ខេត្តកំពង់ធំ ៖ រថយន្តយីឌុបម៉ាកហ៊ីណូ (ភ្លៅ៤) ពណ៌លឿង ទ្រុងពណ៌ស ពាក់ស្លាកលេខ ភ្នំពេញ 3A-9887 ដឹកដំឡូងមីក្រៀមលួចបន្លំដាក់ឈើប្រណីត១គ្រឿង ត្រូវជាប់អន្ទាក់សមត្ថកិច្ច កាលពីវេលាម៉ោង៥និង១៥នាទីល្ងាច ថ្ងៃទី១៤ មីនា ២០១៤ នៅចំណុចភូមិពពេល ឃុំសាលាវិស័យ ស្រុកប្រាសាទសំបូរ និងបាននាំយកមកកាន់ផ្នែករដ្ឋបាលព្រៃឈើស្ទោង ធ្វើការវាស់វែងនៅព្រឹកថ្ងៃទី១៥ មីនា ២០១៤ រហូតដល់ល្ងាច ទើបបញ្ចប់ ។
យោងតាមព័ត៌មានពីសមត្ថកិច្ចជំនាញបានឱ្យដឹងថា បន្ទាប់ពីបានទទួលព័ត៌មានសម្ងាត់ពីបណ្តាញរាយការណ៍មកថា មានរថយន្តម៉ាកហ៊ីណូ (យីឌុបភ្លៅ៤) ដឹកដំឡូងមីក្រៀមពីខាងលើ ឈើប្រណីតពីក្រោមកំពុងតែធ្វើចរាចរណ៍ចេញមកពីខេត្តព្រះវិហារ ឆ្លងកាត់ខេត្តកំពង់ធំ ឆ្ពោះទៅកាន់ខេត្តកំពង់ចាម ដោយមានការអនុញ្ញាតពីលោកប៉ែន សារ៉ាត ព្រះរាជអាជ្ញាអមសាលាដំបូងខេត្ត កម្លាំងមន្ត្រីសង្កាត់រដ្ឋបាលព្រៃឈើសាលាវិស័យ សហការជាមួយកម្លាំងអធិការដ្ឋានរដ្ឋបាលព្រៃឈើខាងជើងបឹងទន្លេសាប រួមជាមួយកម្លាំងប្រដាប់អាវុធទាំងបី មាននគរបាល កងរាជអាវុធហត្ថ សឹកតំបន់រងកំពង់ធំ ចុះបង្ក្រាបបាននៅចំណុចភូមិ-ឃុំកើតហេតុខាងលើ ។
ចំណែកឯអ្នកបើកបរចុះរត់គេចខ្លួនបាត់ស្រមោល ហើយកម្លាំងសមត្ថកិច្ចក៏បាននាំយករថយន្តខាងលើ មកកាន់ផ្នែករដ្ឋបាលព្រៃឈើស្ទោង លុះដល់ព្រឹកថ្ងៃទី១៥ មីនា ២០១៤ ដោយមានការអញ្ជើញចូលរួមពីលោកព្រះរាជអាជ្ញា ប៉ែន សារ៉ាត, លោកគឹម ចន្ថា នាយរងអធិការដ្ឋានព្រៃឈើខាងជើងបឹងទន្លេសាប, លោកតឹប ញាតា នាយខណ្ឌរដ្ឋបាលព្រៃឈើកំពង់ធំ, លោកនាយផ្នែករដ្ឋបាលព្រៃឈើស្ទោង, លោកនាយសង្កាត់រដ្ឋបាលព្រៃឈើសាលាវិស័យ និងសហការី បានជួលកម្មករលើកដំឡូងមីក្រៀមចេញ ហើយយកឈើមកវាស់វែង ។ ឈើប្រណីតប្រភេទនាងនួន១១ដុំ ស្មើនឹង០,៤៤២ម៉ែត្រគូប និងឈើប្រណីតប្រភេទធ្នង់ចំនួន១០១ដុំ ស្មើនឹង៧,៨១៤ម៉ែត្រគូប សរុបមានចំនួន១១២ដុំ ស្មើនឹង៨,២៥៦ម៉ែត្រគូប យកមករក្សាទុកនៅផ្នែករដ្ឋបាលព្រៃឈើស្ទោង ដើម្បីចាត់ការទៅតាមផ្លូវច្បាប់ ៕
ចែករំលែកព័តមាននេះ