ខេត្តសៀមរាប ៖ សំណុំរឿងប្រព្រឹត្តអំពើពុករលួយនៅក្នុងជួរមន្រ្តីអង្គភាពសាខាពន្ធដារខេត្ត ដែលត្រូវបានវែកមុខ និងចាប់ខ្លួនដោយកម្លាំងអង្គភាពប្រឆំាងអំពើពុករលួយកាលពីអំឡុងពាក់កណ្តាលខែធ្នូ ឆ្នាំ២០១៣ បានឈានទៅដល់ដំណាក់កាលបើកសវនាការហើយកាលពីព្រឹកថ្ងៃទី១៣ មីនា ។ ប៉ុន្តែតុលាការមិនបានកំណត់ឲ្យមានទោសភ្លាមៗនៅឡើយទេ ហើយក៏ពុំបានកំណត់ថ្ងៃប្រកាសសាលក្រមដែរ ខណៈជនជាប់ចោទបន្ទាប់ពីឃុំខ្លួនបណ្ដោះអាសន្នក្នុងពន្ធនាគារពុំមានវត្តមាននៅក្នុងសវនាការទេ ។
យោងតាមមន្រ្តីសាលាដំបូងខេត្តមួយរូបបានឲ្យដឹងកាលពីព្រឹកថ្ងៃទី១៣ មីនា នោះថា សវនាការសំណុំរឿងនេះត្រូវបានធ្វើឡើងដោយមានលោក គី រិទ្ធី ជាចៅក្រមជំនំុជម្រះ លោកហេង ផេង ជាតំណាងអយ្យការ និងលោកមេធាវី ទេព មន្នីជាតិ ជាអ្នកការពារក្តីឲ្យជនជាប់ចោទ ។ លោក គឺ រិទ្ធី បានមានប្រសាសន៍នៅរសៀលថ្ងៃទី១៣ មីនា ថា សវនាការបានបញ្ចប់ទៅតាមនីតិវិធីសព្វគ្រប់ហើយ ប៉ុន្តែមិនទាន់ប្រកាសជាសាធារណៈអំពីទោសទណ្ឌនៅឡើយ ដោយសារតែពុំមានវត្តមានជនជាប់ចោទនៅក្នុងបន្ទប់សវនាការ។
គួរបញ្ជាក់ថា ជនជាប់ចោទនៅក្នុងសំណុំរឿងនេះមានឈ្មោះ លីវ ប៊ុនថន ជាអតីតប្រធានផ្នែកគ្រប់គ្រងអ្នកជាប់ពន្ធនៃសាខាពន្ធដារខេត្តសៀមរាប ត្រូវបានចាប់ខ្លួនកាលពីថ្ងៃទី១៨ ធ្នូ ២០១៣ កន្លងទៅ ដោយកម្លាំងអង្គភាពប្រឆាំងអំពើពុករលួយ ដឹកនាំដោយលោកឱម យិុនទៀង ក្នុងអគារសាខាពន្ធដារខេត្ត ស្ថិតនៅតាមបណ្តោយផ្លូវជាតិលេខ៦ ក្នុងភូមិសាលាកន្សែង សង្កាត់ស្វាយដង្គំ ក្រុងសៀមរាប ។ ក្រោយពីចាប់ខ្លួន ក៏បានបញ្ជូនទៅសាលាដំបូងខេត្តនិងសម្រេចឃុំខ្លួនដាក់ពន្ធនាគារជាបណ្តោះអាសន្ននៅរសៀលថ្ងៃទី១៩ ធ្នូ ឆ្នាំ២០១៣ ក្រោមបទចោទប្រកាន់ «វិតិក្រម» ដែលជាបទល្មើសមានចែងនៅក្នុងមាត្រា៥៩២ និង៥៩៣ នៃក្រមព្រហ្មទណ្ឌ ។
យោងតាមឯកសារថតចម្លងមួយច្បាប់ដែលបានផ្តល់ជូនដោយមន្ត្រីអង្គភាពប្រឆាំងអំពើពុករលួយ កាលពីពេលកន្លងទៅបង្ហាញថា អង្គភាពនេះរកឃើញថា សណ្ឋាគារនិងក្រុមហ៊ុនកម្រិតមធ្យមជាច្រើននៅខេត្តសៀមរាប ត្រូវបានផ្នែកនេះរបស់សាខាពន្ធដារខេត្ត ធ្វើឯកសារកំណត់ពន្ធឡើងវិញ ដោយបំប៉ោងតួលេខខ្ពស់ដើម្បីឱ្យម្ចាស់សណ្ឋាគារ ម្ចាស់ក្រុមហ៊ុនភ័យខ្លាច ហើយបង់លុយក្រោមតុឱ្យខ្លួន ។ ករណីម្ចាស់សណ្ឋាគារ ឬក្រុមហ៊ុនធុនមធ្យមណាមួយមិនព្រមដោះស្រាយលុយក្រោមតុឱ្យប្រធានផ្នែកឈ្មោះលីវ ប៊ុនថន ទេ ក្រុមហ៊ុន និងសណ្ឋាគារនោះត្រូវរងនូវការបង់ពន្ធយ៉ាងខ្ពស់ ។
ក្នុងរបាយការណ៍ដដែលបានបង្ហាញពីឧទាហរណ៍ខ្លះៗដូចជា «សណ្ឋាគារធុនមធ្យមត្រូវបង់ពន្ធកំណត់ឡើងវិញតែ២០០ដុល្លារអាមេរិកទៅ៥០០ដុល្លារអាមេរិក លោកលីវ ប៊ុនថន បានធ្វើបែបបទដើម្បីឱ្យសាខាពន្ធដារទារ៧ពាន់ដុល្លារ ឬ១ម៉ឺនដុល្លារ ហើយបើម្ចាស់សណ្ឋាគារធុនមធ្យមទាំងនោះព្រមបង់លុយឱ្យគាត់១.០០០ ដុល្លារទៅ៣.០០០ដុល្លារអាមេរិក ទើបសណ្ឋាគារនោះអាចបង់ពន្ធតាមការកំណត់ត្រឹមតែ២០០ ដុល្លារទៅ៥០០ដុល្លារអាមេរិកវិញ ។ ចំពោះអ្នករឹងទទឹងមិនព្រមបង់ឱ្យលោកលីវ ប៊ុនថន នោះ នឹងត្រូវចាប់ឱ្យបង់ពន្ធដល់១ម៉ឺនដុល្លារអាមេរិកដ៏អយុត្តិធម៌ » ។
នេះជាសវនាការទី២ ហើយសម្រាប់សាលាដំបូងខេត្តសៀមរាប ដែលបានកាត់ទោសបុគ្គលជាមន្ត្រីរាជការនៅក្នុងរយៈពេលដើមឆ្នាំ២០១៤ នេះ។ សាលក្រមទី១ បានប្រកាសជាសាធារណៈកាលពី២ខែមុន ដោយបានផ្តន្ទាទោសអនុប្រធានទីស្នាក់ការគយ និងរដ្ឋាករច្រកអាកាសយានដ្ឋានអន្តរជាតិសៀមរាបម្នាក់ឈ្មោះ ជ័យ ច័ន្ទតារា ឱ្យមានទោសរយៈពេល៣ឆ្នាំ តែទោសព្យួរក្រោមបទចោទប្រកាន់ «វិតិក្រម» ដូចគ្នា ។
តើនិយមន័យនៃវីតិក្រមមានន័យយ៉ាងដូចម្តេច ? មាត្រា៥៩២ នៃក្រមព្រហ្មទណ្ឌចែងថា វិតិក្រមគឺជាអំពើរបស់អ្នករាជការសាធារណៈ ឬពលរដ្ឋទទួលអាណត្តិសាធារណៈដែល ១-ទាមទារ ឬទទួលជាសិទ្ធិ ជាពន្ធ ជាអាករ នូវចំនួនប្រាក់ដែលខ្លួនបានដឹងថាមិនត្រូវបង់ ឬដែលលើសពីចំនួនដែលគេត្រូវបង់ ។ ២-យល់ព្រមក្រោមរូបភាពណាមួយ និងដោយមូលហេតុណាមួយក៏ដោយ ធ្វើការលើកលែង ឬការលោះចំពោះការបង់ពន្ធ ឬអាករដែលខ្លួនដឹងថាខុសច្បាប់ ។ទាក់ទិនទៅនឹងទោសទណ្ឌ មាត្រា៥៩៣ នៃក្រមព្រហ្មទណ្ឌដដែលបានកំណត់ថា បទវិតិក្រមត្រូវផ្តន្ទាទោសដាក់ពន្ធនាគារពី ២ទៅ៥ឆ្នាំ និងពិន័យជាប្រាក់ពី៤.០០០.០០០រៀល ទៅ១០.០០០.០០០រៀល ៕
ចែករំលែកព័តមាននេះ