រាជធានីភ្នំពេញ ៖ វិស័យមីក្រូហិរញ្ញវត្ថុនៅកម្ពុជានាពេលបច្ចុប្បន្ននេះ នៅតែជួបបញ្ហាមួយចំនួន បើទោះបីជាវិស័យមានកំនើនជាវិជ្ជមានក្ដី ដែលទាមទារអោយមានការដោះស្រាយរួមគ្នា ដើម្បីបន្តអភិវឌ្ឍន៍វិស័យនេះ អោយកាន់តែមានសន្ទុះ ចូលរួមលើកស្ទួយកំណើនជីវភាពពលរដ្ឋនិងសេដ្ឋកិច្ចជាតិ និងជៀសផុតពីការវាយប្រហារថាបានធ្វើឲ្យពលរដ្ឋក្រីក្រធ្លាក់ក្នុងបំណុលលើសលប់នោះ។
លោក រ័ត្ន សុវណ្ណនរៈ អគ្គនាយកត្រួតពិនិត្យនៃធនាគារជាតិកម្ពុជាបានមានប្រសាសន៍ថា ទោះបីជាសព្វថ្ងៃនេះ វិស័យមីក្រូហិរញ្ញវត្ថុមានកំនើនគួរឱ្យកត់សម្គាល់ក្ដី តែវិស័យនេះក៏នៅតែជួបប្រទះមួយចំនួនផងដែរ ជាក់ស្ដែងមានមតិមួយចំនួននៅតែបន្តរិះគន់ថា វិស័យមីក្រូហិរញ្ញវត្ថុកម្ពុជា ពុំបានជួយអភិវឌ្ឍន៍ជាវិជ្ជមានប៉ុន្មានទេ ដោយសារតែវិស័យនេះបានជំរុញឱ្យពលរដ្ឋក្រីក្រ ធ្លាក់ក្នុងបំណុលលើសលប់ ។ លោកបានបន្តថា ការឃោសនាអគតិនេះ បានធ្វើឱ្យមានការយល់ច្រលំ មកលើស្ថានភាពវិស័យមីក្រូហិរញ្ញវត្ថុបច្ចុប្បន្ន ។ ចំនុចមួយទៀតដែលធ្វើឱ្យវិស័យមីក្រូហិរញ្ញវត្ថុកម្ពុជាជួបបញ្ហាដែរនោះ គឺមានជនខិលខូចមួយចំនួន បានឃោសនាឱ្យពលរដ្ឋយកប្រាក់ទៅដាក់ជាមួយពួកគេ ដើម្បីបានការប្រាក់ច្រើនលើសពីមីក្រូហិរញ្ញវត្ថុ ។ ដោយនឹកចង់បានប្រាក់ចំណេញលឿន ពលរដ្ឋមួយចំនួនបានសន្សំប្រាក់របស់ខ្លួន ហើយខ្លះទៀតបានខ្ចីប្រាក់ពីបងប្អូន ឬមីក្រូហិរញ្ញវត្ថុ ដើម្បីយកទៅដាក់ជាមួយជនខិលខូចទាំងនោះ ទីបំផុតជននោះក៏បោកប្រាស់បងប្អូន និងបានធ្វើអោយខូចឈ្មោះដល់វិស័យមីក្រូហិរញ្ញវត្ថុទាំងមូល ។
លោកបានបន្តថា បច្ចុប្បន្ននេះនៅតែមានអង្គការមួយចំនួន ដើរតួនាទីជាមីក្រូហិរញ្ញវត្ថុ និងផ្ដល់ប្រាក់កម្ចីទៅប្រជាពលរដ្ឋក្នុងអត្រាការប្រាក់ខ្ពស់ហួសហេតុ ដែលជំរុញឱ្យប្រជាពលរដ្ឋធ្លាក់ក្នុងបំណុលវ័ន្តក និងងាយរងគ្រោះរឹបអូសទ្រព្យសម្បត្តិពីស្ថាប័នទាំងអស់នោះ ។ ការយល់ដឹងរបស់ប្រជាពលរដ្ឋក្នុងវិស័យហិរញ្ញវត្ថុនៅមានកម្រិត ក៏ជាកត្តាសំខាន់មួយក្នុងការអភិវឌ្ឍន៍វិស័យនេះផងដែរ ។
លោក រ័ត្ន សុវណ្ណនរៈ បានបញ្ជាក់ថា «មានកត្តាមួយចំនួនទៀតដែលធ្វើអោយ
វិស័យនេះនៅតែជួបបញ្ហាប្រឈម ដូចជាការប្រើប្រាស់កម្ចីមិនចំទិសដៅ ដែលបង្កឱ្យមានបំណុលវ័ន្តកដល់ប្រជាពលរដ្ឋ ព្រោះតែរកប្រាក់សងត្រលប់មកគ្រឹះស្ថានមីក្រូហិរញ្ញវត្ថុវិញមិនបាន និងត្រូវបានរឹបអូសទ្រព្យជាដើម » ។
លោក គា បូរាណ ប្រធានសមាគមមីក្រូហិរញ្ញវត្ថុកម្ពុជា បានមានប្រសាសន៍ថា
វិស័យមីក្រូហិរញ្ញវត្ថុមានការរីកចម្រើនលឿនចាប់តាំងពីឆ្នា ២០០៦ តែបានគាំងបន្តិចនៅឆ្នាំ ២០០៨ និង២០០៩ ដោយសារតែកម្ពុជាបានជួបវិបត្តិសេដ្ឋកិច្ចពិភពលោក តែក្រោយមកវិស័យនេះក៏បានរីកលូតលាស់បន្តទៀត ក្នុងនោះមានគ្រឹះស្ថានមីក្រូហិរញ្ញវត្ថុចំនួន៧ អាចទទួលប្រាក់បញ្ញើពីអតិថិជន ។ លោកបានបន្តថា រហូតមកដល់ពេលនេះប្រជាជនកម្ពុជាមួយចំនួន នៅតែមិនទទួលបានសេវាកម្មហិរញ្ញវត្ថុពីគ្រឹះស្ថានមីក្រូហិរញ្ញវត្ថុ ដូច្នេះសមាគមមីក្រូហិរញ្ញវត្ថុត្រូវបានបង្កើតឡើង ដើម្បីជំរុញការផ្ដល់សេវាកម្មទៅដល់ប្រជាពលរដ្ឋដែលត្រូវការសេវាកម្មឱ្យបានគ្រប់ៗគ្នា ។
សូមបញ្ជាក់ថា របាយការណ៍ពីធនាគារជាតិនៃកម្ពុជាបង្ហាញថា គិតត្រឹមដំណាច់ខែមិថុនា ឆ្នាំ២០១៩ ទំហំប្រាក់កម្ចីសរុបមានប្រមាណ ជាង ៦ ពាន់ដុល្លារអាមេរិក ផ្តល់ឲ្យអតិថិជនខ្ចីចំនួនជិត ២លាននាក់។ ក្នុងនោះសម្រាប់ប្រាក់បញ្ញើមានជាង ៣ពាន់ ៣០០លានដុល្លារអាមេរិក ដែលបានមកពីអ្នកដាក់ប្រាក់បញ្ញើជាង២លាន ៥សែនលាននាក់៕ កែសម្រួលដោយ ៖ សុឃាក់
ចែករំលែកព័តមាននេះ