទី៥ និងសន្និសីទថ្នាក់រដ្ឋមន្ត្រីការងារលើកទី៣ ស្តីពីកិច្ចសហប្រតិបត្តិការលើវិស័យការងារសម្រាប់ប្រទេសកម្ពុជា ឡាវ មីយ៉ាន់ម៉ា ថៃ និងវៀតណាម ក្រោមប្រធានបទ «ការឆ្ពោះទៅកាន់កិច្ចគាំពារពលករទេសន្តរប្រវេសន៍នៅក្នុងប្រទេស CLMTV ៖ កិច្ចសហប្រតិបត្តិការវិស័យសន្តិសុខសង្គម» នៅថ្ងៃត្រូវនឹងថ្ងៃទី១៦-១៧ ខែកញ្ញានេះ នៅខេត្តសៀមរាប ។
ក្រសួងក៏បានឲ្យដឹងថា កិច្ចប្រជុំសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជានឹងអញ្ជើញចូលរួមជាអធិបតីភាពដ៏ខ្ពង់ខ្ពស់ក្នុងពិធីបើកសន្និសីទថ្នាក់រដ្ឋមន្ត្រីការងារលើកទី៣នេះ នាព្រឹកថ្ងៃទី១៧ ខែកញ្ញា ។ គោលបំណងដ៏ចម្បងរបស់សន្និសីទ គឺដើម្បីពិភាក្សាស្វែងរកក្របខ័ណ្ឌរួមមួយពាក់ព័ន្ធនឹងការធ្វើចល័តភាពរបបសន្តិសុខសង្គមសម្រាប់ពលករទេសន្តរប្រវេសន៍នៅក្នុងប្រទេស CLMTV ដូចតទៅ ៖ បើកកម្ពស់បន្ថែមទៀតនៃកិច្ចសហប្រតិបត្តិការលើវិស័យការងារក្នុងប្រទេស CLMTV • ជំរុញឱ្យមានការបន្តការចែករំលែកបទពិសោធន៍ និងការអនុវត្តល្អៗក្នុងចំណោមប្រទេស CLMTV ពាក់ព័ន្ធនឹងការការពារ និងការលើកកម្ពស់សិទ្ធិពលករទេសន្តរប្រវេសន៍ ជាពិសេសចល័តភាពនៃរបបសន្តិសុខសង្គម ពិភាក្សាឲ្យមានការឯកភាពគ្នាលើយន្តការរួមមួយ ដើម្បីឈានទៅកំណត់អំពីការអនុវត្តចល័តភាពនៃរបបសន្តិសុខសង្គមនាពេលអនាគត ។ ធ្វើការឆ្ពោះទៅកាន់ការរៀបចំក្របខ័ណ្ឌរួមមួយសម្រាប់ប្រទេស CLMTV ស្តីពីចល័តភាពនៃរបបសន្តិសុខសង្គមសម្រាប់ពលករទេសន្តរប្រវេសន៍ ។
តាមរយៈប្រធានបទនេះពិតជាបានឆ្លើយតបទៅនឹងគោលនយោបាយ និងយុទ្ធសាស្ត្ររបស់រដ្ឋាភិបាលដូចជា ក្របខ័ណ្ឌគោលនយោបាយជាតិគាំពារសង្គម (២០១៦-២០២៥ ) ។ យុទ្ធសាស្ត្រចតុកោណដំណាក់កាលទី៤ និងគោលនយោបាយស្តីពីទេសន្តរប្រវេសន៍ការងារសម្រាប់ប្រទេសកម្ពុជា (២០១៨-២០២៣) ដែលបានផ្តល់ការគាំពារសិទ្ធិ និងអត្ថប្រយោជន៍របស់ពលករទេសន្តរប្រវេសន៍ ៕ កែសម្រួលដោយ ៖ សុឃាក់
ចែករំលែកព័តមាននេះ