រាជធានីភ្នំពេញ ៖ ត្រឹមរយៈពេលតែ១ខែ ពោលគឺក្នុងខែសីហា ឆ្នាំ ២០១៩នេះ ក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC បានសម្រេចចុះវិញ្ញាបនបត្រជូនក្រុមហ៊ុនចុះបញ្ជីវិនិយោគជាផ្លូវការនៅកម្ពុជា នូវទឹកប្រាក់ប្រមាណជាង៧០០លានដុល្លារអាមេរិក ដែលអាចបង្កើតការងារបានប្រមាណជាង១ម៉ឺន៦ពាន់នាក់ នៅពេលគម្រោងវិនិយោគនេះដំណើរការ ។ អ្វីដែលគួរឲ្យកត់សម្គាល់នោះ ក្នុងខែសីហានេះគឺមានគម្រោងវិនិយោគរបស់ចិនសាងសង់សណ្ឋាគារកម្រិតផ្គាយ ៥ ចំនួនពីរផងដែរ ។ នេះបើតាមការសេចក្តីប្រកាសនៅលើបណ្ដាញសង្គមផ្លូវការរបស់ក្រុមប្រឹក្សា អភិវឌ្ឍន៍កម្ពុជា ។
ប្រភពពីក្រុមប្រឹក្សាអភិវឌ្ឍន៍កម្ពុជា បានបង្ហាញថាក្នុង១ខែពេញនៃខែសីហាកន្លងទៅនេះក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន ២១គម្រោង ដែលមានទឹកប្រាក់សរុបចំនួន ៧២៤លានដុល្លារអាមេរិក ដែលអាចបង្កើតការងារបានជាង១ម៉ឺន៦ពាន់នាក់តាមការប៉ាន់ស្មានដំបូង ។ នៅក្នុងសេចក្តីប្រកាសនេះដែរក៏បានឲ្យដឹងផងដែរថា គម្រោងវិនិយោគដែលមានទឹកប្រាក់ច្រើនជាងគេក្នុងខែសីហានេះ គឺជាគម្រោងវិនិយោគ សណ្ឋាគារផ្កាយ៥នៅខេត្តព្រះសីហនុ ដែលគម្រោងនេះ មានទឹកប្រាក់វិនិយោគប្រមាណ ២២៦លានដុល្លារអាមេរិក និងប៉ាន់ស្មានថា អាចផ្ដល់ការងារប្រមាណ ១៦៦៨នាក់នៅពេលគម្រោងរួចរាល់ ។ គម្រោងធំទី២ក្នុងខែសីហា គឺជាគម្រោងវិនិយោគសណ្ឋាគារថ្នាក់ផ្កាយ៥ដូចគ្នានៅក្នុងខេត្តព្រះសីហនុដដែល ដែលមានទុនវិនយោគប្រមាណ ១៥៣លានដុល្លារអាមេរិក និងអាចផ្ដល់ការងារប្រមាណ ៩៨១នាក់ នៅពេលដែលវារួចរាល់ ។
តាមរយៈការអនុម័តគម្រោងវិនិយោគនានានៅក្នុងប្រទេសកម្ពុជា បានសបញ្ជាក់អោយឃើញថា កម្ពុជា នៅតែមានសក្ដានុពលសម្រាប់ទាក់ទាញវិនិយោគិននានា មកកាន់កម្ពុជា ខណៈកម្ពុជាកំពុងសម្របសម្រួលនូវរាល់អ្នកវិនិយោគមកពីគ្រប់ទិសទី ទាំងអស់ដែលមានបំណងបណ្ដាក់ទុនវិនិយោគ លើវិស័យផ្សេងៗដែលមានអាទិភាព ។
សូមរំលឹកថា កាលពីចុងខែសីហា ២០១៩នេះដែរ ក្រុមប្រឹក្សាអភិវឌ្ឍន៍កម្ពុជាក៏បានចេញសេចក្តីប្រកាសមួយទៀត បង្ហាញពីគម្រោងចំនួន៤ ដែលក្រុមប្រឹក្សាអភិវឌ្ឍន៍បានសម្រេចចេញវិញ្ញាបនប័ត្រចុះបញ្ជីជាស្ថាពរ ។គម្រោងទាំង៤នេះមានទឹកប្រាក់សរុបប្រមាណជិត៥០០លានដុល្លារអាមេរិក ក្នុងនោះទីតាំងនៅខេត្តព្រះសីហនុ២គម្រោង ដែលជាគម្រោងវិនិយោគលើសណ្ឋាគារផ្កាយ៥ ខេត្តពោធិ៍សាត់មួយគម្រោង ជាគម្រោងអភិវឌ្ឍន៍ថាមពលអគ្គិសនី និងខេត្តកំពង់ឆ្នាំងមួយគម្រោងជាកម្រោងអភិវឌ្ឍន៍ថាមពលអគ្គិសនី ដូចគ្នា។
សម្ដេចតេជោហ៊ុន សែននាយករដ្ឋមន្ត្រីនៃកម្ពុជា បានថ្លែងថាស្ថានភាពវិនិយោគរបស់កម្ពុជា ក្នុងរយៈពេល៥ឆ្នាំកន្លងទៅនេះ ពោលគឺរាប់ចាប់ពីឆ្នាំ២០១៤ ដល់ឆ្នាំ ២០១៨កន្លងទៅនេះ គឺមានភាពល្អប្រសើរ ដោយកម្ពុជា បានអនុម័តគម្រោងវិនិយោគសរុបចំនួន៩៥៩គម្រោង ក្នុងនោះទុនវិនិយោគសរុបចំនួន ២៣ពាន់លានដុល្លារអាមេរិក ដែលអាចបង្កើតការងារបានប្រមាណ១លានកន្លែង ។ នេះគឺជាមោទនភាព មួយរបស់ប្រទេសកម្ពុជា ហើយកម្ពុជានូវស្វាគមន៍ការបណ្ដាក់ទុនវិនិយោគមកពីគ្រប់ទិសទីលើកពិភពលោក ។
ផ្អែកតាមរបាយការណ៍មួយបានបង្ហាញថា វិនិយោគិនជាប់ចំណាត់ថ្នាក់ទី១នៅកម្ពុជា គឺជាជនជាតិចិន ក្នុងនោះដែរ រួមមានទៅលើវិស័យអចលនទ្រព្យ កសិកម្ម និងផ្សេងៗទៀត វិនិយោគិនលំដាប់ទី២ គឺជាវិនិយោគិនក្នុងស្រុកផ្ទាល់តែម្ដង ដែលជំរុញឱ្យប្រជាពលរដ្ឋខ្លួនឯងកាន់តែមានប្រាក់ចំណូលខ្ពស់ និងជីវភាពធូរជាងមុន ៕ កែសម្រួលដោយ ៖ សុឃាក់
ចែករំលែកព័តមាននេះ