រាជធានីភ្នំពេញ ៖ បន្ទាប់ពីជំនួបចរចារវាងក្រុមគណៈកម្មការចម្រុះគណបក្សប្រជាជនកម្ពុជា និងគណបក្សសង្គ្រោះជាតិកាលពីថ្ងៃទី១០ មីនា កន្លងមក មិនទទួលបានផ្លែផ្កាជាដុំកំភួននោះ គណបក្សប្រជាជនកម្ពុជាបានចេញសេចក្តីថ្លែងការណ៍របស់ខ្លួនបដិសេធការស្នើសុំរបស់គណបក្សសង្គ្រោះជាតិអំពីស្ថាប័នរៀបចំការបោះឆ្នោតជាស្ថាប័នធម្មនុញ្ញ ហើយអនុម័តសមាសភាពស្ថាប័ននេះដោយសំឡេង២/៣ នៃសមាជិករដ្ឋសភាទំាងមូល ។
សេចក្តីថ្លែងការណ៍របស់គណបក្សប្រជាជនកម្ពុជាចុះថ្ងៃទី១០ មីនា ហើយដែលប្រព័ន្ធផ្សព្វផ្សាយទទួលបាននាថ្ងៃទី១១ មីនា មានខ្លឹមសារថា ជំនួបរបស់គណៈកម្មការចម្រុះគណបក្សប្រជាជនកម្ពុជា និងគណបក្សសង្គ្រោះជាតិនៅវិមានព្រឹទ្ធសភា កាលពីថ្ងៃទី១០ មីនា មិនបានឈានដល់ការធ្វើសេចក្តីប្រកាសរួមឡើយ ។ គណៈកម្មការចម្រុះដើម្បីសិក្សា និងរៀបចំក្របខណ្ឌកំណែទម្រង់ការបោះឆ្នោត ខាងគណបក្សប្រជាជនកម្ពុជាបានឯកភាពឲ្យដាក់ប្រធានបទកំណែទម្រង់ការបោះឆ្នោតទៅក្នុងក្របខ័ណ្ឌកំណែទម្រង់ការបោះឆ្នោត តែមិនឯកភាពលើការចែងអំពីស្ថាប័នរៀបចំការបោះឆ្នោតជាស្ថាប័នធម្មនុញ្ញ ហើយអនុម័តសមាសភាពស្ថាប័ននេះដោយសំឡេង២/៣ នៃសមាជិករដ្ឋសភាទំាងមូលនោះទេ ។
សេចក្តីថ្លែងការណ៍ដដែលបានលើកឡើងទៀតថា គណបក្សប្រជាជនកម្ពុជាមានការសោកស្តាយដោយគណបក្សសង្គ្រោះជាតិនៅតែយកបញ្ហានេះមកធ្វើជាលក្ខខណ្ឌ ដែលអាចបង្កការរំាងស្ទះដល់ដំណើរការកំណែទម្រង់ការបោះឆ្នោតនាពេលខាងមុខ ។ ទោះបីជាគណបក្សប្រជាជនកម្ពុជាមានការសោយស្តាយនិងមិនឯកភាពចំពោះការស្នើ និងលើកឡើងរបស់គណៈកម្មការចម្រុះគណបក្សសង្គ្រោះជាតិក្តី ក៏គណបក្សប្រជាជនកម្ពុជាបានប្រកាន់ជំហរបន្តការចរចាជាមួយគណបក្សសង្គ្រោះជាតិ តាមស្មារតីនៃកិច្ចប្រជុំនាថ្ងៃទី១០ មីនា កន្លងមក ។
ទាក់ទងនឹងសេចក្តីថ្លែងការណ៍របស់គណបក្សប្រជាជនកម្ពុជាពីការសោកស្តាយនិងបដិសេធចំពោះការលើកឡើង និងប្រកាន់ជំហររបស់គណបក្សសង្គ្រោះជាតិ លោក យ៉ែម បុញ្ញឫទ្ធិ អ្នកនំាពាក្យគណបក្សសង្គ្រោះជាតិ និងជាសមាជិកមួយរូបនៃគណៈកម្មការចម្រុះរបស់គណបក្សសង្គ្រោះជាតិបានប្រាប់កោះសន្តិភាពតាមទូរស័ព្ទនៅថ្ងៃទី១១ មីនា ថា ការស្នើសុំរបស់គណបក្សសង្គ្រោះជាតិដែលបានលើកឡើងនោះ គឺដើម្បីចង់ឲ្យស្ថាប័នរៀបចំការបោះឆ្នោតមួយមានលក្ខខណ្ឌឯករាជ្យ ដែលតំណាងឲ្យគណបក្សនយោបាយទំាងអស់ទទួលយកបាន ពិសេសនោះប្រជាពលរដ្ឋតែម្តង ។
លោកយ៉ែម បុញ្ញឫទ្ធិ បន្តថា អ្វីដែលគណបក្សសង្គ្រោះជាតិទាមទារនោះគឺគួរដាក់ស្ថាប័នរៀបចំការបោះឆ្នោតនេះឲ្យទៅក្នុងរដ្ឋធម្មនុញ្ញតែម្តង និងសមាសភាពគណៈកម្មាធិការជាតិរៀបចំការបោះឆ្នោតចង់ឲ្យមានការអនុម័តពីសមាជិករដ្ឋសភាចំនួន២/៣ ព្រោះថាសមាជិកសភា២/៣ តំណាងឲ្យមានការឯកភាពគ្នាពីគណបក្សនយោបាយដែលមានអាសនៈក្នុងរដ្ឋសភា ។ ចៀសវាងស្ថាប័នឯករាជ្យមួយនេះស្ថិតនៅក្រោមការគ្រប់គ្រងរបស់គណបក្សនយោបាយណាមួយ ព្រោះថាគណៈកម្មាធិការជាតិរៀបចំការបោះឆ្នោតជាស្ថាប័នមួយដែលមានមូលដ្ឋានគ្រឹះក្នុងការប្រតិបត្តិផង និងទទួលខុសត្រូវចំពោះការរៀបចំការបោះឆ្នោតជាតិផង ។
លោក យ៉ែម បុញ្ញឫទ្ធិ បញ្ជាក់ថា មូលហេតុដែលយើងលើកឡើងនិងស្នើនោះ ព្រោះថាយើងចង់មានការគិតគូរពីផលប្រយោជន៍ជាតិ ដើម្បីចៀសវាងរាល់លើកមានការបោះឆ្នោត តែងតែមានបញ្ហានោះ ។ បញ្ហាទាមទារពីភាគីម្ខាង និងភាគីម្ខាងទៀតបដិសេធនោះ ត្រូវបានលោក យ៉ែម បុញ្ញឫទ្ធិ ចោទទៅគណបក្សប្រជាជនកម្ពុជាថា គ្មានបំណងក្នុងការចរចាគ្នាស្តីពីកំណែទម្រង់កិច្ចការបោះឆ្នោតនោះទេ ព្រោះគាត់ចង់ទុក គណៈកម្មាធិការជាតិរៀបចំការបោះឆ្នោត (គ.ជ.ប )ហ្នឹង ដើម្បីលួចសន្លឹកឆ្នោតនៅលើកក្រោយទៀត ឬយ៉ាងណា? ប្រជាពលរដ្ឋបានដឹងច្បាស់លាស់និងយល់ដឹងខ្លួនគាត់បាត់ទៅហើយ ។ លោកយ៉ែម បុញ្ញឫទ្ធិ បន្ថែមថា គណបក្សសង្គ្រោះជាតិនៅតែប្រកាន់ជំហរចរចា និងរកដំណោះស្រាយបន្តទៀត ប៉ុន្តែបំណងរបស់គណបក្សសង្គ្រោះជាតិចង់ឲ្យមានភាពយុត្តិធម៌មិនប្រកាន់ថាបក្សណាមួយនោះទេ គឺចង់ឲ្យស្មើភាពត្រឹមត្រូវយុត្តិធម៌ សេរី …។
លោកយ៉ែម បុញ្ញឫទ្ធិ បានសម្តែងការសោកស្តាយចំពោះសេចក្តីថ្លែងការណ៍នៅរបស់គណបក្សប្រជាជនកម្ពុជានិងបានលើកឡើងថា កាលពីកិច្ចប្រជុំនាថ្ងៃទី១០ មីនា ហេតុអ្វីបានជាភាគីគណបក្សប្រជាជនកម្ពុជា លើកយកបញ្ហាសង្គមស៊ីវិលទៅវិញ ដែលខុសនឹងលក្ខខណ្ឌកំណែទម្រង់ការបោះឆ្នោតដែលជាប្រធានបទត្រូវដោះស្រាយ ។ ការលើកឡើងពីសង្គមស៊ីវិលវាមិនត្រូវទាល់តែសោះ ព្រោះថាមានសង្គមស៊ីវិលខ្លះធ្វើការទាក់ទងនឹងកិច្ចការបោះឆ្នោត និងសង្គមស៊ីវិលខ្លះទៀតធ្វើការទាក់ទងនឹងសង្គម ដូច្នេះវាមិនត្រូវ ។ រឿងអ្វីបានជាគាត់លើកយកបញ្ហាសង្គមស៊ីវិលមកជជែកគ្នាពីបញ្ហាពាក់ព័ន្ធនឹងកិច្ចការកំណែទម្រង់ការបោះឆ្នោត ។ ទោះជាយ៉ាងណាក្តី លោក យ៉ែម បុញ្ញឫទ្ធិ លើកឡើងថា ជំហររបស់គណបក្សសង្គ្រោះជាតិ នៅតែរក្សាក្នុងការចរចា ជាមួយគណបក្សប្រជាជនកម្ពុជា ដដែលនៅថ្ងៃទី១៧ មីនា ប៉ុន្តែគណបក្សសង្គ្រោះជាតិនឹងពិនិត្យមើលថាមានការវិវត្តទេ សម្រាប់ការចរចាគ្នាជាច្រើនលើកមកនេះ ។
សូមបញ្ជាក់ថា គណបក្សប្រជាជនកម្ពុជាបានចេញសេចក្តីថ្លែងការណ៍មួយបន្ទាប់ពីកិច្ចប្រជុំរវាងក្រុមគណៈកម្មការចម្រុះអស់រយៈពេលជាង៣ម៉ោង កាលពីថ្ងៃទី១០ មីនា ដែលមិនបានឯកភាពគ្នា និងចេញសេចក្តីថ្លែងការណ៍ណាមួយនោះទេ ។ ប៉ុន្តែគណបក្សទំាង២បានកំណត់ជួបគ្នាជាថ្មីនាថ្ងៃទី១៧ មីនា ខាងមុខនេះនៅវិមានព្រឹទ្ធសភាបន្តទៀត ៕
ចែករំលែកព័តមាននេះ