រាជធានីភ្នំពេញ ៖ លោកឧត្ដមសេនីយ៍យោធាមួយរូប ត្រូវបុគ្គលិកក្រុមហ៊ុនមួយវាយជាច្រើនដៃ ខណៈពេលលោកជិះម៉ូតូទៅកន្លែងធ្វើការ ។ ហេតុការណ៍នេះបានកើតឡើងកាលពីវេលាម៉ោងជិត៩ព្រឹកថ្ងៃទី១៤ មីនា នៅចំណុចម្ដុំក្ដាន់២ តាមបណ្ដោយមហាវិថីសហព័ន្ធរុស្សុី ក្នុងសង្កាត់មិត្ដភាព ខណ្ឌ៧មករា ។
រាជធានីភ្នំពេញ ៖ លោកឧត្ដមសេនីយ៍យោធាមួយរូប ត្រូវបុគ្គលិកក្រុមហ៊ុនមួយវាយជាច្រើនដៃ ខណៈពេលលោកជិះម៉ូតូទៅកន្លែងធ្វើការ ។ ហេតុការណ៍នេះបានកើតឡើងកាលពីវេលាម៉ោងជិត៩ព្រឹកថ្ងៃទី១៤ មីនា នៅចំណុចម្ដុំក្ដាន់២ តាមបណ្ដោយមហាវិថីសហព័ន្ធរុស្សុី ក្នុងសង្កាត់មិត្ដភាព ខណ្ឌ៧មករា ។
លោកឧត្ដមសេនីយ៍ដែលត្រូវគេវាយនេះឈ្មោះ ងឺ វណ្ណឌឹម អាយុ៦៤ឆ្នាំ បម្រើការងារនៅអង្គភាពទំនាក់ទំនងអន្ដរជាតិក្រសួងការពារជាតិ ឯជនបង្កហេតុឈ្មោះ ចាង ធៀងហេង ភេទប្រុស អាយុ ២៦ឆ្នាំ ជាបុគ្គលិកក្រុមហ៊ុនមួយ ស្នាក់នៅក្នុងបុរីពិភពថ្មីសង្កាត់ចោមចៅ ខណ្ឌពោធិ៍សែនជ័យ ។ ទាំងលោកឧត្ដមសេនីយ៍ ទាំងជនបង្ក ត្រូវបានកងរាជអាវុធហត្ថខណ្ឌ៧មករា ឃាត់ខ្លួនសាកសួរ និងរៀបចំសំណុំរឿងបញ្ជូនទៅបញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីចាត់ការតាមច្បាប់ ។
ទាក់ទិននឹងករណីខាងលើនេះ ត្រូវបានគេដឹងថា កាលពីវេលាម៉ោងជាង៨ព្រឹកថ្ងៃទី១៤ មីនា លោកឧត្ដមសេនីយ៍ ងឺ វណ្ណឌឹម បានជិះម៉ូតូឌ្រីមស៊េរី២០១៣ ទៅកន្លែងធ្វើការក្នុងសម្លៀកបំពាក់ឯកសណ្ឋានប៉ារ៉ា និងពាក់មួកការពារសុវត្ថិភាព ។ លុះទៅដល់ចំណុចក្ដាន់២ មានរថយន្ដម៉ាក SANTAFE ហ៊ីយ៉ាន់ដាយ ពណ៌ខ្មៅមួយគ្រឿង ពាក់ស្លាកលេខ ភ្នំពេញ 2Q-6009 បើកបរដោយបុរសម្នាក់ និងប្រពន្ធជិះជាមួយផង ។
តាមសាក្សីឃើញហេតុការណ៍បានឱ្យដឹងថា ដំបូងលោកឧត្ដមសេនីយ៍ទោយោធារូបនេះ គាត់ជិះម៉ូតូពីមុខរថយន្ដបុរសនោះ ហើយម្ចាស់រថយន្ដបានស៊ីផ្លេជាសញ្ញាឱ្យចៀសដែលប្រហែលជាខាងរថយន្តមានការប្រញាប់ ។ ពេលរថយន្តសីុផ្លេ លោកឧត្តមសេនីយ៍ក៏អែបដែរ តែពេលអែបម៉ូតូទៅម្ខាងផ្លូវ ទំនងចង្អៀតលោកឧត្តមសេនីយ៍ ក៏ចូលមកមុខរថយន្តវិញ ។ អ្នកបើកបររថយន្តឃើញដូច្នោះ បានចុចកញ្ចក់ស្តីឱ្យអ្នកជិះម៉ូតូ ព្រោះគេមើលទៅទំនងដូចជាអ្នករត់ម៉ូតូឌុប មិនដឹងថាលោកជាមន្ត្រីយោធាថ្នាក់ឧត្តមសេនីយ៍នោះទេ។
ពេលអ្នកបើកបររថយន្តស្តីឱ្យ លោកឧត្តមសេនីយ៍ក៏បានឈប់ពីមុខរថយន្ត រួចយកដៃទះក្បាលរថយន្ដឱ្យអ្នកបើករថយន្តចុះនិយាយគ្នា ។ ពេលនោះប្រពន្ធអ្នកបើករថយន្ដបានទាញដៃប្តីមិនឱ្យចុះ ហើយលោកឧត្តមសេនីយ៍ក៏បើកម៉ូតូទៅមុខទៀត ។ ពេលទៅមុខបន្តិច ស្រាប់តែបុរសអ្នកបើកបរបានបើករថយន្តទៅកៀរម៉ូតូឱ្យឈប់ ហើយលោកឧត្តមសេនីយ៍ក៏ឈប់ដែរ ព្រោះខ្លាចដួល ពេលនោះអ្នកបើកបរចុះពីរថយន្ត ចំពេលលោកឧត្តមសេនីយ៍ដោះមួកការពារសុវត្ថិភាពចេញពីក្បាល ក៏ត្រូវបានអ្នកបើកបរនោះប្រើកណ្តាប់ដៃវាយ៤ទៅ៥ដៃចំមុខ ហើមពោរទាំងព្រឹក ។
ហេតុការណ៍នេះបានធ្វើឱ្យមានការភ្ញាក់ផ្អើលដល់អ្នកដំណើរតាមដងផ្លូវចោមរោមមើល ។ ពេលនោះមន្ដ្រីកងរាជអាវុធហត្ថ ខណ្ឌ៧មករា បាននាំភាគីទាំង២ទៅបញ្ជាការដ្ឋាន ដើម្បីដោះស្រាយ តែរឿងនេះលោកឧត្តមសេនីយ៍ទោ ងឺ វណ្ឌឌឹម មិនសុខចិត្ត ក៏បានឱ្យសមត្ថកិច្ចកងរាជអាវុធហត្ថចាត់ការទៅតាមផ្លូវច្បាប់ ។ មនុស្សយើងមិនអាចមើលងាយមនុស្សដូចគ្នាបានទេ ពិតជាស្តាយក្រោយពេលដឹងថា អ្នកដែលខ្លួនវាយយា៉ងអគតិនោះ គឺជាឧត្តមសេនីយ៍ ៕
ចែករំលែកព័តមាននេះ