ខេត្តកំពង់ស្ពឺ ៖ កម្ពុជាបានត្រៀមទាហានការពារសន្តិភាពក្រោមឆ័ត្ររបស់អង្គការសហប្រជាជាតិប្រមាណជាង២០០នាក់ រួចជាស្រេច សម្រាប់ទៅបំពេញបេសកកម្មនៅប្រទេសស៊ូដង់ខាងត្បូង នាអំឡុងខែមេសា ឆ្នាំ២០១៤ ខាងមុខនេះ ។
លោកឧត្តមសេនីយ៍ទោ តាំង សំប៊ន នាយកវិទ្យាស្ថានជាតិហ្វឹកហ្វឺនមជ្ឈមណ្ឌលគ្រប់គ្រងកងកម្លាំងរក្សាសន្តិភាព បោសសំអាតមីន និងកាកសំណល់សង្គ្រាមបានឱ្យដឹងថា ទាហានការពារសន្តិភាពរបស់កម្ពុជាដែលត្រៀមបញ្ជូននាពេលខាងមុខនេះ គឺត្រូវបានទទួលការបណ្តុះបណ្តាលជំនាញផ្នែកវិស្វកម្មពីយោធាចារ្យរបស់ប្រទេសជប៉ុនប្រមាណ១៥នាក់ មុនពេលពួកគេត្រូវនឹងបញ្ជូនទៅប្តូរវេននៅប្រទេសស៊ូដង់ខាងត្បូង ។
លោកឧត្តមសេនីយ៍បានបញ្ជាក់ថា នាពេលនេះ វិទ្យាសា្ថនរបស់លោកកំពុងតែហ្វឹកហ្វឺនមន្ត្រីជំនាញចំនួន៣ក្រុម គឺមួយផ្នែកវិស្វកម្មរបស់ក្រសួងការពារជាតិ មកពីកងរាជអាវុធហត្ថ និងមកពីមន្ទីរពេទ្យកំរិតពីរ ហើយពួកគេនឹងទៅប្តូរវេនពីក្រុមចាស់នៅប្រទេសស៊ូដង់ខាងត្បូង នៅមុនពេលបុណ្យចូលឆ្នាំខ្មែរខាងមុខនេះ។
លោកឧត្តមសេនីយ៍បានបន្ថែមថា នាពេលបច្ចុប្បន្ននេះ ប្រទេសកម្ពុជា មានជំនាញចំនួនបី ហើយសម្រាប់ទៅបំពេញបេសកកម្មក្រៅប្រទេសក្រោមឆ័ត្ររបស់អង្គការសហប្រជាជាតិ គឺមានជំនាញដោះមីន ជំនាញពេទ្យ និងជំនាញវិស្វកម្ម ដែលជំនាញទាំងនេះត្រូវបានទទួលការបណ្តុះបណ្តាលពីប្រទេសមហាអំណាចជាច្រើនមានដូចជា ជប៉ុន ចិន អាមេរិក បារាំង ឥណ្ឌា និងអូស្ត្រាលី ហើយនៅពេលខាងមុខនេះ នឹងមានប្រទេសអាល្លឺម៉ង់ចូលរួមជួយបណ្តុះបណ្តាលផងដែរ ។
តាមការឱ្យដឹងពីលោកឧត្តមសេនីយ៍ទោ តាំង សំប៊ន រហូតមកដល់ពេលនេះ ប្រទេសកម្ពុជា បានបញ្ជូនកងកម្លាំងមួកខៀវ ទាហានកម្ពុជាក្រោមឆ័ត្រ អង្គការសហប្រជាជាតិនេះ បានចំនួនជិតមួយម៉ឺននាក់ហើយ ក្នុងនោះកម្ពុជាបានបញ្ជូនទៅប្រទេសដូចជា ស៊ីរី, ឆាដ, ស៊ូដង់, ស៊ូដង់ខាងត្បូង, ម៉ាលី និងប្រទេសលីបង់ជាដើម ៕
ចែករំលែកព័តមាននេះ