រាជធានីភ្នំពេញ ៖ សង្សារមួយគូដែលតែងតែជិះម៉ូតូឌុបគ្នាដើរលេងពេលរាត្រីបានជួបប្រទះរឿងស៊យផ្ទួនៗ ដោយត្រូវក្រុមចោរធ្វើសកម្មភាពប្លន់២លើកជាបន្ដបន្ទាប់ ដែលលើកទី១ប្រហែលជាជិត១ខែមុន ពួកគេបានជិះម៉ូតូធុនធំ១គ្រឿងម៉ាកស៊ីប៊ីអរ ឌុបគ្នាត្រឡប់មកពីដើរលេងវិញ ត្រូវក្រុមចោរប្រដាប់អាវុធបាញ់ប្រហារ១គ្រាប់បណ្ដាលឱ្យបុរសជាសង្សាររងរបួសធ្លាយគូទ ប៉ុន្ដែចោរយកម៉ូតូមិនបានទេ ។
ក្រោយមក គេមិនហ៊ានជិះម៉ូតូនោះ ក៏បានយកវាទៅលក់ រួចទិញម៉ូតូធំ១គ្រឿងទៀតម៉ាកប្រ៊ុលសា(ផលិតនៅប្រទេសឥណ្ឌា)វិញម្ដង ។ បន្ទាប់ពីរបួសបានជាសះស្បើយ ពួកគេបានជិះម៉ូតូដឹកគ្នាទៅដើរលេងទៀត ហើយក៏ត្រូវក្រុមចោរដែកឆាបជិះម៉ូតូដេញតាមចាក់ប៉ុនប៉ងប្លន់ជាលើកទី២ និងមិនបានសម្រេចទៀត តែបណ្ដាលឱ្យស្រីស្នេហ៍របួសវិញម្ដង ។ ក្រោយប្លន់មិនបានសម្រេច ក្រុមចោរបានជិះម៉ូតូគេចខ្លួនបាត់អស់។ ហេតុការណ៍លើកចុងក្រោយនេះបានបង្កឱ្យមានការភ្ញាក់ផ្អើលឡើងកាលពីវេលាម៉ោង៩និង១០នាទីយប់ថ្ងៃទី១១ មីនា នៅតាមផ្លូវបេតុងមួយកន្លែង ស្ថិតក្នុងភូមិថ្មគោល សង្កាត់ចោមចៅ ខណ្ឌពោធិ៍សែនជ័យ ។ ជនរងគ្រោះដែលត្រូវចោរប្លន់ចាក់នឹងដែកឆាបនេះឈ្មោះ ឆាន សុផាន អាយុ ១៩ឆ្នាំ ជាអ្នកបកប្រែភាសាចិននៅរោងចក្រកាត់ដេរឃ្យូអឹមអាយ ស្នាក់នៅក្នុងភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ រងរបួស១ផ្លែដែកឆាបត្រូវបានបុរសជាសង្សារនាំយកទៅមន្ទីរពហុព្យាបាលវិសាលសុខ នៅក្បែរនោះដើម្បីសង្គ្រោះបន្ទាន់ភ្លាមៗ ។
ដោយឡែក បុរសជាសង្សារ និងជាម្ចាស់ម៉ូតូឈ្មោះ ខា សុឌិន អាយុ ២៩ឆ្នាំ ជាអ្នកម៉ៅការសំណង់ មានទីលំនៅក្នុងសង្កាត់ទឹកថ្លា ខណ្ឌសែនសុខ ហើយម៉ូតូរបស់គេដែលត្រូវចោរប្លន់យកមិនបានសម្រេចម៉ាកប្រ៊ុលសា ផលិតនៅប្រទេសឥណ្ឌា អត់មានស្លាកលេខ ។ ចំណែកក្រុមចោរប្លន់មានគ្នា៦នាក់ជិះម៉ូតូម៉ាកហុងដាឌ្រីមសេ១២៥ ចំនួន៣គ្រឿង និងប្រដាប់ដោយដែកឆាប ក្រោយពេលធ្វើសកម្មភាពមិនបាន ពួកគេជិះម៉ូតូគេចខ្លួនបាត់អស់ ។ ប្រភពព័ត៌មានបានឱ្យដឹងថា មុនពេលកើតេហតុ ក្រោយពេលចេញពីធ្វើការថែមម៉ោងពេលយប់ នារីរងគ្រោះបានទូរស័ព្ទហៅបុរសជាសង្សារឱ្យឌុបនាងដើរលេង បន្ទាប់មកបុរសនោះបានទៅឌុបនាងចេញពីម្ដុំរោងចក្រកាត់ដេរឃ្យូអឹមអាយ ក្នុងបំណងទៅដើរលេងនៅរាជធានីភ្នំពេញ ។ លុះមកដល់ត្រង់ចំណុចកើតហេតុ ស្រាប់តែមានក្រុមចោរប្លន់ជិះម៉ូតូដេញតាមពីក្រោយ ហើយព្យាយាមបើកមកកៀរម៉ូតូរបស់គេឱ្យដួល និងដកដែកឆាបចាក់នារីរងគ្រោះបណ្ដាលឱ្យរបួសធ្ងន់ ប៉ុន្ដែខណៈនោះមានការភ្ញាក់ផ្អើលដល់កម្លាំងនគរបាលខណ្ឌពោធិ៍សែនជ័យ ដែលមានគោលដៅនៅក្បែរនោះ ទើបក្រុមចោរប្លន់យកម៉ូតូទៅមិនទាន់ ក៏នាំគ្នាជិះម៉ូតូគេចខ្លួនបាត់ស្រមោល ។ ក្រោយពេលកើតហេតុ ស្រ្ដីរងគ្រោះត្រូវបុរសជាសង្សារនាំទៅសង្គ្រោះបន្ទាន់នៅមន្ទីរពហុព្យាបាលវិសាលសុខភ្លាមៗ ។
គួររំលឹកថា កាលពីជិត១ខែមុន ពួកគេទាំងពីរនាក់ក៏ត្រូវក្រុមចោរប្លន់ប្រដាប់អាវុធធ្វើសកម្មភាពបាញ់ប្លន់បណ្ដាលឱ្យបុរសជាសង្សាររបួសធ្ងន់ម្ដងដែរ ខណៈពេលដែលពួកគេជិះម៉ូតូម៉ាកស៊ីប៊ីអរឌុបគ្នាត្រឡប់មកពីដើរលេងនៅពេលយប់អធ្រាត្រ ប៉ុន្ដែការប្លន់នោះមិនបានសម្រេចឡើយ ។ ក្រោយពេលបាញ់ប្រហារ ជនរងគ្រោះបានជិះម៉ូតូធ្លាក់ចូលទៅក្នុងប្រឡាយទឹក ស្ថិតនៅក្បែរនោះ ហើយក្រុមចោរក៏បានជិះម៉ូតូគេចខ្លួនបាត់ ។ ចំណែកជនរងគ្រោះត្រូវបានគេនាំទៅសង្គ្រោះបន្ទាន់ភ្លាមៗ ហើយក្រោយមកគេមិនហ៊ានជិះម៉ូតូនេះទៀតក៏បានយកវាទៅលក់ និងទិញម៉ូតូធំ១គ្រឿងទៀតម៉ាកប្រ៊ុលសានេះវិញម្ដង ព្រោះវាថោកជាងម៉ូតូស៊ីប៊ីអរ ប៉ុន្ដែនៅតែចៀសមិនផុតពីក្រុមចោរប្លន់ដដែល ។ ករណីគូសង្សារមួយគូនេះត្រូវបានសមត្ថកិច្ចដាក់ការសង្ស័យថា ជារឿងស្នេហាត្រីកោណ ៕
ចែករំលែកព័តមាននេះ