ខេត្តព្រះសីហនុ ៖ តាមសេចក្តីរាយការណ៍បឋមបានឲ្យដឹងថា ស្រុកកំពង់សិលាគិតត្រឹមវេលាម៉ោង១១និង១០នាទីយប់ ថ្ងៃទី០៤ ខែកញ្ញានេះ ស្ថានភាពកម្ពស់ទឹកនៅចំណុចស្ពានស្ទឹងសំរោងចន្លោះគីឡូម៉ែត្រលេខ១១៥-១១៦ ក្នុងភូមិសាស្ត្រភូមិស្ទឹងសំរោង ឃុំអូរបាក់រទេះ ស្រុកកំពង់សិលា ខេត្តព្រះសីហនុ សភាពទឹកកំពុងបន្តហក់ឡើង ដល់កំរិតកម្ពស់ ៦.០០ម៉ែត្រពីបាតស្ទឹង ក្នុងនោះទឹកលើថ្នល់ជាតិមានកម្ពស់ ០.៤៥(បួនតឹកកន្លះ) ហូរកាត់តាមបណ្តោយលើផ្លូវជាតិប្រវែងប្រហែល១៨០ម៉ែត្រ ស្របពេលអាកាសធាតុមេឃនៅតែបន្តភ្លៀង។
ដោយផ្អែកលើមន្ត្រីជំនាញបច្ចេកទេសរបស់ក្រសួងសាធារណៈការ និងលោកអភិបាលស្រុកកំពង់សិលា គឺចរាចរណ៍តាមផ្លូវជាតិលេខ៤ ត្រង់ចំណុចស្ពានស្ទឹងសំរោង ទាំងរថយន្តតូច និងរថយន្តធន់ធំ រួម និងរថយន្តដឹកទំនិញប្រភេទធ្ងន់ ត្រូវបានផ្អាកមិនឲ្យធ្វើដំណើរការចរាចរណ៍ជាបណ្តោះអាសន្ន ។
បច្ចុប្បន្នកម្លាំងមូលដ្ឋាន អហ ស្រុកកំពង់សិលា និង អហ ស្នាក់ការសន្តិសុខ៤០២ សហការជាមួយកំម្លាំងគណបញ្ជាការឯកភាពរដ្ឋបាលស្រុកកំពង់សិលា ដឹកនាំដោយលោក សៅ បុរីវឌ្ឍនៈ អភិបាលនៃគណៈអភិបាលស្រុកកំពង់សិលា នៅគោលដៅស្ពានស្ទឹងសំរោង ធ្វើការបិទចរាចរណ៍ជាបណ្តោះអាសន្ន ៕ កែសម្រួលដោយ ៖ សុឃាក់
ចែករំលែកព័តមាននេះ