ខេត្តកំពង់ឆ្នាំង ៖ ឈើប្រណីត៧ដុំធំៗដឹកតាមគោយន្ត១គ្រឿងឆ្លងកាត់ក្រុងកំពង់ឆ្នាំង ត្រូវប្រជាការពារភូមិកណ្តាល សហការជាមួយសមត្ថកិច្ចស្ទាក់ចាប់បានជាមួយនិងម៉ូតូស្គូពី១គ្រឿងទៀត ដែលម្ចាស់ឈើបានរត់ចោល ខណៈដែលជនប្រព្រឹត្តបទល្មើសបម្រុង យកទៅផ្ទេរដាក់កាណូត ។
ខេត្តកំពង់ឆ្នាំង ៖ ឈើប្រណីត៧ដុំធំៗដឹកតាមគោយន្ត១គ្រឿងឆ្លងកាត់ក្រុងកំពង់ឆ្នាំង ត្រូវប្រជាការពារភូមិកណ្តាល សហការជាមួយសមត្ថកិច្ចស្ទាក់ចាប់បានជាមួយនិងម៉ូតូស្គូពី១គ្រឿងទៀត ដែលម្ចាស់ឈើបានរត់ចោល ខណៈដែលជនប្រព្រឹត្តបទល្មើសបម្រុង យកទៅផ្ទេរដាក់កាណូត ។
ការបង្ក្រាបនេះ គឺធ្វើឡើងកាលពីវេលាម៉ោង១០ និង៣០នាទីយប់ថ្ងៃទី១២ មីនា ២០១៤ ស្ថិតនៅចំណុចទំនប់បារាំង ក្នុងភូមិកណ្តាល សង្កាត់ផ្សារឆ្នាំង ក្រុងកំពង់ឆ្នាំង។
សមត្ថកិច្ចនគរបាលក្រុងកំពង់ឆ្នាំងបានឱ្យដឹងថា មុនពេលបង្ក្រាប គេឃើញមានគោយន្តកន្ត្រៃមួយគ្រឿងដឹកឈើប្រណីតធ្នង់ និងនាងនួន៧ដុំធំៗ ឆ្លងកាត់កណ្តាលក្រុងកំពង់ឆ្នាំងទាំងយប់ បើកចុះមកតាមទំនប់បារាំង និងមានម្ចាស់ឈើជិះម៉ូតូស្គូពីតាមពីក្រោយ ខណៈនោះដែរ មានមន្ត្រីតុលាការម្នាក់ប្រដេញតាមពីក្រោយ លុះមកដល់ចំណុចទំនប់បារាំង បានសហការជាមួយប្រជាការពារភូមិកណ្តាលស្ទាក់ចាប់បាន ។
ខណៈនោះម្ចាស់ឈើបានប្រវាយប្រតប់ជាមួយមន្រ្តីតុលាការដោយបានទម្លាក់ឈើពីលើគោយន្តចោលនៅកន្លែងកើតហេតុ ហើយឱ្យអ្នកបើកគោយន្តជាកូនចៅគេបើកគោយន្តយកទៅលាក់ក្នុងព្រៃ នៅពេលសមត្ថកិច្ចនគរបាលប៉ុស្តិ៍ និងក្រុងកំពង់ឆ្នាំងមកដល់ម្ចាស់ឈើបានរត់គេចខ្លួនបាត់ ដោយទុកម៉ូតូស្គូពីពណ៌ខ្មៅអត់ស្លាកលេខ១គ្រឿងចោលនៅកន្លែងកើតហេតុ ។ បន្ទាប់មកសមត្ថកិច្ចបានសហការគ្នារុករកគោយន្តដែលជនល្មើសលាក់ទុកឃើញនៅក្នុងព្រៃក្បែរមាត់បឹងព្រែកត្រពាំងខាងកើតភូមិកណ្តាល ។
គោយន្តនិងឈើប្រណីតទាំង៧ដុំធំៗ ដែលមានចំនួនប្រមាណជាង១ម៉ែត្រគូប និងម៉ូតូស្គូពីមួយគ្រឿងរបស់ជនល្មើសត្រូវបានសមត្ថកិច្ចនគរបាលក្រុងកំពង់ឆ្នាំងប្រគល់ជូនលោកនាយផ្នែករដ្ឋបាលព្រៃឈើកំពង់ឆ្នាំង ដឹកយកមករក្សាទុកនៅខណ្ឌរដ្ឋបាលព្រៃឈើកំពង់ឆ្នាំង ចាត់ការកសាងសំណុំរឿងតាមនិតិវិធី។
ចែករំលែកព័តមាននេះ