ក្រុងប៉ោយប៉ែត ៖ ទោះបីថ្មីៗនេះរាជរដ្ឋាភិបាលបានប្រកាសហាមដាច់ខាតមិនឱ្យមានការចរាចរណ៍ឬក៏ប្រើប្រាស់សីុសាដែលជាប្រភេទថ្នាំ ញៀន ស៊េរីថ្មី ក៏បច្ចុប្បន្ននេះមានយុវជនជាសិស្សានុសិស្សកំពុងតែឈ្លក់វង្វេងដូចគោហ្វូងនាំ គ្នាចូលជក់គ្រឿងញៀនប្រភេទនេះបង្ហុយផ្សែងពេញហាង ជាពិសេសតាមទីប្រជុំជន ទីក្រុង និងតាមជាយដែនកម្ពុជា-ថៃ ។
ក្រុងប៉ោយប៉ែត ៖ ទោះបីថ្មីៗនេះរាជរដ្ឋាភិបាលបានប្រកាសហាមដាច់ខាតមិនឱ្យមានការចរាចរណ៍ឬក៏ប្រើប្រាស់សីុសាដែលជាប្រភេទថ្នាំ ញៀន ស៊េរីថ្មី ក៏បច្ចុប្បន្ននេះមានយុវជនជាសិស្សានុសិស្សកំពុងតែឈ្លក់វង្វេងដូចគោហ្វូងនាំ គ្នាចូលជក់គ្រឿងញៀនប្រភេទនេះបង្ហុយផ្សែងពេញហាង ជាពិសេសតាមទីប្រជុំជន ទីក្រុង និងតាមជាយដែនកម្ពុជា-ថៃ ។
ជាក់ស្ដែងកាលពីយប់ថ្ងៃទី៦ មីនា កន្លងមក កងរាជអាវុធហត្ថក្រុងប៉ោយប៉ែតដឹកនាំដោយលោកហម ម៉ុត បានចុះបង្ក្រាបហាងជនជាតិឥណ្ឌូណេសីុមួយកន្លែងស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត មានយីហោ«ឥណ្ឌូកាហ្វេ»ដោយបានដកហូតដបសីុសាចំនួន៤ ខណៈកំពុងដាក់លក់នៅក្នុងហាង ។
លោក ហម ម៉ុត មេបញ្ជាការកងរាជអាវុធហត្ថក្រុងប៉ោយប៉ែត ឱ្យដឹងថា ម្ចាស់ហាងដែលសមត្ថកិច្ចចុះបង្ក្រាបនេះជាជនជាតិឥណ្ឌូណេសីុឈ្មោះភី អីុឌី (P EDY) ភេទប្រុស អាយុ៤០ឆ្នាំ កាន់លិខិតឆ្លងដែនលេខA៥២៦៤៤៩៣ មានទីតាំងនៅជាប់របងកាសីុណូផ្កាយ៥ ។ លោកបន្តថា ដោយគោរពតាមបទបញ្ជារបស់ថ្នាក់ដឹកនាំកម្លាំងអាវុធហត្ថរបស់លោកបានធ្វើការហាមឃាត់អាជីវករទាំងអស់ពិសេសក្នុងក្រុងប៉ោយប៉ែត តែម្ដង គឺមិនអនុញ្ញាតឱ្យមានការលក់ដូរឬប្រើប្រាស់សីុសាឡើយ ។ ចំពោះម្ចាស់ហាងខាងលើត្រូវបានសមត្ថកិច្ចអញ្ជើញមកបញ្ជាការដ្ឋានដើម្បីអប់រំរួចហើយក៏អនុញ្ញាតឱ្យត្រឡប់ទៅកាន់លំនៅឋានវិញ ។
សូមបញ្ជាក់ថា ថ្នាំញៀនប្រភេទថ្មីហៅថា«សីុសា» នេះ បើតាមអ្នកជំនាញផ្នែកគ្រឿងញៀនឱ្យដឹងថា វាបង្កការប៉ះពាល់ដល់សុខភាពអ្នកប្រើប្រាស់យ៉ាងធ្ងន់ធ្ងរបំផុត ព្រោះការជក់ម្ដងមួយបំពង់ៗស្មើនឹងជក់បារី២០០ដើម ហើយក៏ជាប្រភេទថ្នាំញៀនដែលពង្វក់ស្មារតីក្មេងៗទាំងស្រីទាំងប្រុសឱ្យញៀនចូលជក់រាល់ថ្ងៃភ្លេចបាយភ្លេចទឹក ភ្លេចការសិក្សាថែមទៀតផង ។ អ្នកជំនាញបន្តទៀតថា ការជក់ថ្នាំញៀនប្រភេទសីុសានេះបើអ្នកប្រើប្រាស់យូរៗទៅអាច បណ្ដាលឱ្យកើតមហារីកសួតនិងបេះដូង និងប៉ះពាល់ដល់សុខភាពយ៉ាងខ្លាំង ។ សីុសាមួយបំពង់សម្រាប់ការលក់នៅរាជធានីភ្នំពេញនាពេលកន្លងមកមានតម្លៃពី៨ទៅ១០ដុល្លារ គេទិញមកជក់មានគ្នាពី៤ទៅ៥នាក់ ស្មើនឹងជក់បារី២០០ដើម បង្ហុយផ្សែងស្ទើរងងឹតមេឃ ។ បច្ចុប្បន្ន គេសង្កេតឃើញនៅក្នុងក្លិបរង្គសាល ខារ៉ាអូខេ និងឌីស្កូ ក្នុងប្លុកកាសីុណូ នៅតំបន់ជាយដែនខ្មែរ-ថៃ និងទឹកដីក្រុងប៉ោយប៉ែត ខេត្តបន្ទាយមានជ័យ គ្រឿងញៀនប្រភេទសីុសានេះកំពុងពេញនិយមយ៉ាងខ្លាំងពីសំណាក់យុវវ័យ និងសិស្សានុសិស្ស ទាំងស្រីទាំងប្រុស ចូលជក់បង្ហុយផ្សែងទ្រលោមភ្លេចបាយភ្លេចទឹក ភ្លេចការសិក្សាអស់ ហើយគេចមិនចូលសាលាចូលរាំគ្រវីក្បាល ស្ទើរដាច់ក ដោយសារញៀននឹងការជក់គ្រឿងញៀនប្រភេទនេះ ។
ពាក់ព័ន្ធនឹងបញ្ហាខាងលើអាណាព្យាបាលសិស្សក៏ដូចជាប្រជាពលរដ្ឋ បានសំណូមពរយ៉ាងទទូចចំពោះស្ថាប័នជំនាញពាក់ព័ន្ធនិងអាជ្ញាធរមានសមត្ថកិច្ច មេត្ដាត្រួតពិនិត្យទៅលើបញ្ហាខាងលើនេះផងព្រោះវាមានផលប៉ះពាល់ដល់សុខភាព និងខូចអនាគតកូនចៅជំនាន់ក្រោយ ។ ពួកគាត់សុំឱ្យចុះបង្ក្រាបឱ្យដូចភ្លៀងរលឹមនិងមានប្រសិទ្ធភាពខ្ពស់ កុំយោគយល់ឬខ្លាចប៉ះពាល់ដល់ផលប្រយោជន៍ផ្ទាល់ខ្លួន ត្រូវយកច្បាប់ជាធំពីព្រោះថាយុវជនជាទំពាំងស្នងឫស្សី ចុះបើទំពាំងស្នងជាទំពាំងស្អុយតើវាសនាប្រទេសជាតិយើងនឹងក្លាយទៅជាយ៉ាងណានាថ្ងៃអនាគត ៕
ចែករំលែកព័តមាននេះ