ខេត្តបាត់ដំបង ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ទៅកាន់ប្រជាពលរដ្ឋថា ក្នុងនាមសម្តេច ជា ស៊ីម សម្តេច ហេង សំរិន ក្នុងនាមគណបក្សប្រជាជនកម្ពុជា ក៏ដូចជាខ្លួនខ្ញុំផ្ទាល់ សូមថ្លែងអំណរគុណចំពោះប្រជាពលរដ្ឋទាំងអស់ ដែលបានបោះឆ្នោតគាំទ្រគណបក្សប្រជាជនកម្ពុជា កាលពីសម័យបោះឆ្នោតកន្លងទៅ ។
ខេត្តបាត់ដំបង ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ទៅកាន់ប្រជាពលរដ្ឋថា ក្នុងនាមសម្តេច ជា ស៊ីម សម្តេច ហេង សំរិន ក្នុងនាមគណបក្សប្រជាជនកម្ពុជា ក៏ដូចជាខ្លួនខ្ញុំផ្ទាល់ សូមថ្លែងអំណរគុណចំពោះប្រជាពលរដ្ឋទាំងអស់ ដែលបានបោះឆ្នោតគាំទ្រគណបក្សប្រជាជនកម្ពុជា កាលពីសម័យបោះឆ្នោតកន្លងទៅ ។
សម្តេចតេជោនាយករដ្ឋមន្ត្រី បានមានប្រសាសន៍បែបនេះ នាព្រឹកថ្ងៃទី១០ មីនា នៅវិទ្យាល័យបវេល ក្នុងស្រុកបវេល ក្នុងឱកាសអញ្ជើញជាអធិបតីភាព ក្នុងពិធីសម្ពោធបើកឱ្យប្រើប្រាស់ផ្លូវជាតិលេខ៥៧B ដែលមានប្រវែងសរុប១៧៦,៣៥គីឡូម៉ែត្រ ។ ផ្លូវនេះចែកចេញជា៣កំណាត់ គឺកំណាត់ថ្មគោល-បវេល-សំពៅលូន កំណាត់បវេល-ភូមិសាមសិប-ភ្នំព្រឹក និងកំណាត់ភូមិសាមសិប-កំរៀង -អូរដា ក្រោមកម្ចីសម្បទានពីរដ្ឋាភិបាលនៃសាធារណរដ្ឋប្រជាមានិតចិន ។ នៅក្នុងពិធីនេះ ក៏មានការអញ្ជើញចូលរួមផងដែរ លោកជំទាវប៊ូ ជៀនគ័រ ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា ។
សម្តេចតេជោនាយករដ្ឋមន្ត្រីមានប្រសាសន៍បន្តថា ការគាំទ្រនោះហើយដែលបានផ្តល់ឱកាសឱ្យខ្ញុំបានមកសម្ពោធដាក់ឱ្យប្រើប្រាស់ផ្លូវជាតិលេខ៥៧Bនៅថ្ងៃនេះនិងជាបន្តទៀត ។ នយោបាយហេដ្ឋារចនាសម្ព័ន្ធដែលដោះស្រាយបញ្ហាទឹក បញ្ហាផ្លូវ បញ្ហាភ្លើង បញ្ហាមនុស្ស ឱ្យប្រជាពលរដ្ឋកម្ពុជា គឺជានយោបាយអាទិភាពរបស់រាជរដ្ឋាភិបាលដែលដឹកនាំដោយគណបក្សប្រជាជនជាបន្តទៀត ។ ពាក់ព័ន្ធនឹងបញ្ហានេះ សម្តេចតេជោបានគូសបញ្ជាក់ថា ពុំមាននយោបាយប្រជាភិថុតិណាមួយទេ នយោបាយរបស់យើងជាក់ស្តែង ហើយនយោបាយផ្លូវថ្នល់ ដែលបាននិងកំពុងធ្វើបច្ចុប្បន្នគឺបានសម្រួល អត់មានការលំបាកអ្វីទៀតទេ ផ្លូវក៏ល្អស្អាត ។
ទន្ទឹមនឹងនេះ សម្តេចតេជោ បានលើកសម្តីរបស់គណបក្សផ្សេងដែលគេនិយាយថា មុខតែដដែល ។ សម្តេចបញ្ជាក់ថា មិនដូរយ៉ាងម៉េចកើត តើឥឡូវមានហាងកែសម្ផស្ស ឬអត់ ? គិតកែមុខខ្លះ…ប៉ុន្តែបើសិនជាកែមុខទៅក៏នៅតែឈ្មោះដដែល កែសម្ផស្សទៅ ហ៊ុន សែន នៅតែ ហ៊ុន សែន, ស ខេង នៅតែ ស ខេង, កែ គឹមយ៉ាន នៅតែ កែ គឹមយ៉ាន, យឹម ឆៃលី នៅតែ យឹម ឆៃលី , សេរី កុសល នៅតែ សេរី កុសល , ត្រាំ អីុវតឹក នៅតែ ត្រាំ អុីវតឹក ដូចគ្នា ។ គេថាមុខដដែល…។ ហើយខ្លួនឯងធ្វើបក្សប្រឆាំងក៏មុខដដែលដែរ ម៉េចក៏មិនព្រមថាផង ទៅជាអីុចេះ ។ ប៉ុន្តែអត់អីទេ យូរៗគេក៏ត្រូវការអ្នកមុខដដែលហ្នឹងដោះស្រាយឱ្យ ព្រោះមុខដដែលហ្នឹងមិនមែនទើបតែឥឡូវទេណ៎ា បើគិតទៅ១០ឆ្នាំហើយ មុខដដែលហ្នឹង២០០៣គេប្រកាសថាមុខដដែល ដល់២០១៣ គឺ១០ឆ្នាំក្រោយ នៅមុខដដែលទៀត ។ បើអ្នកប្រកាសហ្នឹងមុខនៅតែដដែល ហើយអ្នកដែលនិយាយហ្នឹងនៅតែមុខដដែលដែរ វាមិនដឹងធ្វើម៉េច ។
សម្តេចតេជោ មានប្រសាសន៍ថា បើឱ្យខ្ញុំកែសម្ផស្ស ខ្ញុំមិនកែទេ ខ្លាចប្រពន្ធខ្ញុំអត់ស្រឡាញ់ ព្រោះប្រពន្ធខ្ញុំស្រឡាញ់ខ្ញុំ គឺស្រឡាញ់រូបអីុចឹង មុខអីុចឹង ។ បើសិនកែសម្ផស្សទៅផ្សេង គាត់ថាទេមិនមែនប្តីរបស់គាត់ទេ…ចោលលុយបណ្តោយ….។
លោក ត្រាំ អីុតឹក រដ្ឋមន្ត្រីក្រសួងសាធារណការ និងដឹកជញ្ជូនថ្លែងថា សមិទ្ធផលដែលត្រូវប្រារព្ធពិធីសម្ពោធបើកឱ្យប្រើប្រាស់ជាផ្លូវការក្នុងថ្ងៃនេះ គឺជាគម្រោងសាងសង់ផ្លូវជាតិលេខ៥៧B សរុបប្រវែង១៧៦,៣៥គីឡូម៉ែត្រ ទទឹង១១ម៉ែត្រ ដែលចំណុចចាប់ផ្តើមនៅទីរួមស្រុកថ្មគោល (ផ្លូវជាតិលេខ៥) ខេត្តបាត់ដំបង និងបែកចេញជាផ្លូវខ្នែង មាន៣កំណាត់ តភ្ជាប់ទៅព្រំដែនថៃទាំងអស់ ។ កំណាត់ទី១ ថ្មគោល-បវេល សំពៅលូន ប្រវែង៩០,២០គីឡូម៉ែត្រ ។ ទី២-បវេល-ភូមិសាមសិប-ភ្នំព្រឹក ប្រវែង៦៩,៧៥គីឡូម៉ែត្រ ។ ទី៣ -ភូមិសាមសិប-កំរៀង-អូរដា ប្រវែង១៦,៤០ គីឡូម៉ែត្រ ។ កំណាត់ផ្លូវទាំង៣នេះបានបើកការដ្ឋានស្ថាបនាជាផ្លូវការកាលពីថ្ងៃទី២១ មីនា ឆ្នាំ២០១១ និងបញ្ចប់ការស្ថាបនានៅថ្ងៃទី១៦ ធ្នូ ឆ្នាំ២០១៣ ដែលចំណាយថវិកាអស់ប្រមាណ៨៩,៩៨លានដុល្លារអាមេរិក និងថវិកាបដិភាគមួយចំនួនរបស់រាជរដ្ឋាភិបាល ។
លោករដ្ឋមន្ត្រីបន្តថា ផ្លូវជាតិលេខ៥៧B ដែលត្រូវបានសាងសង់ឡើងនេះ គឺជាផ្លូវយុទ្ធសាស្ត្រសំខាន់តភ្ជាប់ពីផ្លូវជាតិលេខ៥ រហូតដល់ព្រំដែន កម្ពុជា-ថៃ តាមទីតាំងផ្សេងៗគ្នាដែលមានប្រជាពលរដ្ឋរស់នៅសងខាងផ្លូវដ៏ច្រើនកុះករ ភាគច្រើនរកទទួលទាន និងប្រកបរបរកសិកម្ម ដោយសារដីនៅតំបន់នេះមានជីជាតិល្អ ការធ្វើពាណិជ្ជកម្មនិងពលកម្មឆ្លងដែន ។ បន្ទាប់ពីសាងសង់រួចផ្លូវជាតិលេខ៥៧Bនេះនឹងធ្វើសមាហរណកម្មផ្ទៃក្នុងបន្ថែម ព្រមទាំងបង្កលក្ខណៈងាយស្រួលក្នុងទំនាក់ទំនងនិងការធ្វើដំណើររវាងខេត្តបាត់ដំបងឆ្ពោះទៅព្រំប្រទល់កម្ពុជា -ថៃ និងតាមរយៈផ្លូវជាតិលេខ៥៩ ឆ្ពោះទៅប៉ៃលិនដែលតភ្ជាប់គ្នាទៅតំបន់ប៉ៃលិន កំរៀង ភ្នំព្រឹក សំពៅលូន ម៉ាឡៃទៅនឹងច្រកទ្វារព្រំដែនប៉ោយប៉ែត អារញ្ញប្រាថេតព្រំប្រទល់កម្ពុជា-ថៃ ។
ផ្លូវជាតិលេខ៥៧B នេះនឹងជួយសម្រួលបន្ថែមដល់ការធ្វើពាណិជ្ជកម្មឆ្លងកាត់ព្រំដែន ទេសចរណ៍ និងការអភិវឌ្ឍដាំដុះដំណាំកសិកម្ម និងកសិ-ឧស្សាហកម្មដ៏មានសក្តានុពល។ ពិសេសដំណាំស្រូវ ដំឡូងមី ពោត សណ្តែក របស់ខេត្តបាត់ដំបង និងតំបន់តាមបណ្តោយព្រំដែន កម្ពុជា-ថៃ ជាការរួមចំណែកយ៉ាងធំ ក្នុងការជំរុញល្បឿននៃការអភិវឌ្ឍសេដ្ឋកិច្ចជាតិ និងកាត់បន្ថយភាពក្រីក្រ របស់ប្រជាជនកម្ពុជា បានយ៉ាងឆាប់រហ័សផងដែរ ។ ផ្លូវជាតិលេខ៥៧Bនេះ នឹងរួមចំណែកយ៉ាងច្រើនដល់គោលនយោបាយរបស់រាជរដ្ឋាភិបាលសម្រាប់អភិវឌ្ឍន៍វិស័យដឹកជញ្ជូន ការផ្គត់ផ្គង់ទំនិញនិងភ័ស្តុភារ ពិសេសគាំទ្រការផលិតនិងនាំចេញអង្ករ១លានតោននៅឆ្នាំ២០១៥ខាងមុខ ។
លោកជំទាវ ប៊ូ ជៀនគ័រ ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា មានប្រសាសន៍ថា ឆ្នាំ២០១៤នេះ គណៈកម្មាធិការសម្របសម្រួលអន្ដររដ្ឋាភិបាលចិន និងកម្ពុជា បានរៀបចំកិច្ចប្រជុំលើកដំបូងនៅទីក្រុងប៉េកាំង ។ ភាគីទាំងសងខាងបានឯកភាពយ៉ាងទូលំទូលាយចំពោះការពង្រឹងកិច្ចសហប្រតិបត្ដិការភាពជាដៃគូយុទ្ធសាស្រ្ដគ្រប់ជ្រុងជ្រោយរវាងប្រទេសទាំងពីរ ដោយបានកំណត់យ៉ាងច្បាស់នូវទិសដៅខិតខំនិងវិធានការលម្អិតដើម្បីបន្ដជំរុញកិច្ចសហប្រតិបត្ដិការលើគ្រប់វិស័យក្នុងដំណើរការបន្ទាប់ទៀត ។
លោកជំទាវឯកអគ្គរដ្ឋទូតចិនបន្ដថា ភាគីចិននឹងបន្ដប្រកាន់ខ្ជាប់គំនិតរាប់អានជាមួយប្រទេសជិតខាង ប្រទេសចិនចាត់ទុកប្រទេសជិតខាងជាដៃគូ បន្ដប្រកាន់ខ្ជាប់គំនិតរស់នៅជាមួយប្រទេសជិតខាង ធ្វើឱ្យប្រទេសជិតខាងមានសុខសន្ដិភាព ធ្វើឱ្យប្រទេសជិតខាងមានបាន ប្រកាន់ខ្ជាប់ភាពស្និទ្ធស្នាល ស្មោះត្រង់ អនុគ្រោះអត់ឱន ពង្រឹងថែមមួយកម្រិតទៀតនូវកិច្ចសហប្រតិបត្ដិការលើវិស័យហេដ្ឋារចនាសម្ព័ន្ធ កសិកម្ម ទេសចរណ៍ និងវប្បធម៌ជាដើមជាមួយភាគីកម្ពុជា ។
ភាគីចិនសង្ឃឹមថា ប្រទេសកម្ពុជាមានស្ថិរភាពនយោបាយ សេដ្ឋកិច្ចរីកចម្រើន ជីវភាពរស់នៅរបស់ប្រជាជនត្រូវបានកែលម្អជាបន្ដ
បន្ទាប់ ។ លើកទឹកចិត្ដឱ្យសហគ្រាសចិនកាន់តែច្រើនមកវិនិយោគទុន និងធ្វើអាជីវកម្មនៅប្រទេសកម្ពុជា ដើម្បីរួមចំណែកដល់កិច្ចអភិវឌ្ឍន៍ប្រទេសកម្ពុជា ។
លោកជំទាវគូសបញ្ជាក់ថា ខ្ញុំមានជំនឿជឿជាក់ថា កិច្ចខិតខំប្រឹងប្រែងរួមកិច្ចសហប្រតិបត្ដិការ ភាពជាដៃគូយុទ្ធសាស្រ្ដគ្រប់ជ្រុងជ្រោយរវាងចិននិងកម្ពុជា មុខជានឹងឈានទៅដល់កម្រិតមួយទៀត ។ ប្រទេសយើងទាំងពីរចិន-កម្ពុជា ធ្វើជាអ្នកជិតខាងល្អ មិត្ដភក្ដិល្អ បងប្អូនល្អ និងដៃគូល្អជារៀងរហូត ៕
ចែករំលែកព័តមាននេះ