រាជធានីភ្នំពេញ ៖ដើម្បីចូលរួមធានាក្នុងការការពារសន្តិសុខសុវត្ថិភាព និងសណ្តាប់ធ្នាប់នៅរាជធានីភ្នំពេញឱ្យបានកាន់តែល្អប្រសើរឡើងជូនដល់បងប្អូនប្រជាពលរដ្ឋ លោកព្រំ សំខាន់ អភិបាលខណ្ឌចំការមន បានដឹកនាំកម្លាំងចម្រុះមួយក្រុមចុះធ្វើការឆែកឆេរអាវុធជាតិផ្ទុះ និងត្រួតពិនិត្យលើយានយន្តគ្រប់ប្រភេទ កាលពីវេលាម៉ោង៧ និង៣០នាទីយប់ថ្ងៃទី១១ មីនា ២០១៤ ស្ថិតនៅចំណុចខាងមុខអគារប៊ូឌីញ តាមបណ្តោយផ្លូវព្រះសុធារស ក្នុងសង្កាត់ទន្លេបាសាក់ ខណ្ឌចំការមន។
តាមប្រភពបានឱ្យដឹងថា ដោយយោងទៅតាមអនុសាសន៍ណែនាំរបស់លោកប៉ា សុជាតិវង្ស អភិបាលរាជធានីភ្នំពេញ រូបលោកផ្ទាល់រួមទាំងក្រុមមន្រ្តីក្រោមឱវាទក្នុងសាលាខណ្ឌតែងតែបានដឹកនាំកម្លាំងចម្រុះ រួមមានកម្លាំងកងរាជអាវុធហត្ថ និងកម្លាំងនគរបាលបានចុះធ្វើការឆែកឆេររកអាវុធជាតិផ្ទុះដែលប្រើខុសច្បាប់ និងត្រួតពិនិត្យលើយានយន្តគ្រប់ប្រភេទក្នុងភូមិសាស្រ្តផងដែរ ។
នេះជាការចូលរួមចំណែកមួយក្នុងការការពារសន្តិសុខសុវត្ថិភាព និងសណ្តាប់ធ្នាប់ឱ្យបានកាន់តែល្អប្រសើរឡើងជូនដល់បងប្អូនប្រជាពលរដ្ឋ ដែលរស់នៅក្នុងមូលដ្ឋាន ក៏ដូចជារាជធានីភ្នំពេញទាំងមូល ។ កម្លាំងចម្រុះរបស់ខណ្ឌចំការមន បានចុះធ្វើការត្រួតពិនិត្យនៅគ្រប់ទីកន្លែងក្នុងភូមិសាស្រ្តនៅពេលយប់ដោយបានធ្វើការឆែកឆេរទៅលើរាល់អ្នកដែលធ្វើដំណើរតាមយានយន្តគ្រប់ប្រភេទ ដែលមានការសង្ស័យ ឬទៅលើយានយន្តដែលគ្មានស្លាកលេខ ដើម្បីណែនាំឱ្យទៅធ្វើ ។
ចែករំលែកព័តមាននេះ