រាជធានីភ្នំពេញ ៖ កិច្ចប្រជុំបិទទ្វារអស់រយៈពេលប្រមាណជាង៣ម៉ោង របស់គណៈកម្មការចម្រុះកំណែទម្រង់ការបោះឆ្នោតនៃគណបក្សប្រជាជនកម្ពុជា និងគណបក្សសង្គ្រោះជាតិ មិនទទួលបានលទ្ធផល និងចុះសម្រុងគ្នាជាដុំកំភួនណាមួយនោះទេ នាព្រឹកថ្ងៃទី១០ មីនា ។ ទោះបីជាបែបណា ក្រុមការងារគណបក្សទាំង២ បានកំណត់យកថ្ងៃទី១៧ មីនា ជួបគ្នាបន្តទៀត ។
រាជធានីភ្នំពេញ ៖ កិច្ចប្រជុំបិទទ្វារអស់រយៈពេលប្រមាណជាង៣ម៉ោង របស់គណៈកម្មការចម្រុះកំណែទម្រង់ការបោះឆ្នោតនៃគណបក្សប្រជាជនកម្ពុជា និងគណបក្សសង្គ្រោះជាតិ មិនទទួលបានលទ្ធផល និងចុះសម្រុងគ្នាជាដុំកំភួនណាមួយនោះទេ នាព្រឹកថ្ងៃទី១០ មីនា ។ ទោះបីជាបែបណា ក្រុមការងារគណបក្សទាំង២ បានកំណត់យកថ្ងៃទី១៧ មីនា ជួបគ្នាបន្តទៀត ។
លោក សុន ឆ័យ តំណាងគណៈកម្មការចម្រុះរបស់គណបក្សសង្គ្រោះជាតិ ថ្លែងក្នុងសន្និសីទសារព័ត៌មានបន្ទាប់ពីកិច្ចប្រជុំនាព្រឹកថ្ងៃទី១០ មីនា នោះ នៅវិមានព្រឹទ្ធសភាថា ក្នុងកិច្ចប្រជុំគណៈកម្មការចម្រុះបានជជែកគ្នាលើប្រធានបទចំនួនពីរ ក្នុងនោះគឺជជែកពីអ្វីដែលបានព្រមព្រៀងគ្នាកាលពីថ្ងៃទី៣ មីនា កន្លងទៅ ។ ចំណុចដែលលើកមកជជែកគ្នាគឺ មានការចុះឈ្មោះ ការបោះឆ្នោតឡើងវិញ ដើម្បីធានា និងការពារសិទ្ធិបោះឆ្នោតរបស់ប្រជាពលរដ្ឋ និងច្បាប់ស្តីពីហិរញ្ញវត្ថុរបស់គណបក្សនយោបាយ។
លោក សុន ឆ័យ បញ្ជាក់ថា ថ្ងៃនេះ (១០ មីនា) ក្រុមការងារគណបក្សសង្គ្រោះជាតិ បានលើកយកចំណុចពីការធ្វើកំណែទម្រង់ពាក់ព័ន្ធនឹងការបោះឆ្នោត គឺស្ថាប័នរៀបចំការបោះឆ្នោតថាយើងគួររៀបចំស្ថាប័ន គ.ជ.ប និងចំណុចសំខាន់ដែលធានាឱ្យការបោះឆ្នោតទទួលបានយុត្តិធម៌ ទទួលបានការទុកចិត្ត ដើម្បីកុំឱ្យមានបញ្ហាដូចអ្វីដែលប្រជាពលរដ្ឋឃើញនៅពេលបោះឆ្នោតកន្លងមកនេះ ។
ការដែលលើកយកប្រធានបទពីការបោះឆ្នោតនោះ គឺដើម្បីឱ្យងាយស្រួលក្នុងការលើកយកទៅពិភាក្សានៅក្នុងសិក្ខាសាលាថ្នាក់ជាតិនាពេលខាងមុខនេះ ។ កិច្ចប្រជុំនេះមិនចេញលទ្ធផលរួមនោះទេ ព្រោះថា បញ្ហាដែលជជែកគ្នាពាក់ព័ន្ធដល់ថ្នាក់ដឹកនាំជាអ្នកសម្រេច ។ ក្រុមការងារគណៈកម្មការកំណែទម្រង់ការបោះឆ្នោត នឹងជួបគ្នានៅថ្ងៃទី១៧ មីនា ខាងមុខទៀត ដើម្បីខិតខំឱ្យចំណុចដែលមិនទាន់ឯកភាពគ្នានោះ ទៅប្រាប់ដល់ថ្នាក់ដឹកនាំកំពូល និងឈានដល់ការចេញជាឯកសារមួយច្បាស់លាស់។ ក្រុមការងារគណៈកម្មការចម្រុះរបស់គណបក្សទាំងពីរ នឹងយកទៅប្រាប់ថ្នាក់ដឹកនាំកំពូល ហើយយើងសង្ឃឹមថា ការជួបគ្នាលើកក្រោយចំណុចណាមួយដែលគណៈកម្មការចម្រុះដោះស្រាយមិនចេញនោះ នឹងដោះស្រាយរួច និងរលូន ។ ចំណែកលោក ប៊ិន ឈិន តំណាងគណៈកម្មការចម្រុះគណបក្សប្រជាជនកម្ពុជា បានលើកឡើងថា ប្រធានបទដែលគណៈកម្មការចម្រុះលើកឡើងនោះ គឺការចុះឈ្មោះអ្នកបោះឆ្នោត និងបញ្ជីឈ្មោះអ្នកបោះឆ្នោតដើម្បីធានា និងការពារសិទ្ធិរបស់គណបក្សនយោបាយ ។ ចំពោះកិច្ចពិភាក្សាគ្នានៅព្រឹកនេះ មានប្រធានបទពីរគឺ កំណែទម្រង់ស្ថាប័នរៀបចំការបោះឆ្នោត និងអព្យាក្រឹតភាព និងសុក្រឹតភាពរបស់សង្គមសុីវិល ពាក់ព័ន្ធនឹងការបោះឆ្នោត ។ នៅមានចំណុចផ្សេងៗទៀតដែលត្រូវយកទៅជជែកគ្នានៅថ្ងៃទី១៧ មីនា បន្តទៀត ។ ក្នុងប្រធានបទដែលក្រុមការងារលើកយកមកពិភាក្សានេះ នឹងលើកយកទៅជជែកគ្នាបន្តលើកក្រោយទៀត ។
លោក សុន ឆ័យ ថ្លែងបញ្ជាក់ថា កិច្ចប្រជុំគ្នាលើកនេះ ចង់ឱ្យមានអ្វីដែលទទួលស្គាល់ពីគណបក្សនយោបាយដែលមានអាសនៈក្នុងរដ្ឋសភា ព្រោះថា កន្លងមកស្ថាប័ន ដែលត្រូវបានប្រជាពលរដ្ឋផ្តល់សេចក្តីទុកចិត្តមានការពាក់ព័ន្ធនឹងគណបក្ស ដូចជាការទទួលតំណែងពីគណបក្សនយោបាយផ្តល់ឱ្យវាជាការមិនត្រឹមត្រូវ ។ ចំណុចដែលក្រុមការងារគណៈកម្មការមិនទាន់អារកាត់នោះ មានការជាប់ពាក់ព័ន្ធនឹងរឿងនយោបាយ ដែលតម្រូវឱ្យថ្នាក់ដឹកនាំកំពូលដោះស្រាយ ។ ចំពោះអ្វីដែលគណបក្សសង្គ្រោះជាតិ លើកឡើងនោះ សុទ្ធតែជាគំនិតពីអ្នកឯកទេសដែលទាក់ទងនឹងការងារបោះឆ្នោត និងមានសង្គមសុីវិល និងអង្គការផ្សេងៗ និងប្រជាពលរដ្ឋ បានផ្តល់អនុសាសន៍ក្នុងសិក្ខាសាលាមុននេះ។ ទោះជាយ៉ាងណាក្តី លោក សុន ឆ័យ មិនបានបញ្ជាក់ថា គោលជំហររបស់គណបក្សសង្គ្រោះជាតិ ចង់ប្តូរសមាសភាពគណៈកម្មាធិការជាតិរៀបចំការបោះឆ្នោត (គ.ជ.ប) នោះ ទេ ។ លោកបានលើកឡើងថា បញ្ហានេះជាប់ទាក់ទងនឹងស្ថានភាពនយោបាយ ហើយជារឿងរសើបមួយសម្រាប់គណបក្សសង្គ្រោះជាតិ ។ បញ្ហាប្តូរសមាសភាព គ.ជ.ប គឺជាការសម្រេចរបស់ថ្នាក់ដឹកនាំ និងនិយាយគ្នាថា រកវិធីណាកុំឱ្យមានបញ្ហាបន្តនៅពេលខាងមុខទៀត ។ គណបក្សសង្គ្រោះជាតិ ចង់បានការធ្វើកំណែទម្រង់ការបោះឆ្នោតឱ្យបានលឿន ដោយមិនចាំអូសបន្លាយពេលយូរនោះទេ ។
កន្លងមក គណបក្សសង្គ្រោះជាតិ បានដាក់លក្ខខណ្ឌចំនួន៧ ហើយលក្ខខណ្ឌទាំងនោះមានជាប់នឹងការរៀបចំ គ.ជ.ប ឡើងវិញ និងបញ្ហាផ្សេងៗទៀត ដែលទាក់ទងនឹងការបោះឆ្នោត ។ ក្នុងសន្និសីទសារព័ត៌មាននោះដែរ លោក ប៊ិន ឈិន បានបញ្ជាក់ថា ក្រុមការងារមិនបានពិភាក្សាគ្នាលើការកំណត់សញ្ជាតិនាយករដ្ឋមន្ត្រី សមាជិកសភា ដូចការផ្សព្វផ្សាយរបស់វិទ្យុបារាំង RFI ដែលផ្សាយជាខេមរភាសានោះទេ។ ទាក់ទងនឹងការកំណត់សញ្ជាតិនាយករដ្ឋមន្ត្រី និងសមាជិករដ្ឋសភានោះ លោក សុន ឆ័យ បានឆ្លើយតបថា គណបក្សសង្គ្រោះជាតិ ស្វាគមន៍ និងបានលើកឡើងថា គោលការណ៍ដើម្បីប្រយោជន៍ជាតិ ព្រោះយើងជាពលរដ្ឋខ្មែរ ដែលបំពេញតួនាទីជាអ្នកនយោបាយ ។ ដូច្នេះពាក់ព័ន្ធនឹងសញ្ជាតិ ជាប្រធានបទមួយ បើគណបក្សប្រជាជនកម្ពុជាស្នើ យើងអាចទទួលយកមកពិភាក្សារាល់ចំណុចនៃសំណើនេះ ប៉ុន្តែយើងស្នើសុំកុំឱ្យមានការស្នើសុំម្តងមួយៗ ព្រោះវាជារូបភាពចង់ពន្យារពេល គឺយើងឱ្យដាក់ម្តងទាំងអស់មកពិភាក្សាគ្នាតែម្តង ។ ទោះជាយ៉ាងណាក្តី លោក សុន ឆ័យ ថ្លែងទៀតថា ក្នុងជំនួបថ្នាក់ដឹកនាំកំពូលកាលពីថ្ងៃទី១៦ និង១៧ ខែកញ្ញា ឆ្នាំ២០១៣ កន្លងទៅនេះ សម្តេចតេជោ នាយករដ្ឋមន្ត្រី ហ៊ុន សែន និងលោក សម រង្សុី បានជជែកគ្នាពីការបង្កើតឱ្យមានអាណត្តិនាយករដ្ឋមន្ត្រីផងដែរ ។ ការកំណត់ថាមានអាណត្តិនាយករដ្ឋមន្ត្រី ជាផ្លូវការនោះ ទាល់តែមានជំនួបថ្នាក់ដឹកនាំកំពូល ។
មានការកត់សម្គាល់ថា មុននឹងបើកកិច្ចចរចាជាមួយគណបក្សសង្គ្រោះជាតិ មន្ត្រីជាន់ខ្ពស់របស់គណបក្សប្រជាជនកម្ពុជា បានប្រកាសចេញនូវរបៀបវារៈថ្មីមួយ គឺគណបក្សប្រជាជនកម្ពុជា ចង់កំណត់ថា នាយករដ្ឋមន្ត្រី និងសមាជិកសភា ត្រូវមានសញ្ជាតិខ្មែរតែមួយគត់ ដែលបញ្ហាបានសំដៅទៅដល់គូប្រជែងគឺគណបក្សសង្គ្រោះជាតិ ។ នេះបើតាមការអះអាងរបស់លោក ជាម យៀប សមាជិកជាន់ខ្ពស់ និងជាសមាជិកគណៈកម្មការចម្រុះសម្រាប់កែទម្រង់ការបោះឆ្នោតខាងគណបក្សប្រជាជនកម្ពុជា ដែលត្រូវបានផ្សព្វផ្សាយដោយវិទ្យុបារាំង RFI ផ្សាយជាខេមរភាសា ។
ការប្រកាសជំហររបស់គណបក្សប្រជាជនកម្ពុជាខាងលើ គឺច្បាស់ណាស់ថា ជារបៀបវារៈដ៏សំខាន់មួយ ទល់នឹងការទាមទាររបស់គណបក្សសង្គ្រោះជាតិ ឱ្យបោះឆ្នោតឡើងវិញមុនអាណត្តិ ។ ការលើកឡើងរបស់មន្ត្រីជាន់ខ្ពស់គណបក្សប្រជាជនកម្ពុជា ក៏សំដៅលើលោក សម រង្សុី ជាបេក្ខភាពនាយករដ្ឋមន្ត្រី របស់គណបក្សសង្គ្រោះជាតិ ហើយលោក សម រង្សុី មានសញ្ជាតិពីរ គឺសញ្ជាតិបារាំងផង និងខ្មែរផង ៕
ចែករំលែកព័តមាននេះ