ខេត្តព្រៃវែង ៖ អគ្គិភ័យដ៏សន្ធោសន្ធៅមួយបានឆេះចេញពីកណ្តាលផ្សារកអណ្តើក ដោយលេបត្របាក់យកតូបអ្នកលក់ដូរគ្រឿងសម្ភារប្រើប្រាស់ផ្សេងៗ រួមមានគ្រឿងទេស សម្លៀកបំពាក់ អាគុយ ស្បែកជើង ថ្នាំពេទ្យ និងតូបលក់គ្រឿងក្រអូបឆេះអស់ទាំងស្រុងចំនួន១២តូប ។ ហេតុការណ៍អគ្គិភ័យនេះ បានធ្វើឱ្យប្រជាពលរដ្ឋរស់នៅក្នុងផ្សារកអណ្តើក ផ្អើលឆោឡោនាំគ្នាជញ្ជូនអីវ៉ាន់របស់ខ្លួន ព្រោះខ្លាចភ្លើងឆេះដល់ ។
ខេត្តព្រៃវែង ៖ អគ្គិភ័យដ៏សន្ធោសន្ធៅមួយបានឆេះចេញពីកណ្តាលផ្សារកអណ្តើក ដោយលេបត្របាក់យកតូបអ្នកលក់ដូរគ្រឿងសម្ភារប្រើប្រាស់ផ្សេងៗ រួមមានគ្រឿងទេស សម្លៀកបំពាក់ អាគុយ ស្បែកជើង ថ្នាំពេទ្យ និងតូបលក់គ្រឿងក្រអូបឆេះអស់ទាំងស្រុងចំនួន១២តូប ។ ហេតុការណ៍អគ្គិភ័យនេះ បានធ្វើឱ្យប្រជាពលរដ្ឋរស់នៅក្នុងផ្សារកអណ្តើក ផ្អើលឆោឡោនាំគ្នាជញ្ជូនអីវ៉ាន់របស់ខ្លួន ព្រោះខ្លាចភ្លើងឆេះដល់ ។
ទីតាំងផ្សារនេះ ស្ថិតក្នុងភូមិប្រាសាទ ឃុំប្រាសាទ ស្រុកកំពង់ត្របែក ជាប់ព្រំប្រទល់ខេត្តស្វាយរៀង ។ អគ្គិភ័យដែលបង្កឱ្យមានការភ័យស្លន់ស្លោ និងបះសក់គ្រប់ៗគ្នានោះ កើតឡើងកាលពីវេលាម៉ោង១២ និង៣០នាទីរំលងអធ្រាត្រ ឈានចូលថ្ងៃទី១១ មីនា ។ មូលហេតុដែលបណ្តាលឱ្យឆេះ ត្រូវបានក្រុមអាជ្ញាធរនិយាយថា បណ្តាលមកពីទុស្សេចរន្តអគ្គិសនី នៅតូបអ្នកលក់ស្បែកជើងឈ្មោះ ម៉ៅ សុខ ភេទប្រុស អាយុ៤៨ឆ្នាំ ដោយម្ចាស់តូបមិននៅដេក ហើយបិទទ្វារចោល ។ នេះបើតាមរបាយការណ៍របស់នគរបាលប៉ុស្តិ៍ប្រាសាទ ។ ប្រភពព័ត៌មានឱ្យដឹងថា ការឆេះនេះចាប់ផ្តើមពីវេលាម៉ោង១២ និង៣០នាទី រហូតដល់ម៉ោងជាង២រំលងអធ្រាត ទើបរលត់អស់ទៅវិញ ដោយសារប្រជាពលរដ្ឋរាប់រយនាក់ នាំគ្នាដងទឹកហុចបន្តគ្នា ដើម្បីជះពន្លត់ភ្លើង ។ នៅព្រឹកថ្ងៃទី១១ មីនា អាជ្ញាធរបានចុះទៅត្រួតពិនិត្យកន្លែងឆេះ សរុបការខូចខាតជាជំហានដំបូងអស់ប្រហែលជាង២ម៉ឺនដុល្លារ ។
ក្នុងហេតុការណ៍អគ្គិភ័យនេះ គេពុំឃើញមានរថយន្តពន្លត់អគ្គិភ័យមកជួយអន្តរាគមន៍ទេ គឺមានតែកម្លាំងប្រជាពលរដ្ឋសុទ្ធសាធ នាំគ្នាពន្លត់ភ្លើង ។ បញ្ហាគ្មានការអន្តរាគមន៍ពីរថយន្តពន្លត់អគ្គិភ័យនេះ ដោយសារសម្រាប់ខេត្តព្រៃវែង មានរថយន្តពន្លត់អគ្គិភ័យ២គ្រឿងដែរ បានដាក់ប្រចាំការនៅស្នងការដ្ឋានខេត្ត ក្នុងក្រុងព្រៃវែង តែមិនមានរថយន្តពន្លត់អគ្គិភ័យត្រូវបានដាក់នៅកន្លែងណាសម្រាប់ធ្វើអន្តរាគមន៍បានទេ សូម្បីតែតំបន់អ្នកលឿង ដែលជាទីប្រជុំជនដ៏ធំ ក៏គ្មានដែរ គឺមានរថយន្តពន្លត់អគ្គិភ័យតូចមួយគ្រឿងរបស់អធិការដ្ឋាននគរបាលស្រុកពាមរក៍ ដែលមិនមានសមត្ថភាពក្នុងការបាញ់ពន្លត់អណ្តាតភ្លើងជាទ្រង់ទ្រាយធំបានទេ ប្រសិនបើមានអគ្គិភ័យកើតឡើង ។
ប្រជាពលរដ្ឋនិយាយថា ចាត់ទុកជាសំណាងណាស់ ដែលពួកគាត់បាននាំគ្នាពន្លត់ភ្លើងនេះមិនឱ្យមានការរាលដាលធំរហូតពន្លត់មិនបាន បើសិនជាជះទឹកតាមធុង ប៉ោត ឬក៏ថាំងនោះ មិនរលត់ទេ និងមានមហន្តរាយធំមិនខានឡើយ។ មន្ត្រីនគរបាល ឱ្យដឹងថា ទោះបីមានរថយន្តពន្លត់អគ្គិភ័យមកធ្វើអន្តរាគមន៍នោះ ក៏រកផ្លូវចូលទៅកន្លែងដែលឆេះមិនរួចដែរ ព្រោះទីតាំងផ្សារកអណ្តើកនេះ មានផ្ទះនៅជុំវិញ ហើយបើមានអាសន្ន ម្នាក់ៗនាំគ្នាជញ្ជូនអីវ៉ាន់ចេញពីតូប និងផ្ទះនោះពិតជាណែនផ្លូវរួចទៅហើយ ។
មន្ត្រីនគរបាល ឱ្យដឹងទៀតថា ពេលកំពុងមានអគ្គិភ័យនោះ យាយតា២នាក់ ដែលគាត់សម្រាកក្នុងតូប ត្រូវបានកូននាំគ្នារំដោះពួកគាត់ចេញពីអណ្តាតភ្លើង និងមិនយកអ្វីបាននោះទេ គឺមុខទំនិញរបស់ខ្លួនបានក្លាយជាចំណីភ្លើងទាំងអស់ ។ នេះជាមហន្តរាយលើកដំបូងហើយ ដែលមានអគ្គិភ័យឆេះផ្សារកអណ្តើក ជាផ្សារមួយស្ថិតនៅតាមដងផ្លូវជាតិលេខ១ និងជាទីប្រជុំជនដ៏ធំមួយផងដែរ ៕
ចែករំលែកព័តមាននេះ