រាជធានីភ្នំពេញ ៖ អ្នកណាក៏ស្គាល់អ្នកនាងយុគ ចិន្ដា ដែរ ។ កេរ្ដិ៍ឈ្មោះល្បីសុសសាយរបស់នាងតាមរយៈអាជីពជាពិធីការិនីទូរទស្សន៍អស់រយៈពេលជិត២០ឆ្នាំមកហើយ ។ ឆ្លងកាត់ពេលវេលាជាយូរមកនោះ អ្នកនាងយុគ ចិន្ដា មិនថមថយប្រជាប្រិយភាព ផ្ទុយទៅវិញរឹតតែអណ្ដែតខ្ពស់ឡើង ។ ទោះជាយ៉ាងណា ក្ដី តើអ្នកនាងយុគ ចិន្ដា ធុញទ្រាន់ និងមានបំណងចាកចេញពីអាជីពចាស់ដដែលៗជាយូរមកហើយនេះទេ?
បច្ចុប្បន្នពិធីការិនីប្រជាប្រិយយុគ ចិន្ដា បំពេញនាទីក្នុងកម្មវិធីដ៏លេចធ្លោមួយចំនួននៅស្ថានីយទូរទស្សន៍ស៊ីធីអិន ដូចជាកម្មវិធី«ស៊ីធីអិនប៉ុស្ដិ៍លេខ២១» និងកម្មវិធីតន្ដ្រី«មន្ដស្នេហ៍សំនៀង» ជាដើម ។ លើសពីនេះទៀត ឆ្លងកាត់បទពិសោធន៍ច្រើនឆ្នាំ អ្នកនាងយុគ ចិន្ដា មានសមត្ថភាពក្នុងការផលិតកម្មវិធីទៀតផង ដោយបច្ចុប្បន្នមានកម្មវិធីពេញនិយមមួយចំនួនជាកម្មវិធីរៀបចំដឹកនាំរបស់នាងមានដូចជាកម្មវិធី«តន្ដ្រីថ្ងៃអាទិត្យ»និងកម្មវិធី«គំនិតស្រ្ដី»ជាដើម។
ក្រៅពីអាជីពជាពិធីការិនីអ្នកនាងយុគ ចិន្ដា ក៏មានមុខរបរផ្ទាល់ខ្លួនផ្សេងទៀតផងដែរ ដូច្នេះបើទោះជាមិនមានអាជីពពិធីការិនីក៏នាងអាចកសាងជីវភាពបានសមរម្យដែរ ។ ឈរលើហេតុផលបែបនេះ តើអ្នកនាងយុគ ចិន្ដា ធុញទ្រាន់ នឿយណាយ និងមានបំណងចង់ចាកចេញពីអាជីពពិធីការិនីទេ?
ដោយកំពុងតែមានមោទនភាពចំពោះអាជីពពិធីការិនីរបស់ខ្លួន ក្នុងជំនួបជាមួយអ្នកយកព័ត៌មានកោះសន្ដិភាពកាលពីពេល ថ្មីៗកន្លងមក ខណៈថតកម្មវិធីអបអរបុណ្យចូលឆ្នាំថ្មីប្រពៃណីជាតិរបស់ទូរទស្សន៍ស៊ីធីអិន អ្នកនាងយុគ ចិន្ដា អះអាងថា «ខ្ញុំនៅមិនទាន់មានបំណងបោះបង់អាជីពចាស់ជាពិធីការិនីទេ គឺនៅតែស្រឡាញ់ ទោះជាឆ្លងកាត់អស់ពេលរាប់ឆ្នាំក៏ដោយ» ។ អ្នកនាងយុគ ចិន្ដា មិនត្រឹមតែមានរបរផ្ទាល់ខ្លួននៅក្នុងស្រុកទេ នៅសហរដ្ឋអាមេរិកក៏មានដែរ ប៉ុន្ដែតាមរយៈការអះអាងនោះបង្ហាញច្បាស់ថា នាងនៅតែបម្រើទស្សនិកជនដដែល តាមរយៈការងារជាពិធីការិនីទូរទស្សន៍ ។
អ្នកនាងយុគ ចិន្ដា ឱ្យដឹងដែរថា ឆ្នាំនេះនាងអត់លុបចោលគម្រោងធ្វើដំណើរទៅអាេមរិក ដើម្បីសួរសុខទុក្ខម្ដាយ និងទៅមើលមុខរបរនៅទីនោះទេ ។ នាងនៅតែឆ្លៀតពេលទៅ ព្រោះជាទម្លាប់របស់នាងតាំងពីមុនមក ។ ដោយសារមានកម្មវិធីទៅអាមេរិកនោះ នាងរៀបចំកម្មវិធីថតសម្រាប់អបអរបុណ្យចូលឆ្នាំថ្មីនៅស៊ីធីអិនលឿនជាងរាល់ដង ព្រោះបើទុកពេលយូរជាងនេះគឺអត់មានចន្លោះទេ ។ ម៉្យាងការងារនាងរវល់ច្រើនមុខណាស់ ទាំងការងារនៅហាងក្នុងស្រុក និងការងារសិល្បៈ ។ អីុចឹងហើយទើបឆ្នាំនេះរៀបចំថតកម្មវិធីបុណ្យចូលឆ្នាំលឿនជាងមុនដល់ទៅ១ខែជាង ដើម្បីឱ្យការងារ ផ្សេងៗរបស់នាងអាចដំណើរការបានតាមការគ្រោងទុក ។
ដ្បិតតែមិនមានឱកាសបាននៅចូលរួមពិធីបុណ្យចូលឆ្នាំក្នុងស្រុក តែអ្នកនាងយុគ ចិន្ដា តែងតែនាំបុគ្គលិក មិត្ដរួមការងារ និងសិល្បករទាំងអស់ជួបជុំគ្នារាំ ច្រៀងសម្រាប់ចាក់ផ្សាយជារៀងរាល់ឆ្នាំមិនអាក់ខានទេ ។ កម្មវិធីនេះសម្រាប់ផ្សាយជូនទស្សនិកជនក្នុងស្រុក និងពេលនាងទៅអាមេរិកបានទស្សនាដែរ ព្រមទាំងបងប្អូនខ្មែរនៅទីនោះផង ។
ពិធីការនីយុគ ចិន្ដា ឱ្យដឹងថា ឆ្នាំនេះដំណើរទៅអាមេរិករបស់នាងមានរយៈពេល១ខែ ដោយចាកចេញក្នុងខែមីនា ហើយនាងនឹងត្រឡប់មកវិញដើម្បីកាន់ការងារនៅស្ថានីយទូរទស្សន៍ដូចដើមវិញ ។ ដោយមិនទាន់មានបំណងបោះបង់អាជីពចាស់ជាពិធីការិនីទេ ដូច្នេះទស្សនិកជននៅតែបានឃើញមុខអ្នកនាងយុគ ចិន្ដា តទៅទៀត តាមរយៈកញ្ចក់ទូរទស្សន៍ ៕
ចែករំលែកព័តមាននេះ