រាជធានីភ្នំពេញ ៖ គណបក្សប្រជាជនកម្ពុជា កាលពីថ្ងៃទី១៣ មីនា បានស្វាគមន៍ និងស្នើឱ្យគណបក្សសង្គ្រោះជាតិ ចាត់តំណាងរបស់ខ្លួនជួបចរចាជាមួយតំណាងគណបក្សប្រជាជនកម្ពុជា ដើម្បីរៀបចំយន្តការមួយសម្រាប់កិច្ចដំណើរការកំណែទម្រង់ការបោះឆ្នោតនាពេលខាងមុខ តាមស្មារតីនៃកិច្ចប្រជុំកំពូលរវាងគណបក្សប្រជាជនកម្ពុជា និងគណបក្សសង្គ្រោះជាតិ កាលពីថ្ងៃទី១៦ ខែកញ្ញា ឆ្នាំ២០១៣ ។ ការប្រកាសស្វាគមន៍នេះ ជាការឆ្លើយតបទៅនឹងលិខិតរបស់គណបក្សសង្គ្រោះជាតិ ដែលទាមទារឱ្យមានការចរចាស្តីពីកំណែទម្រង់ការបោះឆ្នោត ។
សេចក្តីថ្លែងការណ៍របស់គណបក្សប្រជាជនកម្ពុជា បានបង្ហាញថា កាលពីថ្ងៃទី១២ កុម្ភៈ ឆ្នាំ២០១៤ គណបក្សសង្គ្រោះជាតិ បានចេញសេចក្តីថ្លែងការណ៍ជុំវិញការបង្កើតគណៈកម្មការរបស់រាជរដ្ឋាភិបាល ដើម្បីសិក្សាស្រាវជ្រាវកែទម្រង់ការបោះឆ្នោត ។ កំណែទម្រង់ការបោះឆ្នោត ជាកិច្ចដំណើរការដែលធ្លាប់បានអនុវត្តជាបន្តបន្ទាប់កន្លងទៅ និងជាកំណែទម្រង់ដ៏ស្មុគស្មាញ ដែលទាមទារពេលវេលា ដោយមិនអាចអូសបន្លាយពេលវេលាតទៅទៀតបានឡើយ ។ ក្នុងការជួបចរចាកន្លងមក គណបក្សសង្គ្រោះជាតិបានផ្លាស់ប្តូរប្រធានបទ និងលក្ខខណ្ឌនៃការទាមទារជាបន្តបន្ទាប់ ជាហេតុធ្វើឱ្យការពិភាក្សាអំពីកិច្ចដំណើរការកំណែទម្រង់ការបោះឆ្នោត ត្រូវបានអូសបន្លាយរហូតមកទល់បច្ចុប្បន្ននេះ ។
ការបង្កើតគណៈកម្មការរបស់រាជរដ្ឋាភិបាល ដែលកើតចេញពីគណបក្សប្រជាជនកម្ពុជា ដើម្បីសិក្សាស្រាវជ្រាវអំពីជម្រើសនានា ក្នុងដំណើរការកំណែទម្រង់ការបោះឆ្នោត គឺជាការបង្ហាញនូវឆន្ទៈដ៏ពិតប្រាកដរបស់ខ្លួន ក្នុងការបន្តកិច្ចដំណើរការកំណែទម្រង់ដ៏មានសារសំខាន់នេះ។ លោក សុន ឆ័យ ប្រធានគណៈកម្មការចម្រុះតំណាងគណបក្សសង្គ្រោះជាតិ កាលពីថ្ងៃទី១៣ មីនា បានផ្ញើលិខិតជូនលោក ប៊ិន ឈិន ប្រធានគណៈកម្មការចម្រុះ តំណាងគណបក្សប្រជាជនកម្ពុជា ។ ខ្លឹមសារលិខិតនោះ បានទាមទារឱ្យមានការបញ្ជាក់ពីរបៀបវារៈ សម្រាប់កិច្ចប្រជុំបន្តនៅថ្ងៃទី១៧ មីនា ព្រោះតែការពិភាក្សាមិនទាន់សម្រេចបានក្នុងកិច្ចប្រជុំ កាលពីថ្ងៃទី១០ មីនា កន្លងទៅ លើប្រធានបទនៃការកែទម្រង់ស្ថាប័នបោះឆ្នោត ។
លិខិតរបស់លោក សុន ឆ័យ បានបន្តទៀតថា ប្រធានបទពាក់ព័ន្ធនឹងការកែទម្រង់ស្ថាប័នរៀបចំការបោះឆ្នោត ឱ្យទៅជាស្ថាប័នធម្មនុញ្ញដែលឯករាជ្យ និងមានការជ្រើសតាំងដោយរដ្ឋសភាតាមសំឡេងពីរភាគបី នៃសមាជិកសភាទាំងមូល គឺមានលក្ខណៈចាំបាច់ជាអាទិភាព សម្រាប់ការងារកែទម្រង់ការបោះឆ្នោតដែលមិនអាចរំលងបាន ។ លិខិតដដែល បានសុំឱ្យលោក ប៊ិន ឈិន បញ្ជាក់ពីជំហររបស់គណបក្សប្រជាជនកម្ពុជា លើសំណើរបស់គណបក្សសង្គ្រោះជាតិនេះថា តើយល់ព្រម ឬយ៉ាងណា ឬគណបក្សប្រជាជនកម្ពុជា មានទស្សនៈយ៉ាងណាដែរជុំវិញការកែទម្រង់ស្ថាប័នរៀបចំការបោះឆ្នោតនេះ ដើម្បីគណៈកម្មការចម្រុះយកមកពិភាក្សានៅក្នុងកិច្ចប្រជុំថ្ងៃទី១៧ មីនា ខាងមុខ ។
ជាមួយគ្នានេះ លោក សុន ឆ័យ សុំឱ្យពិនិត្យផងដែរលើលទ្ធភាពនៃការរៀបចំសិក្ខាសាលារួមគ្នាមួយឱ្យបានឆាប់ ដើម្បីបើកទូលាយឱ្យមានការចូលរួមយោបល់ និងផ្តល់អនុសាសន៍ពីសំណាក់អ្នកជំនាញជាតិ និងអន្តរជាតិ រួមទាំងអង្គការសង្គមសុីវិល ដែលមានជំនាញលើការងារបោះឆ្នោត លើការកែទម្រង់ស្ថាប័នរៀបចំការបោះឆ្នោតនេះផងដែរ ។ ក្នុងសារលិខិតឆ្លើយតបរបស់លោកប៊ិន ឈិន ប្រធានគណៈកម្មការចម្រុះខាងគណបក្សប្រជាជនកម្ពុជា បានបញ្ជាក់ជូនលោក សុន ឆ័យ ថា ក្នុងក្របខណ្ឌកំណែទម្រង់ការបោះឆ្នោតនាពេលខាងមុខ គឺជាសំណុំនៃបញ្ហាដែលគណៈកម្មការចម្រុះរៀបចំបានប្រធានបទមួយចំនួនហើយដូចជា ការរៀបចំការចុះឈ្មោះអ្នកបោះឆ្នោត និងបញ្ជីឈ្មោះអ្នកបោះឆ្នោត ដើម្បីធានា និងការពារសិទ្ធិរបស់ប្រជាពលរដ្ឋគ្រប់រូប ការរៀបចំបង្កើតច្បាប់ស្តីពីហិរញ្ញវត្ថុសម្រាប់ គណបក្សនយោបាយ ។
ប្រធានបទកំណែទម្រង់ស្ថាប័នរៀបចំការបោះឆ្នោត និងអព្យាក្រឹតភាព និងសុចរិតភាពនៃសង្គមសុីវិលក្នុងការបោះឆ្នោត គណៈកម្មការចម្រុះបាននិងកំពុងពិភាក្សាមិនទាន់បានសម្រេចបញ្ចូលទៅក្នុងក្របខណ្ឌកំណែទម្រង់នៃការបោះឆ្នោតនៅឡើយទេ ។ គណៈកម្មការចម្រុះខាងគណបក្សប្រជាជនកម្ពុជា ឯកភាពយកប្រធានបទ «កែទម្រង់ស្ថាប័នរៀបចំការបោះឆ្នោត» បញ្ចូលទៅក្នុងក្របខណ្ឌកំណែទម្រង់ការបោះឆ្នោត ។ រីឯបញ្ហាសិក្ខាសាលារួមគ្នា គឺជាបញ្ហាដែលគណៈកម្មការចម្រុះត្រូវធ្វើនៅពេលដែលគណៈកម្មការនេះបានកសាងនូវក្របខណ្ឌកំណែទម្រង់ការបោះឆ្នោតមួយដែលអាចទទួលយកបានទាំងអស់គ្នា ។
គណៈកម្មការចម្រុះ «ដើម្បីសិក្សា និងរៀបចំក្របខណ្ឌកំណែទម្រង់ការបោះឆ្នោតនាពេលខាងមុខ» ខាងគណបក្សប្រជាជនកម្ពុជា មានសុទិដ្ឋិនិយម បន្តការពិភាក្សាតាមស្មារតីនៃកិច្ចប្រជុំថ្ងៃទី១០ មីនា ឆ្នាំ២០១៤ ។ សូមបញ្ជាក់ថា គណបក្សទាំងពីរដែលមានការឆ្លើយឆ្លងលិខិតដាក់គ្នាទៅវិញទៅមកនេះ គឺបន្ទាប់ពីេមដឹកនាំគណបក្សសង្គ្រោះជាតិ លោក សម រង្ស៊ី និងលោក កឹម សុខា បានប្រកាសព្រមានឈប់ចរចាជាមួយគណបក្សប្រជាជនកម្ពុជា ប្រសិនបើគណបក្សប្រជាជនកម្ពុជា មិនបានយកការស្នើសុំលើប្រធានបទពាក់ព័ន្ធនឹងការកែទម្រង់ការបោះឆ្នោតឱ្យទៅជាស្ថាប័នធម្មនុញ្ញដែលឯករាជ្យ និងមានការជ្រើសតាំងដោយរដ្ឋសភា ដែលមានសំឡេងពីរភាគបី និងព្រមានថា នឹងដឹកនាំធ្វើមហាបាតុកម្មសាជាថ្មីកាលពីពេលថ្មីៗនេះ ។ បុ៉ន្តែអ្វីដែលជាការឆ្លើយតបរបស់គណបក្សប្រជាជនកម្ពុជា បានធ្វើឱ្យមានការធូរស្រាលវិញខ្លះ ហើយអ្វីដែលសំខាន់នោះគឺនៅថ្ងៃទី១៧ មីនា ខាងមុខ គណបក្សទាំងពីរសន្យាជួបគ្នាដើម្បីចរចាជាថ្មី ៕
ចែករំលែកព័តមាននេះ