ខេត្តកំពង់ឆ្នាំង ៖ ជនសង្ស័យចំនួន០៥នាក់ដែលមានសកម្មភាពយ៉ាងសកម្មក្នុងការចែកចាយគ្រឿងញៀន ត្រូវបានសមត្ថកិច្ចកងរាជអាវុធហត្ថខេត្តនិងអាវុធហត្ថស្រុក សហការគ្នាបង្រ្កាបបានជាបន្តបន្ទាប់នៅកន្លែងផ្សេងៗគ្នា ចាប់ពីម៉ោង៩ព្រឹករហូតដល់ម៉ោង២និង៤០នាទីរសៀលថ្ងៃទី១១ មីនា នៅក្នុង
ស្រុកកំពង់ត្រឡាច ដោយដកហូតបានថ្នាំញៀនប្រភេទម៉ាទឹកកកចំនួន៣៣កញ្ចប់ កាំភ្លើងខ្លីមួយដើម ម៉ូតូ០២គ្រឿង និងសម្ភារជាច្រើនទៀត។
លោកឧត្តមសេនីយ៍ត្រី ជួន ជឿន មេបញ្ជារការកងរាជអាវុធហត្ថខេត្តបានឱ្យដឹងថា ក្នុងកិច្ចប្រតិបត្តិការ បង្ក្រាបករណីចែកចាយថ្នាំញៀនទាំង៣កន្លែងនៅក្នុងស្រុកកំពង់ត្រឡាចនេះ សមត្ថកិច្ច កងរាជអាវុធហត្ថខេត្ត បានសហការជាមួយអាវុធហត្ថស្រុក និងកងរាជអាវុធហត្ថស្នាក់ការលេខ៥០០ ដោយធ្វើការចាប់ឃាត់ខ្លួនមនុស្សចំនួន០៥នាក់ ក្នុងនោះមានស្ត្រីម្នាក់ផងដែរ ។ ចំពោះវត្ថុតាងដែលដកហូតបានរួមមាន ថ្នាំញៀនម៉ាទឹកកកចំនួន៣២កញ្ចប់តូច និង០១កញ្ចប់ធំ ជញ្ជីងថ្លឹងគ្រឿងញៀនមួយគ្រឿង ម៉ូតូ០២គ្រឿង កាំភ្លើងខ្លីម៉ាកកា៥៤ផលិតនៅប្រទេសសូវៀតមួយដើម ប្រាក់ចំនួន២១ម៉ឺនរៀល ទូរស័ព្ទ០៥គ្រឿងនិងសម្ភារមួយចំនួនទៀត ។
លោក លឹម ហាក់ នាយការិយាល័យស្រាវជ្រាវបទល្មើសព្រហ្មទណ្ឌកងរាជអាវុធហត្ថខេត្តជាអ្នកដឹកនាំបង្ក្រាបករណីខាងលើបានឱ្យដឹងថា ជនសង្ស័យដែលបានឃាត់ខ្លួនទាំង០៥នាក់នោះមាន ១-ឈ្មោះ ហា អូន អាយុ២៥ឆ្នាំ ,២-ឈ្មោះ ប៊ន គឹមសៀង អាយុ២៤ឆ្នាំ ទាំង០២នាក់រស់នៅ ភូមិសាលាលេខ៥ ឃុំអូរឬស្សី ,៣-ឈ្មោះ សូ សុផល អាយុ៣៥ឆ្នាំ ,៤-ឈ្មោះ សុខ សុផល អាយុ២៣ឆ្នាំ ទាំង០២នាក់រស់នៅភូមិសុបិន្ត ឃុំពានី ស្រុកកំពង់ត្រឡាច និង៥-ឈ្មោះ ទេព វ៉ាន់នី ភេទស្រី អាយុ១៩ឆ្នាំ រស់នៅភូមិក្រងស្វាយ ឃុំស្វាយរំពា ស្រុកមុខកំពូល ខេត្តកណ្តាល ។ ប្រភពដដែលបានបន្តថា ក្នុងការបង្ក្រាបនេះគឺបានធ្វើឡើងជាបន្តបន្ទាប់ ក្នុង៣ករណីផ្សេងៗគ្នា ដែលករណីទី១ ចាប់បានឈ្មោះ សុខ សុផល នៅក្នុងផ្ទះជួលក្បែររោងចក្រ ស្ថិតក្នុងភូមិតាអត ឃុំពានី ។ ករណីទី២ ចាប់បានឈ្មោះ ហា អូន ,ឈ្មោះសូ សុផល និងឈ្មោះ ទេព វ៉ាន់នី នៅផ្ទះជួលក្នុងភូមិអន្លង់ត្នោត ឃុំលង្វែក ។ និងករណីទី៣ចាប់បានឈ្មោះ ប៊ន គឹមសៀង នៅក្នុងហាងគុយទាវ ស្ថិតក្នុងភូមិសុបិន្ត ឃុំពានី ស្រុកកំពង់ត្រឡាច។
លោកបញ្ជាក់ថា កន្លងមកក្រុមចែកចាយថ្នាំញៀនខាងលើនេះធ្លាប់ធ្វើសកម្មភាពចែកចាយគ្រឿងញៀនយ៉ាងសកម្មនៅក្នុងស្រុកកំពង់ត្រឡាចមិនធ្លាប់មានសមត្ថកិច្ចចាប់ខ្លួនពួកគេបានឡើយ។ មេខ្លោងចែកចាយថ្នាំញៀនទាំង០៥នាក់ បច្ចុប្បន្ន សមត្ថកិច្ចកំពុងសាកសួរ ដើម្បីស្រាវជ្រាវ និងកសាងសំណុំរឿងតាមនីតិវិធី បញ្ជូនខ្លួននិងវត្ថុតាងទៅកាន់សាលាដំបូងខេត្តចាត់ការបន្តតាមផ្លូវច្បាប់ ៕
ចែករំលែកព័តមាននេះ