នៅពេលដែលខេត្តព្រះសីហនុ កំពុងតែរីកដុះដាលដោយសំណង់ខ្ពស់ៗ និងប្រណីតភាពនោះ រូបភាពអវិជ្ជ មានមួយចំនួន ក៏បានកើតឡើងដោយបំផ្លាញសម្រស់ខេត្តព្រះសីហនុ ជាឋានសួគ៌ទេសចរណ៍មួយ ។ ស្ថាន ភាពបានតម្រូវអោយរដ្ឋាភិបាលចាត់ការយ៉ាងឆាប់រហ័ស និងមានប្រសិទ្ធភាព ដើម្បីស្រោចស្រង់ខេត្តនេះឡើងវិញ ។
ការបាក់សំណង់អគារ ដែលសាងសង់ដោយជនជាតិចិនបានឆក់យកជីវិតមនុស្ស២៨នាក់ ហើយវាបាននាំអោយមានការចោទសួរអំពីគុណភាពសំណង់ជាច្រើនទៀត ដែលកំពុងសាងសង់ភាគច្រើនដោយជនជាតិចិន ។ រដ្ឋាភិបាលកម្ពុជាកំពុងតែមានការព្រួយបារម្ភអំពីគុណភាពសំណង់ ទាំងនោះហើយក៏បានចាត់វិធាន ការបន្ទាន់ជាច្រើន ដើម្បីពិនិត្យគុណភាពសំណង់នៅខេត្តព្រះសីហនុ ។
បញ្ហាបាក់អគារមិនទាន់ចប់សព្វគ្រប់ផង ភ្លៀងធ្លាក់ជោគជាំ និងស្ថានភាពផ្លូវមិនល្អស្រាប់ បានធ្វើឱ្យផ្លូវនៅក្នុងខេត្តព្រះសីហនុ ជាច្រើនខូចយ៉ាងដំណំដោយធ្វើឱ្យមានការលំបាកនៅក្នុងការធ្វើដំណើរតាមផ្លូវក្នុងខេត្តជាប់មាត់សមុទ្រដែលកំពុងមានការអិភវឌ្ឍន៍ខ្លាំង ។
ជាមួយនឹងស្ថានភាពផ្លូវដ៏អាក្រក់បែបនេះ ខេត្តព្រះសីហនុក៏បាត់បង់សម្រស់របស់ខ្លួនជាខេត្តទេសចរណ៍ប្រកបដោយភាពទាក់ទាញ។ វារឹតតែអាក្រក់មើលទៀតនៅពេលដែលគេមើលឃើញស្ថានភាពផ្លូវមិនល្អឆ្ពោះទៅកាន់ព្រលានយន្តហោះនៃខេត្តនេះ ។
ការខូចខាតផ្លូវនៅក្នុងខេត្តអាចបណ្តាលមកកត្តាជាច្រើនផ្សេងទៀតបន្ថែមលើបញ្ហាទឹកភ្លៀងដែលយើងមិនអាចហាមឃាត់បាន ។ ប៉ុន្តែមូលហេតុមួយចំនួនទៀតគឺបង្កឡើង ដោយមនុស្សហើយ វាទាមទារឱ្យមានដំណោះស្រាយចំពោះបញ្ហាទាំងនោះ ។ កត្តាមនុស្សដែលប្រព្រឹត្តគឺ«ចាក់ស្តើងស៊ីក្រាស់» គឺជាអ្វីដែលត្រូវតែចៀសវាងឱ្យបាននៅក្នុងការសាងសង់ផ្លូវនៅខេត្តព្រះសីហនុនិងនៅទូទាំងប្រទេសកម្ពុជា ។
រដ្ឋមន្ត្រីក្រសួងសាធារណការនិងដឹកជញ្ជួន ប្រហែលជាបានដឹងអំពីភាពមិនប្រក្រតីជាច្រើន នៅក្នុងការធ្វើផ្លូវនៅក្នុងប្រទេសកម្ពុជា នៅពេលដែលលោកបានធ្វើការព្រមានឱ្យឈប់ជាបន្ទាន់ការធ្វើផ្លូវតាមរបៀបមួយដែលគេហៅថា«ចាក់ស្តើងស៊ីក្រាស់» ដែលចង់សំដៅទៅលើការធ្វើផ្លូវស្តើង និងមានគុណភាពអន់កើតឡើងដោយសារតែការកិបកេងនិងស៊ីលុយច្រើនយ៉ាងក្រាស់ក្រែលពីការធ្វើផ្លូវនោះដោយរាប់ទាំងលុយក្រោមតុផង ។
ក្រៅពីដោះស្រាយបញ្ហានានាទាក់ទងនឹងការធ្វើផ្លូវ ដោយរួមទាំងបញ្ហាពុករលួយផងនោះ ដំណោះស្រាយផ្សេងទៀតក៏ចាំបាច់ត្រូវធ្វើទន្ទឹមគ្នាផងដែរ ។ ការសាងសង់ផ្លូវមានគុណភាពជារឿងចាំបាច់មួយ ប៉ុន្តែការចាំបាច់មួយទៀតនោះគឺការថែទាំអោយបានជាប់លាប់ដើម្បីធានាថាមានការលុបបំបាត់ជង្ហុក ផ្លូវតូចៗទាន់ពេលវេលា មុនពេលដែលវាក្លាយជាជង្ហុកធំនិងធ្វើអោយខូចខាតផ្លូវធ្ងន់ធ្ងរ ។ កិច្ចការរំដោះទឹកក៏ជារឿងចាំបាច់មួយទៀតដែលត្រូវធ្វើ ។ មន្ត្រីជំនាញកម្ពុជាបានយល់យ៉ាច្បាស់រួចហើយពីយន្តការរំដោះទឹកចេញពីផ្លូវថ្នល់ដូចជាការស្តារអូរនិងប្រព័ន្ធបង្ហូរទឹកកង្វក់ជាដើម ។
ការដឹកជញ្ជូនគ្រឿងចក្រធុនធ្ងន់ដើម្បីការសាងសង់នានានៅខេត្តព្រះសីហនុក៏ត្រូវបានគេយល់ថា អាចជាមូលហេតុមួយទៀតដែលរួមចំណែកធ្វើអោយមានការខូចខាតផ្លូវនៅក្នុងខេត្តព្រះសីហនុ ។ ដូច្នេះ ការគ្រប់ គ្រងការដឹកជញ្ជូនធ្ងន់ៗឱ្យមានប្រសិទ្ធភាពក៏អាចនឹងរួមចំណែកកាត់បន្ថយការខូចខាតផ្លូវនៅក្នុងខេត្តព្រះសីហនុផងដែរ ។
ការគ្រប់គ្រងសំរាមនិងថង់ប្លាស្ទិចក៏មានភាពចាំបាច់ផងដែរ ដោយសារវាបានធ្វើឱ្យស្ទះផ្លូវទឹកហូរ ។ ប្រជា ជននិងអ្នករស់នៅក្នុងខេត្តព្រះសីហនុទាំងអស់មានកាតព្វកិច្ចចូលរួមជាមួយអាជ្ញាធរ ដើម្បីដោះស្រាយបញ្ហានេះ ដោយមិនចោលសំរាមឬក៏ថង់ប្លាស្ទិចពាសវាលពាសកាលដែលនាំដល់ការស្ទះផ្លូវទឹកហូរ ។
រាជរដ្ឋាភិបាលកម្ពុជាបានមើលឃើញពីភាពចាំបាច់ខ្លាំង ដែលត្រូវស្រោចស្រង់ឡើងវិញសម្រស់ខេត្តព្រះសីហនុហើយក៏បានសម្រេចបញ្ចេញលុយរហូតដល់១០០លានដុល្លារដើម្បីជួសជុលនិងដោះស្រាយបញ្ហាហេត្ថារចនសម្ព័ន្ធខេត្តព្រះសីហនុ ។ នៅពេលដែលចំណាត់ការរាល់បញ្ហាដែលមានធ្វើឡើង ដោយមានប្រសិទ្ធភាព ខេត្តព្រះសីហនុ និងរំដោះខ្លួនចេញពីភាពខ្ទេចខ្ទាំនៅពេលនេះ ។
ទីបំផុត ខេត្តព្រះសីហនុដ៏មានមន្តស្នេហ៍សង្ឃឹមថា នឹងវិលត្រឡប់មកវិញ ហើយក្លាយជាតំបន់ទេសចរណ៍ដ៏គួរឱ្យទាក់ទាញ ។ ប៉ុន្តែការបរាជ័យនៅក្នុងការដោះស្រាយផ្លូវថ្នល់ និងហេដ្ឋារចនាសម្ព័ន្ធ ចាំបាច់នានានា នៅក្នុងខេត្តនឹងធ្វើឱ្យបាត់បង់កិត្តិនាមនៃខេត្តព្រះសីហនុ ជាឋានសួគ៌ទេសចរណ៍ជារៀងរហូត ។
ទោះបីជាយ៉ាងណាក៏ដោយចុះ យើងនឹងសំឡឹងមើលខេត្តព្រះសីហនុក្នុងផ្លូវដ៏វិជ្ជមានមួយហើយសង្ឃឹមថាការចាយលុយ១០០លានដុល្លារនឹងស្រោចស្រង់ខេត្តព្រះសីហនុ ចេញពីភាពខ្ទេចខ្ទាំនាពេលបច្ចុប្បន្ន ៕
ចែករំលែកព័តមាននេះ