ពលរដ្ឋខ្មែរភាគច្រើនធ្លាប់ឮពីជំងឺដុះសាច់បំពង់ក ហើយនៅពេលដែលកើតមានជំងឺនេះម្តងៗលោកអ្នកតែងតែមានក្តីបារម្ភយ៉ាងខ្លាំង ព្រោះបង្កឲ្យមានផលប៉ះពាល់ជាច្រើនពិសេសមានការឈឺចាប់នៅក្នុងបំពងកពិបាកទទួលទានចំណីអាហារ ។
លោកវេជ្ជបណ្ឌិតស្រូយ អាដុល្លារ គ្រូពេទ្យឯកទេសត្រចៀក ច្រមុះ បំពង់ក នៃមន្ទីរពេទ្យព្រះកេតុមាលា បានប្រាប់កោះសន្តិភាពឲ្យដឹងថា ដុះសាច់បំពង់កជាជំងឺមួយប្រភេទដែលបណ្តាលមកពីការរលាកដុំសាច់នៅបំពងក(tonsils) ដែលបង្កពីពពួកវីរុស និងបាក់តេរី ។ អ្នកជំងឺដែលកើតមានបញ្ហានេះអាចមានអាការៈមួយចំនួនដែលគួរឲ្យកត់សម្គាល់ដូចជា ៖
១-ឈឺក ឬរីកសាច់បំពង់កធំ (tonsils) ។
២- ឡើងកម្ដៅខ្លួន ក្អក ឈឺក្បាល បង្កជាគ្រុន ឈឺខ្លួនប្រាណ ។
៣-មានអារម្មណ៍ល្ហិតល្ហៃមានឡើងគ្រាប់
សៗដូចជា គ្រាប់អង្ករនៅនឹងសាច់បំពងក(ton sils) ហើមក ឬមានឡើងកូនកណ្តុរនៅខាងក្រៅ ជួនកាលអាចមានក្អូត ឬក្លិនមាត់ទៀតផង ។
ដោយសារតែជំងឺនេះអាចជាសះស្បើយដោយខ្លួនឯងបាននៅក្នុងចន្លោះពេលពី៣ថ្ងៃទៅ១០ថ្ងៃ ដូច្នេះលោកអ្នកត្រូវធ្វើការព្យាបាលតាមវិធីសាស្រ្តដូចខាងក្រោម ៖
១-ត្រូវកាត់បន្ថយការឈឺចាប់ដោយខ្ពុរសម្អាតមាត់ និងធ្មេញជាមួយទឹកអំបិល ឬទឹកថ្នាំខ្ពុរមាត់ឲ្យបានញឹកញាប់ ។
២-ប្រើថ្នាំបៀមផ្សេងទៀត ឬឱសថមួយចំនួនដែលអាចកាត់បន្ថយការឈឺចាប់ឬកាត់បន្ថយគ្រុនក្តៅនិងការឡើងកម្ដៅ ។
៣-ក្នុងករណីមានការរលាកសាច់បំពង់កដែលបណ្តាលមកពីពពួកបាក់តេរី លោកអ្នកត្រូវទៅកាន់មន្ទីរពេទ្យដើម្បីពិនិត្យ និងព្យាបាលឲ្យបានត្រឹមត្រូវ ។ បើសិនជាការព្យាបាលដោយឱសថមិនមានប្រសិទ្ធភាព ឬក៏កើតមានជំងឺនេះឡើងវិញជាញឹកញាប់ រហូតដល់៥ទៅ៦ដងក្នុងមួយឆ្នាំ គ្រូពេទ្យឯកទេសនឹងត្រូវព្យាបាលដោយការវះកាត់ជំនួសការប្រើប្រាស់ឱសថ ។
ដូចដែលបានជ្រាបរួចមកហើយ ជំងឺដុះសាច់បំពង់កវាបង្កឡើងដោយពពួកវីរុសនិងបាក់តេរីដូច្នេះដើម្បីការពារកុំឲ្យកើតមាននូវបញ្ហានេះបន្តទៀតលោកអ្នកត្រូវធ្វើយ៉ាងណាឲ្យការរស់នៅប្រកបដោយអនាម័យ និងប្រកាន់ខ្ជាប់នូវការហូបស្អាត រស់នៅស្អាត ៕
ចែករំលែកព័តមាននេះ