រាជធានីភ្នំពេញ ៖ តំបន់ Tohoku ប្រទេសជបុ៉ន កាលពី៣ឆ្នាំមុន គឺថ្ងៃទី១១ មីនា ២០១១ បានរងគ្រោះយ៉ាងធ្ងន់ធ្ងរពីការរញ្ជួយដី និងរលកស៊ូណាមិដែលមិនធ្លាប់មានពីមុនមក ហើយមនុស្សប្រមាណ២០.០០០នាក់បានបាត់បង់ជីវិត រួមទាំងលំនៅឋាន ហេដ្ឋារចនាសម្ព័ន្ធច្រើនឥតគណនា ។
រាជធានីភ្នំពេញ ៖ តំបន់ Tohoku ប្រទេសជបុ៉ន កាលពី៣ឆ្នាំមុន គឺថ្ងៃទី១១ មីនា ២០១១ បានរងគ្រោះយ៉ាងធ្ងន់ធ្ងរពីការរញ្ជួយដី និងរលកស៊ូណាមិដែលមិនធ្លាប់មានពីមុនមក ហើយមនុស្សប្រមាណ២០.០០០នាក់បានបាត់បង់ជីវិត រួមទាំងលំនៅឋាន ហេដ្ឋារចនាសម្ព័ន្ធច្រើនឥតគណនា ។
ដើម្បីរំលឹកនូវសោកនាដកម្ម និងវិនាសកម្មដោយធម្មជាតិដ៏រន្ធត់នោះ នៅថ្ងៃទី១១ មីនា ២០១៤ កន្លងមក ស្ថានទូតជបុ៉នប្រចាំកម្ពុជា បានរៀបចំពិធីរំលឹកខួបលើកទី៣ នៃការរញ្ជួយដី និងរលកយក្សស៊ូណាមិ ដែលប្រារព្ធធ្វើនៅសណ្ឋាគារសូហ្វីតែលភ្នំពេញ ភូគីត្រា ក្រោមអធិបតីភាពលោកឧបនាយករដ្ឋមន្ត្រីបណ្ឌិតសភាចារ្យ សុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងលោក Yuji Kumamaru ឯកអគ្គរាជទូតជបុ៉នប្រចាំនៅព្រះរាជាណាចក្រកម្ពុជា លោកស្រី Tomiko Kimura ស្ថាបនិកមូលនិធិផ្កាឈូក និងជានាយិកាសាលាអូរីហ្កាមិ។
លោកឧបនាយករដ្ឋមន្ត្រីបណ្ឌិតសភាចារ្យ សុខ អាន មានប្រសាសន៍ថា ក្នុងនាមប្រជាពលរដ្ឋ និងរាជរដ្ឋាភិបាលកម្ពុជា ពិសេសក្នុងនាមសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សូមសម្តែងនូវក្តីអាណិតអាសូរ និងសោកស្តាយជាថ្មីម្តងទៀតចំពោះអ្នកដែលបាត់បង់ក្រុមគ្រួសារជាទីស្រឡាញ់ មិត្តភក្តិ សហការី ក៏ដូចជាបាត់បង់ផ្ទះសម្បែង ទ្រព្យសម្បត្តិ និងរបរអាជីវកម្ម ដោយសារមហន្តរាយថ្ងៃទី១១ មីនា ២០១១ នៅតំបន់ Tohoku ។ លោកឧបនាយករដ្ឋមន្ត្រីបណ្ឌិតសភាចារ្យ សុខ អាន បានរំលឹកឡើងវិញថា កាលពីឆ្នាំ២០០៩ ប្រទេសកម្ពុជាបានទទួលរងគ្រោះពីខ្យល់ព្យុះទីហ្វុង Ketsana ដែលបានបណ្តាលឱ្យបាត់បង់ជីវិតមនុស្ស ខូចខាតទ្រព្យសម្បត្តិ និងផលដំណាំយ៉ាងដំណំ ។ ប្រទេសជបុ៉នគឺជាប្រទេសមួយក្នុងចំណោមប្រទេសជាមិត្តដទៃទៀត ដែលបានផ្តល់ជំនួយភ្លាមៗមកកម្ពុជា ទាំងស្មារតី និងហិរញ្ញវត្ថុ ។ នេះគឺជាកាយវិការដ៏ឧត្តុង្គឧត្តមឆ្លុះបញ្ចាំងឱ្យឃើញនូវការជួយគ្នាទៅវិញទៅមក មិត្តភាព និងសាមគ្គីភាពជាអន្តរជាតិ។
លោកឧបនាយករដ្ឋមន្ត្រីបណ្ឌិតសភាចារ្យ សុខ អាន បញ្ជាក់ថា ថ្ងៃនេះកុមារា កុមារីកម្ពុជាជាច្រើនបានច្រៀងចម្រៀងជាភាសាជបុ៉ន ដែលនិពន្ធឡើងជាពិសេសដើម្បីផ្តល់ជាកម្លាំងចិត្តដល់ជនរងគ្រោះ និងក្រុមគ្រួសារពីការរញ្ជួយដី និងរលកយក្សស៊ូណាមិ ហើយលោកជឿជាក់ថា ចម្រៀងដ៏មានអត្ថន័យរបស់ក្មួយៗប្រាកដជានឹងបានឮដល់ប្រជាជនជបុ៉ន និងអាចជួយបន្ធូរបន្ថយអារម្មណ៍តានតឹងរបស់ជនរងគ្រោះ និងក្រុមគ្រួសារ ។ នាឱកាសនោះផងដែរ លោកបណ្ឌិតសភាចារ្យ សុខ អាន ក៏បានថ្លែងនូវការកោតសរសើរ និងវាយតម្លៃខ្ពស់ចំពោះមូលនិធិផ្កាឈូក និងផ្នែកឯកជនរបស់ជបុ៉ននៅកម្ពុជា ដែលបានប្រមូលមូលនិធិដើម្បីជួយដល់ជនរងគ្រោះពីមហន្តរាយនេះ ៕
ចែករំលែកព័តមាននេះ