រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍សម្រេចឱ្យក្រសួងមុខងារសាធារណៈ លុបចោលកាំ«ឃ»របស់មន្ត្រីរាជការអត់ឱ្យមានទៀតទេ ត្រូវបញ្ចូលមកកាំ«គ» តែម្តង ។ ម្យ៉ាងទៀតគ៣ដែលមាន១៤ថ្នាក់ គឺត្រូវលុបចោលនៅ១២ថ្នាក់ ឬ១០ថ្នាក់ ។
រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍សម្រេចឱ្យក្រសួងមុខងារសាធារណៈ លុបចោលកាំ«ឃ»របស់មន្ត្រីរាជការអត់ឱ្យមានទៀតទេ ត្រូវបញ្ចូលមកកាំ«គ» តែម្តង ។ ម្យ៉ាងទៀតគ៣ដែលមាន១៤ថ្នាក់ គឺត្រូវលុបចោលនៅ១២ថ្នាក់ ឬ១០ថ្នាក់ ។
ការឡើងបៀវត្សរ៍កាលពីមុនគឺឡើងអត្រា២០% ស្មើគ្នាទាំងអស់ ប៉ុន្តែឥឡូវនេះមិនអនុវត្តដូចពីមុនទេ គឺអនុវត្តនូវពហុអត្រា ពហុអត្រាចំពោះកាំគ៣ គឺឡើងប្រាក់ជាង២០% ។ ប៉ុន្តែក្របខណ្ឌ«ក» វិញគឺឡើងប្រាក់ត្រឹមតែ២០%ទេ ។ សម្តេចេតជោនាយករដ្ឋមន្ត្រី បានមានប្រសាសន៍សម្រេចឱ្យក្រសួងមុខងារសាធារណៈអនុវត្តបែបនេះ នាព្រឹកថ្ងៃទី១១ មីនា នៅវិទ្យាស្ថានជាតិអប់រំក្នុងឱកាសអញ្ជើញជាអធិបតីភាពក្នុងពិធីប្រគល់សញ្ញាបត្រគ្រូបង្រៀនកម្រិតឧត្តម (បរិញ្ញា+១) ជំនាន់ទី១៨ និងសញ្ញាបត្រគ្រូបង្រៀនកម្រិតមូលដ្ឋានឯកទេសភាសាបារាំង-ខ្មែរ ជំនាន់ទី១៥ ជូនដល់គរុនិស្សិត និងគរុសិស្ស សរុប១.០៣៨នាក់ (នារី៣៣៩នាក់ ) ដែលបានបញ្ចប់ការសិក្សាប្រកបដោយជោគជ័យ ។
សម្តេចតេជោមានប្រសាសន៍បន្តថា ការដំឡើងប្រាក់ខែនេះត្រូវរៀបចំធ្វើឡើងវិញ គឺមិនត្រូវឱ្យឡើង២០%ស្មើគ្នាទេ ព្រោះមន្ត្រីដែលមានក្របខណ្ឌ«ក» គឺមានបៀវត្សរ៍ខ្ពស់ទៅហើយ លុះដល់ឡើង២០%ទៀត គឺកម្រិតប្រាក់កាន់តែខ្ពស់ទៀត ។ លុះដល់មន្ត្រីដែលមានកាំផ្សេងប្រាក់បៀវត្សរ៍ទាប ដល់ឡើង២០%ទៅប្រាក់បៀវត្សរ៍នៅតែទាប ។ ដូច្នេះមួយឡើង២០%ប្រាក់ខែច្រើន មួយឡើង២០%ប្រាក់នៅតែទាបដដែល ។ បើដូច្នេះត្រូវរៀបចំឡើងវិញ តាមរបៀបពហុអត្រា ក្របខណ្ឌណាត្រូវឡើងបានប៉ុន្មាន ក្របខណ្ឌណាត្រូវបានប៉ុន្មាន គឺរុញទៅតាមរបៀបពីខាងក្រោមកាំគ ឱ្យបានខ្ពស់ឡើងបន្តិចទៅ ។ នេះជាកម្មវិធីនៃការរៀបចំប្រព័ន្ធបៀវត្សរ៍នៅពេលខាងមុខ ហើយឈានឆ្ពោះទៅដល់ដំណាក់កាលនៃការបើកប្រាក់បៀវត្សរ៍របស់មន្ត្រីរាជ ការទាំងអស់នៅតាមធនាគារឱ្យបានលឿន ដើម្បីបំបាត់និងចៀសវាងនូវការកាត់កងផ្សេងៗនាំឱ្យមានបញ្ហាកាន់តែច្រើន ។
សម្តេចតេជោមានប្រសាសន៍បញ្ជាក់ថា យើងត្រូវធ្វើដំណើរបន្តិចម្តងៗតាមវិធីកំណែទម្រង់របស់រាជរដ្ឋាភិបាល ទោះបីថាប្រាក់ខែនៅមិនទាន់ស្របទៅតាមចង់បានរបស់យើងទាំងអស់គ្នាក្តី ។ បើសិនជាឱ្យមនុស្សស្របគ្រប់គ្នាលើពិភពលោក គឺទាល់តែពិភពលោកទាំងមូលមានលុយម្នាក់ៗស្មើនឹងប៊ីលហ្គេត ទើបពិភពលោកអស់មានបញ្ហា ។ ប៉ុន្តែនៅលើពិភពលោកនេះ គឺវាតែងតែមានចៀសមិនផុតទេ អ្នកមាន អ្នកក្រ អ្នកមានប្រាក់ខែច្រើន អ្នកមានប្រាក់ខែតិច គឺជារឿងធម្មតាខ្លាំងណាស់ ។ ឯចំណែករឿងអ្នកសន្យាវិញគឺអត់មានលំបាកទេ ព្រោះគ្រាន់តែនិយាយមិនមានអ្វីពិបាកឡើយ ។ ប៉ុន្តែការធ្វើឱ្យបាននោះគឺ តើត្រូវដោះស្រាយនូវវិធានការរបៀបយ៉ាងម៉េច ? គឺមិនមែនគ្រាន់តែនិយាយរួចចប់នោះទេ ។ ចំពោះខ្លួនខ្ញុំនិយាយនៅទីនេះ គឺមុននឹងខ្ញុំនិយាយខ្ញុំដាក់ចេញនូវផែនការនៃកំណែទម្រង់ឱ្យដាច់ខាត ត្រូវតែម៉ឺងម៉ាត់ឱ្យបើកប្រាក់ខែក្នុងខែ ត្រូវតែបញ្ជាក់ជាមួយក្រសួងសេដ្ឋកិច្ចនិងហរិញ្ញវត្ថុ បញ្ជាក់ជាមួយរតនាគារជាតិឱ្យបានច្បាស់ថា ក្នុងពេលដែលរុញឱ្យបានបើកប្រាក់ខែ សាច់ប្រាក់មានពិតប្រាកដឬអត់ ។ បើដូច្នេះគឺត្រូវរៀបចំសាច់ប្រាក់ឱ្យមានតាំងពី២-៣ខែមុន គឺរំកិលសាច់ប្រាក់ជាបណ្តើរៗៗ…។ ព្រោះកាលពីមុនសាច់ប្រាក់គឺមានជាក្រដាសនិងជាសាច់ប្រាក់ បើមានអាណាប័កទៅបើកគឺវាគ្រាន់តែជាក្រដាសទេ ប៉ុន្តែទៅដល់រតនាគារមានសាច់ប្រាក់ឬអត់ ?
សម្តេចតេជោមានប្រសាសន៍ថាក្នុងឋានៈជានាយករដ្ឋមន្ត្រីដែលបាននិយាយចេញទៅហើយ ស្រាប់តែពេលអនុវត្តជាក់ស្តែង ទៅបើកលុយ បែរជាខាងរតនាគារថាអត់មានសាច់ប្រាក់ ។ បើដូច្នេះក្នុងឋានៈជានាយករដ្ឋមន្ត្រី តើតួនាទីនាយករដ្ឋមន្ត្រីរបៀបដូចម្តេច …? ប៉ុន្តែអ្នកដែលជានាយករដ្ឋមន្ត្រីឧទាហរណ៍អត់បញ្ហាអ្វីទាំងអស់ គ្រាន់តែឧទាហរណ៍ទេ តើបើខ្ញុំឈ្នះ ខ្ញុំឱ្យប្រាក់ខែមួយលានរៀល ហើយបើកឱ្យលឿនបើកតាំងពីថ្ងៃទី១…។ ប៉ុន្តែចំពោះនាយករដ្ឋមន្ត្រីពិតប្រាកដ កាលណានិយាយគឺត្រូវតែអនុវត្ត ។ មាននៅសល់ចន្លោះប្រហោងខ្លះដែរ គឺមិនមែនអត់ទេ …ឧទាហរណ៍ដូចជាលុយបានបញ្ជូនទៅធនាគារ ស្រាប់តែធនាគារនោះអត់សាច់ប្រាក់ដែរ វាអាចជួបប្រទះនូវករណីខ្លះដែរ ។ ប៉ុន្តែនៅពេលដែលធនាគារអត់សាច់ប្រាក់មិនមែនបណ្តាលមកពីនាយករដ្ឋមន្ត្រី ហើយក៏មិនមែនរដ្ឋមន្ត្រីក្រសួងសេដ្ឋកិច្ចនិងហរិញ្ញវត្ថុទេ គឺមកពីធនាគារខ្លួនគាត់នោះ គឺអ្នកទទួលបន្ទុកសេវាផ្តល់ប្រាក់ខែជូនបុគ្គលិកមន្ត្រីរាជការកងកម្លាំងប្រដាប់អាវុធគឺគាត់យឺតសាច់ប្រាក់ខាងគាត់ទេ។
លោកបណ្ឌិតហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡា បានថ្លែងថា ពិតណាស់ក្នុងយុទ្ធសាស្ត្រចតុកោណរបស់រាជរដ្ឋាភិបាល ពិសេសសម្រាប់នីតិកាលទី៥ នេះ សម្តេចតេជោ មានទស្សនទាន និងចក្ខុវិស័យវែងឆ្ងាយប្រកបដោយគតិបណ្ឌិត ដោយបានចាត់ទុកវិស័យអប់រំ ជាវិស័យអាទិភាពក្នុងការអភិវឌ្ឍធនធានមនុស្សសម្រាប់បន្តវេន ការពារ កសាងនិងអភិវឌ្ឍន៍ប្រទេសជាតិ ។ ជាក់ស្តែងដូចមានកម្មវិធីកំណែទម្រង់ស៊ីជម្រៅនៅគ្រប់វិស័យដែលសម្តេចតេជោ បានដាក់ចុះសម្រាប់នីតិកាលនេះ ។ លោកបណ្ឌិតរដ្ឋមន្ត្រីបន្តថា អស់រយៈពេលជាង៣៥ឆ្នាំនេះ ក្រោមការដឹកនាំរបស់រាជរដ្ឋាភិបាលកម្ពុជា ដែលមានសម្តេចតេជោនាយករដ្ឋមន្ត្រីជាប្រមុខ វិស័យអប់រំត្រូវបានស្តារ កសាងនិងអភិវឌ្ឍន៍ប្រកបដោយលទ្ធផលធំធេងជាប្រវត្តិសាស្ត្រ ដោយចាប់ផ្តើមពីបាតដៃទទេ ក្រោយពីត្រូវបំផ្លាញខ្ទេចខ្ទីក្នុងរបបប្រល័យពូជសាសន៍នៃពួកខ្មែរក្រហម ។
អនុវត្តតាមយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាលនីតិកាលទី៥ នៃរដ្ឋសភា និងតាមផែនការយុទ្ធសាស្ត្រអភិវឌ្ឍន៍ជាតិឆ្នាំ២០១៤-២០១៨ ក្រសួងអប់រំយុវជននិងកីឡា បានដាក់ចេញនូវផែនការយុទ្ធសាស្ត្រវិស័យអប់រំសម្រាប់ឆ្នាំ២០១៤-២០១៨ ដោយផ្តោតលើគោលនយោបាយគន្លឹះសំខាន់ៗរួមមាន ការធានាលទ្ធភាពទទួលបានសេវាអប់រំប្រកបដោយសមធម៌ ការលើកកម្ពស់គុណភាព និងប្រសិទ្ធភាពនៃការគ្រប់គ្រងរបស់មន្ត្រីអប់រំគ្រប់លំដាប់ថ្នាក់ ៕
ចែករំលែកព័តមាននេះ