លុយ១០០ដុល្លារប្រហែលជាមិនពិបាកក្នុងការសន្សំបានទេ សម្រាប់មនុស្សមួយចំនួន ប៉ុន្តែសំណួរដែលសំខាន់ គឺអ្នកគួរតែធ្វើដូចម្តេច ដើម្បីយកលុយ១០០ដុល្លារនោះ ដើម្បីបង្កើតលុយបានកាន់តែច្រើនទៀត ? CNBC Make It បានសួរសំណួរនេះ ទៅកាន់មហាសេដ្ឋីធំៗ និងទីប្រឹក្សាចាត់ចែងផ្នែកហិរញ្ញវត្ថុដូចតទៅ ៖
១. វិនិយោគលើអ្វីដែលអ្នកស្រលាញ់ ៖ អ្នកស្រី Bethenny Frankel ដែលជាស្ថាបនិកក្រុមហ៊ុន Skinnygirl និងជាអ្នកនិពន្ធសៀវភៅមួយរូបបានឲ្យដឹងថា អ្នកស្រីនឹងវិនិយោគដោយស្វែងរកក្រុមមនុស្សដែលអ្នកស្រីជឿជាក់លើ រួចបូកផ្សំលុយ១០០ដុល្លារជាមួយអ្នកដទៃ និងធ្វើការវិនិយោគ ។ អ្នកស្រីបានកត់សម្គាល់ថា អ្នកត្រូវតែវិនិយោគលើអ្វីដែលអ្នកស្គាល់ និងយល់ដឹងច្បាស់រួចមានចក្ខុវិស័យច្បាស់លាស់ ។
២. វិនិយោគលើខ្លួនឯង ៖ លោក Grant Cardone ដែលជាអ្នកជំនាញផ្នែកលក់ដែលមានអចលនទ្រព្យសរុបប្រមាណ ៧៥០លានដុល្លារ និងជាអ្នកនិពន្ធផងដែរបានចែករំលែកថា វិធីដែលអាចពឹងផ្អែកបានប្រសិនបើអ្នកចង់វិនិយោគលុយ១០០ដុល្លារ គឺយកវាទៅបង់ថ្លៃសិក្សាវគ្គខ្លី ទិញសៀវភៅ ឬចូលរួមកម្មវិធីផ្សេងៗដែលជួយបង្កើនសមត្ថភាពរបស់អ្នក ។ អ្នកគួរតែចំណាយវាដើម្បីរឿនពីជំនាញថ្មីៗ ទទួលយកចំណេះដឹង និងបង្កើតទំនាក់ទំនងដែលមានន័យ ។
៣. កសាងឈ្មោះខ្លួនឯង ៖ ស្ថាបនិក និងនាយកប្រតិបត្តិក្រុមហ៊ុន TPA Media និងស្ថាបនិក SELFMADE គឺលោក Torben Platzer វិញគិតថាប្រព័ន្ធសង្គមអាចផ្តល់ឱកាសដល់មនុស្សគ្រប់រូបក្នុងការបង្កើនប្រាក់ចំណូល ។ ដោយហេតុដូចនេះ លោកបានផ្តល់យោបល់ឲ្យយក ១០០ដុល្លារនោះទៅកសាងឈ្មោះសម្រាប់ខ្លួន ឬអាជីវកម្មខ្លួន ។ លោកផ្តល់យោបល់ឲ្យអ្នកថតវីឌីអូមួយអំពីរឿងជីវិតរបស់អ្នកដោយធ្វើឲ្យអ្នកដទៃជឿជាក់លើអ្នក ឬប្រាប់អ្នកដទៃឲ្យដឹងពីអ្នកបន្ថែម រួចយក ១០០ដុល្លារ ដើម្បីធ្វើការផ្សព្វផ្សាយ ។
៤. ធ្វើជាអ្នកណែនាំ ឬទីប្រឹក្សា ៖ លោក Rudy Mawer ដែលជាស្ថាបនិក និងនាយកប្រតិបត្តិរបស់ក្រុមហ៊ុន ROI Machines និង RudyMawer.com ផ្តល់យោបល់ឲ្យអ្នកយក១០០ដុល្លារនោះទៅរៀនជំនាញច្បាស់លាស់ដែលធ្វើឲ្យអ្នកក្លាយជាអ្នកជំនាញរួចចាប់ផ្តើមធ្វើជាអ្នកណែនាំ ឬទីប្រឹក្សាយកកម្រៃ ។ ពេលដែលអ្នករកប្រាក់ចំណូលបានខ្លះហើយ អ្នកត្រូវិនិយោគលើការផ្សព្វផ្សាយលើប្រព័ន្ធសង្គមដូចជា Facebook ដើម្បីទាក់ទាញអតិថិជនកាន់តែច្រើនឡើង ៕ កែសម្រួលដោយ ៖សុឃាក់
ចែករំលែកព័តមាននេះ